Sɛɡla 24 - mzwDBL

¹ Bɛ wechɔɡ-ɛɛra bɔweela ɛ, bɛ ɡel he pɛla lawɛ kɛ he ne baa pɛo.

² Waa ba liire yon do a ta laanee naɡre wa, ba wobol ɡe ɛ bichɔɡwa.

³ Wejema nee baa do dem, asɛ waa mun noe ɡel wɛɛ che.

⁴ Wejema taa a che deene aa lɔ dem bela la su kondɛɛɡa a yoɡ aa kpeɡa.

⁵ Nɛn o kwa aa chaahna dɛ́ dɔ bokpeɡa kohona, asɛ nɛn waa jemɛ wa ɛɛ di kpeɡri.

⁶ A chɛ kɛŋɔ hé maɡle he waa kɛrɛdɛ mɔɔ dɛ́ yo laa. Gɛɛ a do dɛ he dɔ jajaala kɛrɛdɛ waraa, hɛɛ ba wona yo le.

⁷ Wejemwobol mun noe kpeɡri tɛ ɡɛne kɛŋɔ ó won no a mun. Bwɛɛla chemo dɛɛ bol wa aa, waa won ane bol.

⁸ Nɛn waa dɛ vɔrɔwe wechɔɡa la, nɛnchɔɡee baa yerɔ.

⁹ Gɛne wemaɡla bɛlbwa ɛ wechɔɡa, asɛ nɛn bɛlbwa ɡe hah bammuɡli nɛn.

¹⁰ Waa ba he nɛɛ dɛ he ta wone che kiŋkiŋ naa, dɛ he bokpeɡa aa kanɛ kpa.

¹¹ Lɛ nɛra baa dɛ́ ba bá kpoora ba tepoŋ ne, bɛ che nyiŋ ba ba serewe.

¹² Bɛ sie laa kpɔ waane ta, dɛ́ ŋɔ he waane laa. Korowiirii jemɛ bambile bɛlbwa wa. Wɛɛ bɔ bɛlbwa kemee ɡɛ waa ɛa.

¹³ N bie, tohnoo dɔ pɛla dɛ do som, anomanta, bɛ an vɛh.

¹⁴ Jemɛ kɛŋɔ wejema wer tɛ he wee, he dɔ wejema aa, he dɔ hwɛɡa he soɡa bini kerekere.

¹⁵ Bɛ he te ɛ kɛŋɔ nɛnchɔɡa yon vɔrɔwe vɔrɔwa, dɛ́ ka bar nɛndɛɛɡa deremi cheme, dɛ́ ŋwɛɛ ba la.

¹⁶ Waa pu nɛn o wa aa toɡra, o chole kera anuanɛ naa, o berɔ dɛɛ ir. Kɛ dɛ wechɔɡa pu nɛnchɔɡe te naa, o dɛ lɔ harɛ.

¹⁷ Waa pu he dɔm aa, bɛ ɡel he sie lɛ, o lɔ harɛ naa, bɛ ɡel a do he som.

¹⁸ A ba ɡɛ naa, Korowii ɛɛ nae, ásɛ dɛ laa o bandia kpɔ ɡɛ nɛn la nɛ.

¹⁹ Bɛ ɡel he baah di wechɔɡ-ɛɛra we-ɛɛla wa, bɛ ban bɔweela ɛ.

²⁰ Wechɔɡ-ɛɛ ta hwɛɡa bɛlbwa dɔe kerekere, wobɛlbwa toole o sie dawɛ a ta.

²¹ N bie, dɛɛ ɔmɛ Korowii ne he kooro, he ne nɛra baa dɛ ɛɛ ba deŋnekpeɡ bɛ pɛ dɛ́ ɛ beŋkpoŋ.

²² Wekpeɡa ane ɛɛ won piɡri le Korowii kɛɛ kooro la be dɛ ba. Umee dɛ won jemɛ wahala aa le ba bɛlbwa be dɛ́ ba nɔ?

Wejerema waa ane ɡe ja

²³ Wejemwobol ane ɡee nɔ. Nɛn siebɔr nyiŋa dɛ́ bol waa dɛ́ pa bole ta aŋwɛnɛ ta ɛɛ.

²⁴ He pa boldɛɛɡe te bolchɔɡe aa, harɛre nɛra bwa dɛ́ taahnee dɛ́ haeh.

²⁵ He tɛr bolchɔɡe te deŋne aa, wobɛlbwa ɛɛ do werii tɛɛ, he dɔ sɔndɛɛɡe.

²⁶ He chaŋe nɛn waa aŋwɛnɛ ta naa, a dɛ baɡle kɛŋɔ he ne o darame pɛo.

²⁷ Nyin koo haa dɛ di o ta mɔɔ dɛɛ nyin bela haa kpɔ he nyu bil.

²⁸ Bɛ waa haa wola he dɔŋ nɛɛ nae la danseɛ di, bɛ nyosone teŋe.

²⁹ Bɛ ba lii ŋɔ, “Gɛ waa ɛɛ mɛ la, n ɡee ɛo anee, kɛɛ mɛɛ tɔɔ a welee.”

³⁰ N fɛrɛ bɔhwaah bɛl koo nyoa, n kpɔ ɡɛne bɛl daa koo ta.

³¹ Jabalnadaŋɛ ne kpɔɡa lɛ koo la bwa, bwea waa kpɔa ma danjwɛɛ baro la ɡe kuuɡi.

³² N nyiŋi koo la jeiih ken, dɛ lii waa kɛrɛdɛ, dɛ kpɔ hweli wa.

³³ Chɔe tama, dom chuɡla tama, nɔɔra fɔɔla dɛ́ so onɛ tama,

³⁴ he ne ŋɔe he ba jemɛ la, dɛ nyaa piɡri kɛŋɔ ŋwɛɛ aa kpoŋe dɔmkon dɛ́ ba che he nɛ.