Sɛɡla 23 - mzwDBL

¹ Dɛ he ne nomonjen dɛ ba kwaa dii yaa, nyiŋi he waa bini kɛrɛdɛ,

² dɛ he ɛ kafonyini aa, jemɛ he te lawa.

³ Bɛ ɡel he pɛla do o kondikondɛɛɡa la ta, a ken ɛ ŋwɛnɛ bɛl waa kpɔ neɡre.

⁴ Bɛ kondɔɔh waa koh dɛ́ chɔɡ he te, ɡel a ɡɛ liire la, dɛ́ jemɛ he te lawa.

⁵ Kondɔɔh won hee kelo kɛŋɔ komɛl yon ɡale he sie ta la, a won ɛɛ kɛŋɔ kee kena yon moɡɛ ó ir kaa la.

⁶ Bɛ nɛn o tea bini aa kpela kondikwaa ba di bwa, bɛ ɡel he pɛla do o kondikondɛɛɡa ta.

⁷ Gɛ naate la liire aa doa la, ɡɛɛ o ɡbaɡba do. Wɛɛ ŋɔ he bee ŋɔ, “Di he tea bwa.” Kɛ dɛ o bambile bwa ne laa.

⁸ Vaɡa haa vaɡa la, hɛɛ chwɛɛroo, ásɛ he wobosoma haa bola la yon ɛ pɛɛpɛɛ.

⁹ Bɛ waa bol ɡɛne be koh, o dɛ lii waa aa lɔ a ta la wesale.

¹⁰ Bɛ saŋ la jwɛh waa chɔ le la laa kpɔ, bɛ bilalbii harɛ lɛ.

¹¹ Ba dɔ nomɛl waa cheɡɛ ba habɔɔ, onee Korowii, wɛɛ boloo bɔe.

¹² Cheɡ deŋne no wa, ásɛ dɛ hweli wa.

¹³ Bɛ sie laa kpɔ bechala doe ta, he kpɔ chweema dɛɛ tɛr o deŋne aa, waa sewɛ.

¹⁴ Dɛ he kpɔ chweema tɛr o deŋne aa, o nyuu hɛɛ lɛ.

¹⁵ N bie, dɛ he jemɛ wa aa, n baah ɛɛ sɔɔh mɛɛ.

¹⁶ Aa do n somee kɛ maa noa kɛ he dɛ bol waa aa toɡra.

¹⁷ Bɛ wechɔɡ-ɛɛra bɔweela ɛ, ɡel Korowii duura swɛɛ he siwi saŋ bɛlbwa.

¹⁸ Wedɛɛɡa ane chɔ le kerekere dɛ tɛɛ, he hwɛɡa aa pɛɛ ta bwa.

¹⁹ N bie, no dɛ́ che a ta jemɛ wa, ásɛ he sie chɔ harɛ he soɡa bini.

²⁰ Bɛ sennyɔɔra nɛɛ ja, he ne banɔ la baa dɛ di kondikombala la bɛ pɛ.

²¹ Sen nyɔe ne kondibala te, nyae nee aa ba, ɡɛɛ dom chɔe kohona ɡe ɛɛ ba yakwane tɔe ne.

²² Dɛɛ no he mɛɛ deŋna wa, onee lolɛ, he nya ɡe baa hwɛɛhraa, bɛ on nyiŋi vah.

²³ Lawɛ kasinteŋ bini kpoŋe dɛ bɛ kpɔ ta, nyin wejema ne waa hwela dɛ waa mun noe.

²⁴ Nɛn o wa aa toɡra mɛɛ sie dɛ lɛ, nomɛlbwa waa lolɛ biwejereme la, sie dɛ lɛ o nɛ.

²⁵ Gel he nya ne he mɛɛ sie ɛɛ lɛ, he nya te fanfa.

²⁶ N bie, cheɡ deŋne kɛrɛdɛ, ásɛ dɛ kpɔ n da.

²⁷ Hanjwamane do kɛŋɔ bel, haah waa le o jaa habɔɔ do kɛŋɔ bɔluŋ.

²⁸ O kpɔ o te dɛɛ sɔh kɛŋɔ ŋwɛɛ ken, dɛ ɡel baala le ba haahna habɔɔ dɛɛ ba o be. O lawɛ ba nyuune dɛɛ lɔ dɔŋa.

²⁹ Umee dɛɛ na waa kɛɛ dɛɛ wi suna ɔ? Umee lɔ wobobala ne naɡra ta nɔ? Umee ba do bol pɛɛpɛɛ ɔ? Ume sibie swɛɛra ɔ?

³⁰ Nɛra baa soɡe sen mun dɛɛ biɡri, kɛɛ dɛɛ daɡɛ sen baa koora a do kpeɡri la.

³¹ Bɛ ɡel sen a nyɔe aa soma, a sie swɛɛ dɛɛ wure numol bini neɡre.

³² A habɔɔ la, a do kɛŋɔ domkpule aa choɡe ken.

³³ Hɛɛ na musuwaa, ásɛ he liire ɛ sakaa.

³⁴ He sie ɛɛ birii kɛŋɔ haa soɡe ɡbera ta vil sie ken, kɛɛ haa chɔ ɡbera bini nehɛma ɛɛ lɔ la ken.

³⁵ Hɛɛ boloo ŋɔ, “Ba lɔ mɛ, kɛ ba ta men bol doe.” Dɛ berɛ ŋɔ, “Ba lɔɔ mɛ, kɛ maa jemɛ. Saŋ besoo mɛɛ ba ira dɛ́ ka nyin sen nyɔ jaɔ?”