Sɛɡla 22 - mzwDBL

¹ Sɔndɛɛɡee chɛ nyina ɡwaa kondɔɔh tenten, ɡɛɛ duure do wer ɡwaa suuɡapoŋ kɛɛ suuɡaswɛm.

² Suuɡate ne nyaa bwa ɛ beŋkpoŋ Korowii be. Onee ta ba bwa.

³ Wejereme dɛ na waa aa lɔ sie dɛɛ ba dɛ fel dɛɛ kea, nɛn waa wola wobɛlbwa jemɛɛ yon ka jo a ta dɛɛ na wa.

⁴ Ɔmɛ Korowii, pwɛr he te, hɛɛ dɔ kwaa ne jirima ne mkpajaŋee.

⁵ Nafuɡere ne sɔɔhne lɔ wechɔɡ-ɛɛra ŋwɛnɛ ta, he dɛ nyin he nyu aa, laa he te kpɔ ɡɛ ŋwɛnɛ la ta.

⁶ Do he bie kɛrɛdɛ waa aa wera ta, ásɛ dɛ o baa kpeɡ aa, o bɛ an ɡel.

⁷ Gɛ suuɡate aa dɛ di kpeɡri nyaa nɛɛ la, ɡɛɛ nɛn waa di kem la ɛ nɛn waa kemɔ suuɡa la bonɔɔ.

⁸ Nomɛlbwa waa dɛ ɛ wechɔɡa la dɛ na a wa, nɛra waa dɛ ɛɛ ba hɔhɔrɔwa la dɛ ba a jaɡa.

⁹ Nɛn waa dɔ tesom dɛɛ tɛ nyaara kondikwa la, Korowii ɡelɔ wɛɛ na som.

¹⁰ Doŋi bammuɡli nɛn le he jwɛh, ásɛ wobobala ne naɡra ne chɛɡa bwa tonɛ.

¹¹ Dɛ he dɔ bambidɛɛɡe dɛ jemɛ wobol aa, kooro dɛ kpɔe dam.

¹² Korowii dɛ nyiŋi nomɛlbwa waa dɔ wejema, dɛ taɡɛ nyosonteŋni waa dɛɛ ta.

¹³ Bɔhwaahree yon ŋɔ, “Nyujente lɔ dahare!” Kɛɛ, “O ken ɛɛ kpo mɛ fɔɡbaahnaa!” dɛɛ so dem.

¹⁴ Hanjwamane wobol do kɛŋɔ bɔluŋ ken. Nɛn waa dɛ ɛ Korowii bandiwaa la dɛ le o bini.

¹⁵ Gɛnewa lɔ bechala bɛlbwa bambile ta, kɛ dɛ he kpɔ chweema toɡro waa, o dɛ jemɛ wa.

¹⁶ Nɛn waa ɛɡre nyaara dɛ dɔ kwaa dɛɛ ja la, ne onɔ la waa kpɔ kwaa dɛɛ kɛ dɔɔhna la, ba bwa dɛ nya.

Wejerema waa baa bola

¹⁷ Cheɡ deŋne dɛ no nɛn waa jemɛ waa wobol, dɛ́ hweli waa maa dɛ baɡle nɔ.

¹⁸ A wer kɛ he kpɔ do he nyu bini, dɛ́ kpɔ dɛɛ bol wa.

¹⁹ N ɡelɔ hɛɛ jemɛ fini, ɡɛ aa ɛ he kpɔ he hwɛɡa bwa do Korowii nɛ.

²⁰ N chwerɛ webele fifraatoro dɛ tɛɛ, wejaala ne wejema lɔ a ta.

²¹ A taa hɛɛ ba cheɡa dɛ́ jemɛ kasinteŋ, dɛ́ kpɔ waa aa ɛ kasinteŋ dɛɛ tɛ nɛra baa tomɛ.

²² Bɛ he dɔŋ nyae waa koh dɛ́ ɛɡro lɛ komɛl. Bɛ o nɛɛ nya, ásɛ dɛ bol waa bɔɔ kɔɔto.

²³ Korowii ɛɛ bol a ɡɛ nɛra la waa tɛɛ ba, ásɛ ɡɛ haa lɛɛ ba kwaa la, ó lɛ le he be.

²⁴ He ne nɛn o baah aa dɛ di kohona bɛ darame di. He ne nɛn o baah aa wola biɡri dii bɛ pɛ,

²⁵ ásɛ he ba hwelu dɛ́ le a ta kahonɛ.

²⁶ Bɛ nɔn kpɔ ɛɡɛ tɔn ta tɛ nomɛl, kɛɛ dɛ di ajinamuu tɛo.

²⁷ Dɛ he ta komɛl bwa dɔe dɛ́ kpɔ bɔ aa, baa won lɛ he kalaŋ haa dɛ chɔ o ta ɡba.

²⁸ Bɛ harɛ jwɛh he naawa aa bilu la laa kpɔ.

²⁹ Nɛn waa jemɛ nɔn toma kɛrɛdɛ la, koranar tomaa wɛɛ ɛ, waa nɛnsale toma ɛ.