Sɛɡla 21 - mzwDBL

¹ Kooro bɛlbwa liire lɔ Korowii nɔn ta, kɛŋɔ nɛn yon pere bɔr tɛ nee wɛɛ kpɔ o ta la.

² Nɛwɛnyini dɛ lii kɛŋɔ o wobɛlbwa toɡrɔ o be, kɛ Korowiirii dɛɛ nyiŋi a bini.

³ We-ɛɛla aa wera dɛ toɡre, dɛ su Korowii siwi ɡwaa kɛŋɔ haa ɛ saraha tɛo.

⁴ Sisa we-ɛɛla ne mbarafo, ne wedoŋa bwa ɛ wechɔɡa.

⁵ Nɛn waa dɛ maɡle waa kɛrɛdɛ la dɛ́ dɔ kwaa taeh, kɛ he too waa ta naa, nyae hɛɛ nya.

⁶ He kpɔ nyosone ŋwɛnɛ ta dɛ dɔ kwa aa, a dɛ le he nɔn ta kɛŋɔ peu ken, dɛ́ berɛ ba seo ne.

⁷ Nyubinikpeɡ te naɡrenyinii dɛɛ chɔɡo, o dɛ vɛh waa aa wera ɛɛ.

⁸ Nɛn waa di waa ane bolchɔɡe la, o wobɛlbwa aa toɡre, kɛ nɛn waa di bole la soɡa bini toɡrɔ.

⁹ He ɡbo soɡe saldoa bɔ kɛ he ne hannaɡrenyini aa pɛ dem.

¹⁰ Wechɔɡ-ɛɛ te bɛlbwa dɛ nyin wechɔɡa taeh, waa o dɔŋ nɛɛ sune.

¹¹ Bammuɡli nɛn dɔ deŋnetɛra aa, ɡɛne hweli waa dɛɛ le a ta, ɡɛɛ ba baɡle wejereme wa aa, wɛɛ jemɛ wa.

¹² Korowii O Wa Aa Toɡra jemɛ waa aa lɔ nɛnchɔɡe dem. Wɛɛ tɛr o deŋnee.

¹³ He laa deŋna kpɔ nyaa wii waa dɛ wi ta naa, he ɡe ɛɛ baa wiu, haa nɛnee dɔ ó lɛɛ.

¹⁴ Dɛ nomɛl baah di he nɛ, he sɔh kpɔ kon kɛo waa, a ɡelɔ o baah ɛɛ sɔɔh.

¹⁵ Nɛn o wa aa toɡra la, ba bol kasinteŋ aa, o sie dɛ lɛ, dɛ ɛ ɔmee kohona tɛ wechɔɡ-ɛɛra.

¹⁶ Nɛn waa kona le wejema ŋwɛnɛ ta la, sewaa wɛɛ sewɛ.

¹⁷ He dɛ nyin silɛɛbɔra kohona naa, nyae hɛɛ nya. Gɛɛ dɛ he dɛ nyin sen ne kondikondɛɛɡa aa, a do dɛɛ tɛɛ.

¹⁸ Nyubinikpeɡ te dɛ nyin nɛn o wa aa toɡra ne wechɔɡa aa, a dɛ ɡure o nɛ.

¹⁹ Baa ɡbo soɡo bɔ ɡwaa kɛŋɔ waa mo hannaɡrenyini o baah aa dɛ di kohona.

²⁰ Nɛn waa jemɛ waa la dɛ́ dɔ kondɔɔh ne kondɛɛɡa, kɛ ɡɛnee dɛɛ chɔɡ o kwa.

²¹ Nɛn waa teŋɛ waa aa toɡra ta, dɛ dɔ nyina ɡe la, o dɛ biɡri, o wobɛlbwa ɡe ɛɛ do wer wɛɛ dɔ jirima.

²² Nɛn waa jemɛ waa la won bwɛjen bokpeɡa tena aa lɔ o ta yoi, dɛ́ paɡre ba dekpeɡa baa dɛ hwɛɡɛ a ta.

²³ He jemɛ he nyoa lawa aa, haa waa dɔ.

²⁴ Nomɛlbwa waa dɛ maŋkura o te la dɛ́ ɛ mbarafo. O ɛ bammuɡli nɛn o we-ɛɛla ɛɛ ɡwaa kohona.

²⁵ Bɔhwaah pɛla konee dɛɛ kpoo, dɛkalkɛ waa toma ɛɛ nyin.

²⁶ O sie dɛ beɡre kohona o dɔ kwaa dɛɛ ja tɔpere bɛlbwa. Kɛ nɛn o wa aa toɡra la te ta tea dɛɛ tɛ kon, waa nɔn nyore.

²⁷ Korowii kii nɛnchɔɡe saraha, n baa bol kɛŋɔ haa kpɔ liichɔɡa ɛa.

²⁸ Dansewea te dɛ sewɛ, asɛ nomɛlbwa waa dɛ no o be la ɡe sewɛ.

²⁹ Nɛnchɔɡe dɛ ɛ o siebɔr kɛŋɔ o ɛ nɛndɛɛɡe, nɛn o wa aa toɡra te dɛ́ nyiŋi o waa bini kɛrɛdɛ.

³⁰ Nɛwɛnyini wejema ne waa mun noe, dɛ wejaala ɛ pɛɛpɛɛ, dɛ Korowii ta o nɛɛ jae yaa.

³¹ He dɔ jaɡre ɡɛ bɛlbwa dɛ won kpɔa yo aa, Korowiirii dɛ won ɡel he yo le.