Sɛɡla 20 - mzwDBL

¹ Sen nyɔe kohona ɡelɔ nɛn ɛɛ do ɡbɔɡa dɛɛ ɡɛn. Nomɛlbwa waa kpɔ a nyɔe berɛ o toma la ta liire dɔe.

² Kooro bandia do kɛŋɔ nyujente aa dɛ si ken. Nomɛlbwa waa dɛ doo bwaawee la dɛ ta o nyu.

³ Baa bɛlbwa jirimaa kɛŋɔ o laa o te kpɔ naɡra we-ɛɛla ta, ɡɛnee dɛɛ nyin yoi.

⁴ Paa waa dɛ ɛ bɔhwaah kwaa para saŋ la, ɡɛɛ waa wola kondikwaa dɔ a koma saŋ ɡe.

⁵ Waa aa lɔ nɛn liire bini do kɛŋɔ bule waa luŋa bini nee ken, naate waa dɔ wejema laanee won nee la dɔe.

⁶ Nɛra ɡalɡa dɛ bol ŋɔ ba dɔ nyina saŋ bɛlbwa, kɛ umee dɛ́ won jemɛ nɛn o wa aa dɔ kasinteŋ ɔ?

⁷ Nɛn o wa aa toɡra o bwara aa wola wechɔɡe bɛlbwa dɔe la, o seo habɔɔ, o bii dɛ na som.

⁸ Kooro soɡe o kookara ta dɛ́ bol waa dɛ́ pa bole aa, o dɛ na anɔ la aa wola were.

⁹ Umee dɛ́ won ŋɔ, “N te tea bini too, wechɔɡa toole n nɛ kwaraa nɔ?”

¹⁰ Korowii kii nɛn waa dɛ faah nɛra kwaa yoɡa ta, ne kon baa kpɔa dɛɛ maɡɛ kwaa o faah la.

¹¹ Bechala we-ɛɛla taa ba che dɛɛ jemɛ kɛ o ɛ bechadɛɛɡe.

¹² Deŋna nɛn aa kpɔa dɛɛ no waa nɔ, ne sibie waa dɛ na a ne nɔ, Korowiirii ta a bwa.

¹³ Dom dɛ do he som kohona naa, nyae hɛɛ nya, he iro dɛɛ ɛ toma aa, kondikwaa dɛɛ bu he nɛ.

¹⁴ He yon ŋɔ kon yoɡ aa were, dɛ berɛ kaa maŋkura he te o yawa ta.

¹⁵ Dɛ he jemɛ waa haa dɛ bol aa, he dɔ kon ɡwaa suuɡaswɛm ne suuɡapoŋ.

¹⁶ Nomɛl di hɔɔh ajinamuu he be naa, lɛ o yal cheɡ, dɛ naate ta he bini bɛl ɛɛ yaa, lɛ o komɛl cheɡ awɔba.

¹⁷ He kpɔ neɡra ŋwɛnɛ lɛ kwaa di aa, a som, kɛ a habɔɔ la, a dɛ do kpeli he nyoa bini.

¹⁸ Wobɛlbwa haa maɡla la, ɡel ba jae mɔɔ he ɛ. Nyin ŋwɛnɛdɛɛɡe mɔɔ dɛ vɔrɔwe laa.

¹⁹ Nɛn waa dɛ ɡaaɡe la dɛ taa nyokpɛl, anomanta, laa he te kpɔ nɛn waa dɛ bol waa kohona nɛ.

²⁰ He taah he nya kɛɛ he mɛɛ aa, he piɡro dɛɛ sewɛ kɛŋɔ kandea aa dima biro ta la.

²¹ Dɛ he ta koɛh dɛ dɔ he te mumpar aa, a habɔɔ la, aa hen kɛrɛdɛ chiɡ.

²² Bɛ wechɔɡa kpɔ bɔ wechɔɡa kem, dɛɛ hwɛɡɛ Korowii nɛɛ o ɛ wobɛlbwa tɛɛ.

²³ Korowii kii nɛn waa dɛ faah nɛra kwaa yoɡa ta, ne onɔ la baa kpɔa dɛɛ maɡɛ kwaa dɛɛ faah nɛn.

²⁴ Korowiirii kpɔ ya nakpale ɛɛ cheɡ bela waa wera, ɛrɛɛ nɛn ɛɛ ba wona jemɛ o vala bini nɔ?

²⁵ He toolo baɡɛ Korowii nyoa aa, a ɛ bel dɛ chɔ kpae, a habɔɔ a ba ɛ waa dawɛ he nɛ.

²⁶ Kooro waa jemɛ waa laanee yon na nɛnchɔɡe, dɛ yon tɛr o deŋne waa wola o sum na.

²⁷ Korowii hweera waa hweera do nɛn bini la, do kɛ kandea dɛɛ chaah waa aa lɔ ya liire bini.

²⁸ Nyina ne kasinteŋ ɡelɔ Kooro ɛɛ biɡri, nyina taa a che o kora ɛɛ che.

²⁹ Bonɔɔ bokpeɡaa ɡela o dɔ jirima, ɡɛɛ nyumpompoŋa ɡel banjeni ɛɛ dɔ duure.

³⁰ Deŋnetɛra kohona won wechɔɡa laa dɛ́ kpɔ nɛn bambile ta.