Sɛɡla 2 - mzwDBL

Tɔnɔ aa lɔ wejema ta

¹ N bie, dɛ he no waa maa bola dɛɛ baɡle, dɛɛ do liire n waa ta,

² dɛ cheɡ deŋne wejemwaa ta, dɛ sɔɔh bwara dɛɛ no n waa mun,

³ dɛ he soŋe Korowii wejema, dɛɛ no waa a mun noe aa kpeɡa mun,

⁴ dɛ he siwi beɡrɔ, hɛɛ nyina kɛŋɔ suuɡapoŋ, kɛɛ kondɔɔh ane aa sɔh bobɛl aa,

⁵ a taa hɛɛ ba cheɡa dɛ́ jemɛ Korowii ɔma mun, dɛ́ berɛ jemɔ kɛrɛdɛ.

⁶ Korowii bee wejema le, onee dɛɛ tɛ wejema ne waa mun noe.

⁷ Onee dɛɛ cha nɛn o wa aa toɡra, dɛɛ tɔ nɛn o ŋwɛnɛre aa wera ɡbemɡbe.

⁸ Korowii kpɔ nɔn dɛɛ tɔ nɛra baa dɛ ɛ ba bala kɛrɛdɛ nɛ, dɛɛ nyiŋi banɔ la baa ta ba te tɛo nɛ.

⁹ Dɛ he no n be naa, hɛɛ jemɛ waa aa ɛ kasinteŋ dɛ do wer, ne anɔ la aa toɡra. Dɛ́ berɛ jemɛ waa aa chɛ kɛŋɔ hé ɛ.

¹⁰ He sie ɛɛ piluu, ásɛ he wejema ɡel he sie lɛ.

¹¹ He waa mun noe ne he wejema ɛɛ nyiŋi he nɛɛ,

¹² ásɛ dɛɛ lee waa aa wola were ta. Aa kee le nɛra baa wola kasinteŋ bol dɛɛ ba waa ne nɛ,

¹³ nɛra baa vɛh wedɛɛɡa ŋwɛnɛ, dɛ kaa kpɔ wechɔɡa ŋwɛnɛ aa ɛ biro ta wa,

¹⁴ nɛra ba sie aa dɛ lɛ wechɔɡa ɛɛ ta, ne banɔ la ba sie aa dɛ lɛ waa aa wola mun dɔe ta.

¹⁵ Ba ɛ nɛra ba wa aa wola sie chɔ, dɛ ɛ nɛra baa wola ba nɛɛ hwɛɡɛ. Ba waa bwaa kɛ baa neɡre nɛra.

¹⁶ Wejemaa dɛ won lɛɛ le hanjwamane nɔn ta, haah waa kpɔ wobosoma kaa he ne wechɔɡa ta.

¹⁷ Haah waa le o sɛnojaa habɔɔ, dɛ chɔɡ fɔo o ne o jaa fa aa fɔwa Korowii sie la,

¹⁸ ɡɛ haah la dem ŋwɛnɛ kaa seo ta, o chɔɔ kaa lalabwɛ.

¹⁹ Nomɛlbwa waa dɛ la o be aa berɛ dɛɛ ba kpa. Naate aa mkpa ŋwɛnɛ ta chiɡ kpa.

²⁰ Anomanta, teŋɛ nɛndɛɛɡe luɡe ta, ásɛ dɛ so kɛ nɛn o wa aa toɡra.

²¹ Nɛra ba wa aa toɡraa dɛɛ ba harɛ nɔ ta soɡa. Banɔ la wechɔɡa aa wola toole ba nɛɛ dɛɛ ba o ta kae.

²² Korowii ɛɛ teŋe nɛnchɔɡaa le harɛ nɔ ta, wɛɛ chuɡri wechɔɡ-ɛɛraa le o ta kɛŋɔ kpɔɡa kɛɛ daa ken.