Sɛɡla 19 - mzwDBL

¹ Nyaa o bwara aa wola wechɔɡe bɛlbwa dɔe la, ɡwaa nyosonteŋni waa ɡɛna.

² Aa were kɛŋɔ nɛn nya wejema, ɡɛɛ dɛ haa waa bini nyiŋi dɛɛ ɛa warawara ɡe aa, hɛɛ ɛ wechɔɡa.

³ Nɛŋɡɛnee dɛɛ chɔɡ o te, kɛ o yon berɛ kpɔ nya Korowii nɛ.

⁴ Dɔɔh daamanaree dɛɛ warɛ, nyaa daamanaree yon chwao.

⁵ He di dansewea aa, he dɛ dɔ deŋnetɛra, ɡɛɛ nyosonteŋni ɡe aa wola o bwara kpɔe kaa di.

⁶ Nɛra ɡalɡa takapɔ kɛŋɔ ba waa ɛɛ lɛ nɛnjen sie, ɡɛɛ nomɛlbwa ɡe ɛ nɛn waa dɛ kɛ kwaa dam.

⁷ He nyao waa, he lolanar dɛ́ vɛɛh, n baa bol he daamanar wa. He dɔ waa dɛɛ nyin ba bɔr aa, haa ban na.

⁸ Nomɛlbwa waa dɔ wejema la, dɔ nyina tɛ o ɡbaɡba, ɡɛɛ nɛn waa dɛ no waa mun la, o wobɛlbwa ɛɛ do wer.

⁹ Dansewea te dɛ́ dɔ deŋnetɛra, ɡɛɛ nyosonteŋni ɡe ɛɛ sewɛ.

¹⁰ Yɛɛra ta ɡɛne chɛɛ, ɡɛɛ yom ɡe aa wola chɛɛ kɛ nomonjena do o lɔɡa.

¹¹ Wejeremee won bambile lawa, o dɛ dɔ jirima waa kpɔe dɛ́ kɛ ta.

¹² Kooro bandia do kɛŋɔ nyujente aa sia ken, asɛ o silɛɛ ɡe do kɛŋɔ mɛn aa ta kpɔɡa ta ken.

¹³ Bibaa waa ɡɛna dɛ́ tɛ o mɛɛ wa, asɛ hannaɡrenyini we-ɛɛla do kɛŋɔ nee aa dɛ kor la ken.

¹⁴ Dem ne suuɡaa baa ne o haah sewɛ dɛɛ ɡel o bii, kɛ handɛɛɡe te, Korowiirii dɛɛ tɛ.

¹⁵ Bɔhwaahree dɛɛ chɔ dom kohona, ɡɛɛ nɛn waa wola waane ɛɛ nyin la ɡe ɛɛ chɔ lɔr.

¹⁶ Nɛn waa dɛ teŋɛ Korowii Mmara ta la, o dɛ dɔ o nyu, nɛn waa wola a ta teŋɛ la, ó dɛ sewɛ.

¹⁷ Nɛn waa dɛ ɛ nyaa kɛrɛdɛ la, Korowiirii o kpɔ dɛɛ kemɛ, waa waa ɛa la, o dɛ tɛo a nachiɡe.

¹⁸ Kah he bii, ba nɛɛ he dɔ hwɛɡa kerekere, dɛ ɡɛ laa aa, hɛɛ ɡeloo ba chɔɡ.

¹⁹ Nɛn o baah aa dɛ di kohona dɔ wa aa, bɛ on lɛ, ɡel a noo, ɡɛ laa aa hɛɛ teŋɔɔ dɛɛ lɛo.

²⁰ Ba dɛ jae naa dɛɛ no, dɛɛ teŋɛ a ta, ásɛ tɔpebɛl he ba dɔ wejema.

²¹ Nɛn won waa maɡla kohona, kɛ anɔ la Korowii aa dɛ nyin laanee dɛɛ ɛ.

²² Kɛrɛdɛ nɛn aa dɛ ɛ waa ba teŋɛ dɛɛ nyin o wa, nɛn nyao bɔ kɛŋɔ waa dɛ teŋe nyosone.

²³ Korowii ɔmaa dɛɛ ba mkpa ne, anee ɡela nɛn liire ɛɛ chɔ bobeŋkpoŋ o bwara ɛɛ sɔɔhno.

²⁴ Nɛra bane bɔhwaah ɡwaa ba nɛɛ kɛ, bá won kpɔ kondikwaa kwaraa la nyoa.

²⁵ Bammuɡli nɛn dɔ deŋnetɛra aa, nɛra baa wola wobɛlbwa jemɛ hweli waa dɛɛ le a ta, ɡɛɛ ba baɡle wejereme waa, wɛɛ jemɛ wa.

²⁶ Bechala waa dɛ fiiɡi o mɛɛ, dɛ doŋi o nya dɛɛ le dem la, o ɛ sihihbie.

²⁷ N bie, he dɛ vɛh waa baa dɛ doe a ta hwela aa, hɛɛ le wejema ŋwɛnɛ taa.

²⁸ Dansewea tee kpɔ o dɔŋ kasinteŋ waa dɛɛ hɛlɛ, ɡɛɛ wechɔɡa ɛɛ do wechɔɡ-ɛɛ som kɛ kondikwa.

²⁹ Deŋnetɛra chɔ le kpa bammuɡli nɛn, ɡɛɛ lɔɔra ɡe do le tɛ ɡɛne.