Sɛɡla 18 - mzwDBL

¹ Nɛn waa wola nɛra baah jo la waane laa nomɛlbwa wa, o dɛ lɛ ɡaeh, waa nɛn waa lɛɛ dɛɛ do.

² Gɛne waane laa waa mun noe, o waa bwaa kɛŋɔ o ɡe baɡle o wejema.

³ Nyubinikpeɡii dɛɛ ba nɛn bɛ bua ne, sihiih ɡe ɛɛ ba ncho dii ne.

⁴ Nɛn nyoa wobol do kɛŋɔ nee waa luŋa ken, wejema leebɔr do kɛŋɔ nee waa dɛ palɛ.

⁵ Aa were kɛŋɔ bá nyiŋi nɛnchɔɡe siebɔr, dɛ́ kpɔ bolchɔɡe tɛ nɛn waa wola bolchɔɡe dii.

⁶ Gɛne wobol dɛ ba naɡra ne, o nyoa wobolee ɡela baa lɔɔro.

⁷ Gɛne wobolee dɛɛ chɔɡo, o nyoa dɛɛ doo waa ta.

⁸ Nɛn ŋwala som, a do kɛŋɔ kondikonsoma aa dɛ jo tea.

⁹ Bɔhwaah aa toma ɛɛ nyin, o dɔŋee nɛn waa dɛ chɔɡ kwa.

¹⁰ Korowii do kɛŋɔ dejaŋ waa kpeɡa, belaa nɛra ba wa aa toɡra bwa chwa dɛɛ kaa wɛɛ lɛɛ ba.

¹¹ Kondɔɔhna dɛ lii kɛŋɔ ba kondɔɔh do kɛ bwɛjen baa ma danjwɛkpeɡ baro, ba dɛ lii kɛŋɔ o ɛ kon waa dɛ ba wona lɛɛ ba.

¹² Maŋkurae nɛn aa dɛ maŋkura o te laanee dɛɛ ba o harɛ lɔe ne, pwɛra waa dɛ pwɛr o te ɡe ɛɛ tɛo jirima.

¹³ A ɛ ɡɛnewaa dɛ dɔ sihiih kɛŋɔ haa wola waa mun noɛ dɛɛ chaŋe.

¹⁴ Liire haa dɔ he weela ta kɛŋɔ hɛɛ ɡbaŋroo la, dɛ ɛ ɡɛ, dɛ he ta ɡɛ liire dɔe yaa, dɛ hwɛɡa toole.

¹⁵ Wejerema dɔ liire kɛŋɔ baa dɛɛ hweli waa, baa cheɡ deŋnee dɛɛ no wa.

¹⁶ Koŋkɛɛla pili ŋwɛnɛ dɛɛ tɛ nɛn, a ɡelɔ wɛɛ jo nomonome bini.

¹⁷ Suune anɛ ta sie yaa, haa nyosom te jemɛ. Nɛn tɔ sie bɔ on koro aa, nɛra dɛ lii kɛ o waa toɡrɔ. Nemenɛ o dɔŋ baa baɡle o waa bini mɔɔ.

¹⁸ Waa lɔ nɛra banɛ ba waa aa kpeɡa baah ta naa, Korowii siee ba kpɔ dɛɛ bil wɛɛ baɡle a kasinteŋ.

¹⁹ A kpeɡri kɛŋɔ he won kwaa he ne he dam haa ɛo wechɔɡa baah, ɡwaa kɛŋɔ haa paɡre danjwɛkpeɡ baa maa bar bwɛjen. Naɡra do kɛŋɔ bune baa kpɔa kaɡre bwɛjen doonyoa la.

²⁰ He bol wedɛɛɡaa, he dɛ vaɡɛ kɛŋɔ haa di kondikondɛɛɡa ken, wobol aa wera ɡelɔ he baah ɛɛ sɔɔhne.

²¹ Nyoa wobol dɛ ba seo ne mkpa ne. Anomanta, nyiŋi he nyoa wobol bini kɛrɛdɛ, dɛ bɛ waa dɔ.

²² He dɔ haah naa, dɛ he dɔ kondɛɛɡe, a dɛ baɡle kɛ Korowii chae.

²³ Nyaa dɛ bol wa aa, o kpɔ nɔɔra dawɛ dɔŋa nɛɛ dɛɛ soŋe, kondɔɔhnee dɛɛ chaŋe waa kpeɡri nɛ.

²⁴ Chamene tena kpɔe kohona dɛ chɔɡe, kɛ damsom bɛl ɡwaa lole.