Sɛɡla 17 - mzwDBL

¹ Kondikonchwee bosɔɔhna aa lɔ a ta, ɡwaa kondikondɛɛɡa naɡra aa lɔ a ta.

² Yom waa jemɛ waa la, dɛ nyiŋi o dɔɔ bie o wa aa wola kɛrɛdɛ doe nɛ, o dɛ dɔ kapɛrɛ kwaa aa ɛ bii la kwaa la ane.

³ Niinii ba kpɔ dɛɛ jemɛ suuɡapoŋ ne suuɡaswɛm kɛŋɔ a wer, ɡɛɛ Korowii ɡe ɛɛ nyiŋi bambile bini.

⁴ Nɛnchɔɡee dɛɛ do deŋna wobochɔɡa ta, ɡɛɛ nyosonteŋni ɡe cheɡ deŋne dɛɛ no musuwa.

⁵ He dɛ mamɛ nyaaraa, Korowii waa ta baa hɛɛ chɛɡɛ, ɡɛɛ a do dɛ he sie dɛ lɛ he dɔŋ wahala ta naa, hɛɛ ba deŋnetɛra kohona dɔe.

⁶ Banjeni ne hanjeni jirimaa ba naanar, ɡɛɛ nya ne mɛɛ ɡe jirima ɛ ba bii.

⁷ Mbarafo wobol aa were tɛ ɡɛne, ɡɛɛ a ta chɛ kɛ kooro teŋe nyosone.

⁸ Nɛn waa dɛ yawɛ nomɛl sen la, dɛ lii kɛŋɔ a ɛ ŋwɛnɛ bɛl waa kpɔ o ta dɛ vɔrɔwo. O dɛ lii kɛ ɡɛɛ dɛ́ ɡel o wobɛlbwa do wer tɛo.

⁹ Nɛn waa laa sie dɛɛ kpɔ waa o dɔŋ aa ɛo ta la dɔ nyina. A kpoŋa dɛɛ bol te dɛ peɡri darame.

¹⁰ Nɛn waa jemɛ wa dɛ́ hweli waa dɛɛ le webeŋkpoŋ haa bol baɡlo ta la, ɡwaa ɡɛne baa chao chweema kera lafa.

¹¹ Nɛnchɔɡe waa dɛ nyin deŋnekpeɡ we-ɛɛla ɡbo la nɛn waa wola nɛn sum naa baa tomɛ o be.

¹² He cheme sisire baa pa o bii kaa bɔ ɡɛne waa lɔ o ɡɛne we-ɛɛla ta.

¹³ He kpɔ wechɔɡa dɛɛ bɔ wedɛɛɡa kem aa, wechɔɡa aa he demii paŋɛ bwa.

¹⁴ Naɡra mumpar do kɛŋɔ haa teɡɛ nee bio, waa la aa wola dɔe do kan la, teŋe a ta mɔɔ a kaa sie.

¹⁵ Korowii hah nɛn waa dɛ pa nɛn waa wola wechɔɡa ɛɛ bolchɔɡe, dɛ hah nɛn waa pa nɛn waa ɛ wechɔɡa boldɛɛɡe ɡe.

¹⁶ Tɔnɔ besoo a dɔ kɛŋɔ ɡɛne kpoŋe suuɡa dɛɛ nyin wejema dɛ o ta a liire dɔe yɔ?

¹⁷ Darame dɛ baɡle nyina saŋ bɛlbwa, asɛ lolanar ɡe do le tɛ dɔŋa chae waa ta.

¹⁸ Gɛnee di ajinamuu dɛɛ tɛ nomɛlbwa.

¹⁹ Nomɛlbwa waa dɛ nyin naɡra sie dɛ lɛ wechɔɡa ta, ɡɛɛ nɛn waa dɛ ta nyoa ɛɛ kaa chɔɡa ta.

²⁰ Nɛnchɔɡe waa kpɔ waa dɛɛ perɛ, aa andɛɛɡa dɔ, ɡɛɛ nɛn o nyondoŋe aa bar o nyu la ɛɛ na wa.

²¹ Biɡɛne lola dɛ we, silɛɛ toole tɛ o mɛɛ.

²² Silɛɛ dɛɛ tɛ bokpeɡa, asɛ lokua ɡee sɔɔh nɛn.

²³ Nɛnchɔɡee ba sɔh dɛɛ yawɛ sen, asɛ wɛɛ berɛ waa sie.

²⁴ Wejereme sie lɔ wejema ta saŋ bɛlbwa, ɡɛnee wola wobɛlbwa dɔe dawɛ o sie ta.

²⁵ Biɡɛnee wola ɡelɛ o mɛɛ sie ɛɛ lɛ, onee ɡela o nya tea bini ɛɛ chɔɡ.

²⁶ A ta maɡrɛ kɛŋɔ nɛn ɛ kɛrɛdɛ ba tɛr o deŋne, kɛɛ dɛ lɔɔ nomonome baa dɛ di kasinteŋ.

²⁷ Wejereme wobol lɔ tamaa ken, nɛn waa dɛ no waa mun la jemɛ o te lawa.

²⁸ Hale ɡɛne tɔ o nyoa so naa, ba dɛ liiru wejereme.