Sɛɡla 16 - mzwDBL

¹ Nɛwɛnyinii dɛɛ maɡle wa, asɛ Korowii ɛɛ baɡle ɡɛ haa bola a do wer.

² Nɛwɛnyini dɛ lii kɛŋɔ o we-ɛɛla wer o be, kɛ Korowiirii dɛɛ nyiŋi a bini.

³ Kpɔ he wobɛlbwa haa ɛ la do Korowii nɔn ta, ásɛ wobɛlbwa haa maɡla la do wer tɛɛ.

⁴ Wobɛlbwa Korowii aa ɛ la, dɛ waane waa dɛ nyin waa o ɛa. O ɡelɔ wechɔɡ-ɛɛra ɛɛ so le, ka tel saŋ baa dɔ deŋnetɛra.

⁵ Korowii hah nɛn waa dɛ ɛ mbarafo, kpelaa, naate ɛɛ di bolchɔɡee dɛ́ dɔ deŋnetɛra.

⁶ Nyina ne kasinteŋ taa wechɔɡa kpɔe dɛ kɛ do. Korowii ɔma ɡe taa nɛn che dɛɛ ke wechɔɡa.

⁷ Dɛ nɛn waa dɛ su Korowii siwi aa, o ɡelɔ deŋnesɔɔhna ɛɛ ba o ne o dɔma kwaraa baah ta.

⁸ Ŋwɛnɛdɛɛɡe ta cheɡa dɔ kontama wer, ɡwaa kɛŋɔ haa kpɔ ŋwɛnɛchɔɡe ta, dɛ dɔa kohona.

⁹ Nɛn nyubini liire nee wɛɛ maɡle wa, kɛ Korowiirii dɛɛ baɡle waa waa ɛ.

¹⁰ Kooro nyoa wobol do kɛŋɔ Korowii waa ken, waa bole pae ta koni.

¹¹ Korowii dɛ nyin kasinteŋ bona dii waa ta, a waa o ɡel kwaa baa kpɔa dɛɛ kari kwaa do le.

¹² Kooro bɛlbwa kii wechɔɡa, waa aa toɡraa ɡela kora ɛɛ che.

¹³ Koranar siwi dɛ́ su nɛn waa dɛ bol kasinteŋ, ba dɛ nyin nɛn waa dɛ bol kpela.

¹⁴ Kooro baah diu waa, wɛɛ won ɡel ba kpoe, wejeremee jemɛ o larawa.

¹⁵ Kooro sie lɛo waa, a dɛ ba mkpa ne, a do kɛŋɔ sitɔ bwaala baama ken, a nɛo waa, kwaa dɛ do wer.

¹⁶ A wer kɛŋɔ haa dɔ wejema ne waa mun noe, dɛ ɡwaa kɛŋɔ haa dɔ suuɡaswɛm ne suuɡapoŋa!

¹⁷ Nɛn o wa aa toɡra la dɛ ke wechɔɡa o vala bini, nomɛlbwa waa dɛ nyiŋi o vala bini la, dɛ dɔ o nyu.

¹⁸ Mbarafo dɛ ba chɔɡa ne, asɛ maŋkurae ɡe ɛɛ ba harɛ lɔe ne.

¹⁹ He pwɛre he te dɛ nya bɔ ɡwaa kɛŋɔ he ne mbarafo tena aa bɔne laa ta kwa.

²⁰ Nomɛlbwa waa cheɡ deŋne dɛɛ no waa la, dɛ́ dɔ kɛrɛdɛ, nomɛlbwa waa dɛ hwɛɡɛ Korowii nɛɛ la, o na som.

²¹ Nɛn o liire aa wera dɛ dɔ wejema laanee ba ŋɔ o dɛ no waa mun. O wobosoma taa a che nɛra sɛh dɛɛ ba o be.

²² Wejema do kɛ bule dɛɛ tɛ wejereme mkpa, asɛ ɡɛne ɡe deŋnetɛra ɛɛ leo o ɡɛnewaa ta.

²³ Wejeremee lii waa mɔɔ dɛɛ bol, o wobol ɡelɔ nɛra sɛh dɛɛ ba o be.

²⁴ Wobodɛɛɡa do kɛŋɔ tohnoo ken, a som nyoa ta dɛɛ tɛ bokpeɡa ɡe.

²⁵ Nɛwɛnyini dɛ lii kɛŋɔ o soɡa waa soɡa la ken wer, kɛ dɛ aa were, o ka tona la ɛ seo.

²⁶ Teabɔɔ ɡela nɛn ɛɛ ɛ toma, onee dɛɛ doo a ta.

²⁷ Nɛnchɔɡee dɛɛ vɔrɔwe wechɔɡa, o wobol do kɛŋɔ ninlao ken.

²⁸ Nɛnchɔɡee kpɔ waa dɛɛ perɛ, onee dɛɛ ba waa ne, dɛɛ peɡri daamanar baah.

²⁹ Nɛn waa dɛ nyin yoi la dɛ faah o dɔŋ, o kpɔ o dɔŋ la dɛɛ kpɔ ŋwɛnɛchɔɡe ta.

³⁰ Nɛn waa laa sie dɛɛ kpɔ waa ta la dɛ lii wechɔɡa, o dɛ tɔ nyoa nyiŋi wechɔɡa chiɡ.

³¹ Nyumpompoŋa ɛ jirima botire, nɛn o wa aa toɡra laanee dɛɛ dɔa.

³² Bambile dɔe wer ɡwaa banyoo tenten, he jemɛ he te lawa aa, a ɡwaa kɛŋɔ haa yoa lɛ bwɛbir.

³³ Nɛra dɛ ta bie dɛɛ nyin liire a ta, kɛ Korowiirii jemɛ ɡɛ aa chiɡ.