Sɛɡla 15 - mzwDBL

¹ Tahaah dɛ sɔɔh bandia, takpeɡ ɡe ɛɛ ir bwaawee.

² Wejereme wobol ɡelɔ wejema ɛɛ dɔ pɛla, ɡɛne ɡee dɛɛ bol waa warawara, wejema aa wola toole a ta.

³ Korowii dɛ na bobɛlbwa, o dɛ nyiŋi wechɔɡ-ɛɛra ne wedɛɡ-ɛɛra bwa.

⁴ Wobodɛɛɡa do kɛŋɔ tɛɛɡa ken, neɡra wobolee dɛɛ ku loo.

⁵ Gɛnee dɛɛ vɛh o mɛɛ wa, kɛ nɛn baa dɛ jao wɛɛ no la, dɛ jemɛ wa.

⁶ Nɛn o wa aa toɡraa dɛɛ dɔ kondɔɔh o dem, kɛ nɛnchɔɡa kwaa dɔe dɛ tɛɛ ba wa.

⁷ Wejerema wobol dɛ tɛ wejema, Gɛne wobolee wola won wobɛlbwa tɛ.

⁸ Korowii kii nɛnchɔɡa saraha, o dɛ no nɛra ba wa aa toɡra wesoŋa.

⁹ Korowii hah nɛnchɔɡa we-ɛɛla, O dɛ nyin nɛra baa dɛ teŋɛ waa aa toɡra ta.

¹⁰ He laa sie kpɔ wedɛɛɡa ta naa, he dɛ dɔ deŋnetɛra kohona, he kii kɛ ba bol waa baɡle naa, sewee hɛɛ dɔ.

¹¹ Korowii dɛ na lalbɔɔ ne lalabwɛɛ waa bwa, a ta do kɛŋɔ nɛwɛnyini bambile bini.

¹² Nɛn waa dɛ muɡli nɛra baah la, aa nɛn waa jao la waa nyin, waa nɛn waa jemɛ waa la be la.

¹³ Nɛn sie lɛo waa, o dɛ mamɛ, o loo kuu tenaa, o bambile dɛ chɔɡ.

¹⁴ Nɛra baa dɔ liire la pɛlaa dɛɛ lawɛ kɛŋɔ ba hweli waa dɛɛ ja, ɡɛnee dɛɛ do sie ɡɛnewaa ta.

¹⁵ Nɛra baa lɔ wahala ta la soɡa bini aa were, kɛ nɛra ba sie aa dɛ lɛ la, do kɛŋɔ baa dɛ di kondikonjena saŋ bɛlbwa ken.

¹⁶ He dɛ ɔmɛ Korowii dɛ dɔ kwaa tama, bɔ kɛŋɔ haa dɔ kwaa kohona dɛɛ dɔ wa.

¹⁷ He di dɔkpɔɡa dɔr komɛlbwa aa wola toole a ta bela baa dɛ nyini, bɔ kɛŋɔ haa di nao waa do noo dɔr bela baa haeh.

¹⁸ Nɛn o baah aa dɛ di warane la dɛ ba naɡra ne, kɛ nɛn waa dɔ bambile te dɛ sɔɔh waa nyoa.

¹⁹ Bɔhwaah soɡa bini do kɛŋɔ, waa dɛ valɛ sɔɔhne ta, kɛ he waa toɡraa, he ŋwɛnɛ wer.

²⁰ Bechawejereme ɡelɔ o mɛɛ baŋa ɛɛ pa, kɛ biɡɛne te hah o nya, dɛɛ nyiŋi o nyubaah.

²¹ Nɛn waa wola liire dɔe la, ɡɛnewaa dɛ lɛ o sie, kɛ nɛn waa dɔ liire la waa toɡrɔ.

²² He maɡle waa dɛ he ta jajaa dɔe yaa, a dɛ chɔɡ, kɛ dɛ he dɔ jajaala waraa, a dɛ do wer.

²³ He chaŋe waa aŋwɛnɛ ta naa, a dɛ ba silɛɛ ne dɛɛ tɛɛ. Waa bola a saŋ ta wer ɡa.

²⁴ Wejereme bɛlbwa dɛ kpɔ mkpa ŋwɛnɛ ta, dɛ laa o te dɛɛ kpɔ waa aa ba seo ne.

²⁵ Nɛn waa dɛ ɛ mbarafo la, Korowii dɛ chɔɡ o dem, dɛ kpɔ nɔn dɛɛ tɔ luhaahna kwaa ta.

²⁶ Korowii kii nɛnchɔɡa liire, nɛndɛɛɡa liiree dɛɛ lɛ o sie.

²⁷ Nɛn waa dɛ nyin kafo la kpɔ waa dɛɛ ba o ne dem tena nɛ, kɛ nɛn waa kia kɛ ba yawɔ sen la ɛɛ so lee.

²⁸ Nɛn o wa aa toɡraa yon dɔ haŋra waa ta mɔɔ dɛɛ chaŋe, kɛ nɛnchɔɡee yon too wobochɔɡa ɛɛ le o nyoa.

²⁹ Korowii ne wechɔɡ-ɛɛ baah jaŋne, o dɛ no nɛn o wa aa toɡra wesoŋa.

³⁰ Dɔŋa be mama dɛ́ ba silɛɛ ne, asɛ amanesoma ɡe ɛɛ ba bokpeɡa ne.

³¹ Nomɛlbwa waa dɛ no jae aa dɛ ba mkpa ne la, o ne wejeremaa dɛɛ pɛ.

³² Nomɛlbwa waa wola jae no la ta o nyu, kɛ nɛn waa dɛ no jae la, o dɛ no waa mun.

³³ Nɛn waa dɛ ɔmɛ Korowii la dɛ jemɛ wa, he ta he te pwɛraa, haa jirima dɔ.