Sɛɡla 14 - mzwDBL

¹ Hanwejeremee dɛɛ vɔwɛ dea, kɛ hanɡɛnee yon dɛɛ paɡre dea.

² Nɛn o wa aa toɡra laanee dɛɛ ɔmɛ Korowii, kɛ nɛn waa dɛ neɡre nɛraa wola Korowii kpɔe dɛɛ ɛ wobɛlbwa.

³ Gɛne mbarafo wobol taa a che wɛɛ dɔ deŋnetɛra, asɛ wejereme wobol ɡe ɛɛ leo waa ta.

⁴ Bela baa kpɔ nae dɛɛ parɛ la, dɛ nae toole naa, kondikwa aa le do. Kɛ nae lɔ bela tenaa, kondikwaa dɛ bu.

⁵ Nɛn waa dɔ kasinteŋ la aa nyosone teŋe, nɛn waa dɛ di dansewea la, nyosone ɡboo o bwa.

⁶ Nɛn waa dɛ mamɛ wejemwaa la aa waa jemɛ, kɛ nɛn waa dɛ no waa mun te, dɛ́ jemɛ waa warane.

⁷ Laa he te kpɔ ɡɛne nɛ, waa won baɡle wobɛlbwa.

⁸ Wejereme jemɛ waa aa wera kɛ o ɛ. Gɛnee yon dɛɛ neɡre o nyu kɛ o jemɔ.

⁹ Gɛna waane laa wechɔɡa baa ɛ wa, nɛra ba wa aa toɡraa yon dɛɛ soŋe ba wechɔɡa.

¹⁰ Nomɛlbwa toole dɛ jemɛ waa aa dɛ ha o dɔŋ, kɛɛ ɡɛ o silɛɛ aa doa.

¹¹ Nɛnchɔɡe dem dɛ chole, kɛ nɛn o wa aa toɡra dem te dɛ che le.

¹² Nɛwɛnyini dɛ lii kɛŋɔ o soɡa waa soɡa la ken wer, kɛ dɛ aa were, o ka tona la ɛ seo.

¹³ Mama bɛl ɡelɔ tebinichɔɡ ɛɛ le nɛn nɛ, asɛ silɛɛ bɛl habɔɔ ɡe ɛɛ berɛ wii.

¹⁴ Nɛn waa ɡel wedɛɛɡa ɛɛ dɛ́ dɔ deŋnetɛra, nɛndɛɛɡa ɡe ɛɛ dɔ ba we-ɛɛla kembɔr.

¹⁵ Gɛnee yon dɛɛ yarada wobɛlbwa waa dɛ no, kɛ wejereme te dɛ́ nyiŋi o vala bini.

¹⁶ Wejereme dɛ nyiŋi kɛrɛdɛ o soɡa bini kɛ o bɛ waa dɔ. Gɛnee dɛɛ ɛ waa saɡasaɡa, o baah ɛɛ di warawara.

¹⁷ Nɛn o baah aa wola biɡri dii dɛ́ ɛ ɡɛnewa, wejeremee dɛɛ lawɛ bambile.

¹⁸ Nɛn ta wejema dɔe yaa, a ɡelɔ wɛɛ ɡɛn kohona, kɛ nɛn waa jemɛ waa te ne wejemaa.

¹⁹ Wechɔɡ-ɛɛra ɛɛ ba ɡuŋi nɛndɛɛɡa baa dɛ ɔmɛ Korowii siee.

²⁰ Nyaa dɔŋ kwaraa laa sie dɛɛ kpɔ o nɛ, suuɡatee dɔ chamene tena warɛ.

²¹ Nɛn waa dɛ na nyaara sum la, o na som, kɛ a ɛ wechɔɡa kɛŋɔ he hah he dɔŋ, dɛɛ nyiŋi o nyubaah.

²² He dɛ lii liichɔɡa aa, dɛ he kono, kɛ he dɔ liidɛɛɡa aa, nɛra dɛ yaradae, dɛɛ tɛɛ duure ɡe.

²³ Koeh habɔɔ tɔnɔ do, kɛ nyoa wobol te, pɛɛpɛɛ dea aa la.

²⁴ Wejereme kondɔɔh o wejema, asɛ ɡɛne ɡe we-ɛɛla ɡel baa jemɔ.

²⁵ Kasinteŋ danseɛ dii dɛ́ lɛ nɛn nyu, dansewea tee dɛɛ le nɛn habɔɔ.

²⁶ Baa waa dɛ ɔmɛ Korowii bwara dɛ sɔɔhno. Wɛɛ kpɔ nɔnee tɔ o haah ne bii nɛ.

²⁷ Korowii ɔma do kɛ bule waa dɛ tɛ mkpa, anee dɛɛ le nɛn seo ŋwɛnɛre ta.

²⁸ Nɛn nee baa di kora, nɛra toole naa, kora ɛ pɛɛpɛɛ.

²⁹ Nɛn o baah aa wola di warawara la, o dɛ no waa mun taeh, kɛ nɛn waa wola bambile dɔe la, o dɛ maŋkura o te ɡɛna ta.

³⁰ Deŋnesɔɔhna dɛ tɛ bokpeɡa, kɛ bɔweela te, ɛ weela.

³¹ He dɛ do nyaara weweele aa, he dɛ chɛɡɛ Korowii waa ta ba, kɛ he dɛ ɛɛ ba kɛrɛdɛ naa, he dɛ tɛ Korowii jirima.

³² Wechɔɡ-ɛɛ we-ɛɛlaa dɛɛ ba o chɔɡa ne, nɛn o wa aa toɡra dɔ hwɛɡa, hale seo ta.

³³ Nɛn waa dɔ liiree dɔ wejema, ɡɛnee wola wejema liire dɔe.

³⁴ Harɛ bɛl ɛɛ dɔ sɔnee yaa, dɛ a cheɡɛ toɡra o nɛra aa toɡra ta, wechɔɡaa ɛ sihiih tɛ harɛ bɛlbwa nɛra.

³⁵ Kooro bɛlbwa siwi dɛ su o bonɔɔ waa jemɛ wa. O dɛ tɛr onɔ la waa dɛ ɛ sihihwaa deŋne.