Sɛɡla 13 - mzwDBL

¹ Bechawejeremee dɛɛ no waa o mɛɛ aa dɛ doo a ta, kɛ deŋnekpeɡ te te, waa o wechɔɡa sɛh.

² He dɔ wobodɛɛɡa aa, he na som, kɛ nɛn waa wola kasinteŋ bol te, dɛ na wa.

³ He jemɛ he wobol nyiŋaa, he laa he te dɛɛ kpɔ waa ta, kɛ nɛra baa bol waa baa wola liire a ta do la, dɛ chɔɡ ba te.

⁴ Bɔhwaah bɛlbwa aa o konnyini dɔ, kɛ nɛn waa dɛ nyin toma te, o dɛ dɔ kon waa dɛ nyin.

⁵ Nɛn o wa aa toɡra aa nyosone nyin, kɛ nɛnchɔɡe wobol te, sihihwaa ne ncho ɡboo a bwa.

⁶ Nɛn wedɛɛɡa ɛɛ dɛ chao o soɡa bini, asɛ nyubinikpeɡ ɡe ɛɛ chɔɡ wechɔɡ-ɛɛra.

⁷ Nɛra bane dɛ ɛ ba te kɛ dɔɔhna, kɛ dɛ komɛlbwa toole ba be, bane ɡe ɛ ba te nyaara, kɛ dɛ dɔɔhnaa ban.

⁸ Dɔɔhnee ba lawɛ dɛɛ lɛ suuɡa, kɛ nyaa te, ba waane laa o wa.

⁹ Nɛn o wa aa toɡra soɡa bini chaahnɔ kɛŋɔ bochaah ken, kɛ nɛnchɔɡe te do kɛŋɔ kandea waa dɛ dime.

¹⁰ Waa nee jenu ɛɛ ba, wejeremee dɛɛ bɔɔ waa bini.

¹¹ Ŋwɛɛ ŋwɛnɛ waa kpɔ o ta dɛɛ dɔ kwaa la, ɡelɔ aa kaa kɛŋɔ peu ken. Bɔwɔb kweena dɛ́ dɔ kwaa ɡe ɡelɔ a che dɛɛ warɛ.

¹² He hwɛɡɛ kon ta, dɛ he ta dɔe yaa, he bambilee dɛɛ chɔɡ, kɛ he hwɛɡɛ komɛl ta dɛ dɔ aa, he sie dɛ lɛ.

¹³ He ɡelɔ wedɛɛɡa kpɔ he deŋna habɔɔ kaa laa, waa he nyin dɛɛ dawɛ he nɛ, kɛ he teŋɛ a ta naa, he bwara dɛ sɔɔhne.

¹⁴ Wejereme webaɡla do kɛ bule dɛɛ tɛ mkpa, a dɛ le nɛn seo ta.

¹⁵ Nɛn waa dɔ wejema la, dɛ́ dɔ duure, kɛ nɛn o wa aa wola kasinteŋ dɔe te, a dɛ kaa o ne wechɔɡa ta.

¹⁶ Wejereme bɛlbwa dɛ lii waa mɔɔ dɛɛ ɛa, kɛ ɡɛne te ɡelɔ baa na o ɡɛna.

¹⁷ Torome o wa aa wola kasinteŋ dɔe laanee dɛɛ ba waa ne. Kɛ onɔ la o wa aa dɔ kasinteŋ te, o dɛ ba deŋnesɔɔhna ne.

¹⁸ Nɛn waa wola jae no la dɛ nya dɛɛ di sihiih, kɛ naate waa dɛ no jae la, o dɛ dɔ nyanyini.

¹⁹ Na ɡɛ aa dɛ do som kɛ haa dɔ ɡɛ haa dɛ nyin! Nɛn waa ɡɛnaa ki o wechɔɡa ta lee.

²⁰ Kpɔ he te pɛl wejereme ásɛ dɛ jemɛ wa, kɛ nɛn o ne ɡɛne aa pɛa la, o dɛ na wahala.

²¹ Wechɔɡ-ɛɛra ne waa bobɛlbwa, kɛ nɛra ba wa aa toɡra te, wedɛɛɡaa ɛ ba kembɔr.

²² Nɛra ba wa aa toɡra naanaree dɛɛ di ba kapɛrɛre, kɛ nɛnchɔɡa te kapɛrɛre dɛ kaa nɛra ba wa aa toɡra be.

²³ Dɛ nyaa koo kondikwaa ɛo kohona naa, nɛnchɔɡa ɡelɔ aa le o nɔn ta.

²⁴ He dɛ fah he bie nyu aa, dɛ haa on nyin, kɛ dɛ he dɛ nyinu waa, he do sie dɛɛ kaoh buɡ ta.

²⁵ Nɛn o wa aa toɡra di kwaa o baah ɛɛ sɔɔhno, kɛ nɛnchɔɡe te dɛ chɔ lɔr saŋ bɛlbwa.