Sɛɡla 12 - mzwDBL

¹ Nomɛlbwa waa dɛ nyin o jemɛ waa la dɛ sɛh chɔɡre. Gɛnee wola sɛh kɛ ba baɡlo wa.

² Korowii tea dɛ to nɛndɛɛɡa nɛ, dɛɛ pa nɛra baa dɛ lii wechɔɡa bolchɔɡe.

³ Wechɔɡ-ɛɛ aa won che o we-ɛɛla ta dɛ́ lɛ o te, kɛ nɛn o wa aa toɡra te dɛ́ so le kiŋkiŋ ken.

⁴ Handɛɛɡe ɡelɔ o jaa ɛɛ dɔ jirima, kɛ haah waa kpɔ sihiih dɛɛ kpo o jaa la, do kɛŋɔ weela aa lɔ nɛn nɛ.

⁵ Nɛn o wa aa toɡra bol waa dɛɛ pa bole aŋwɛnɛ ta, kɛ nɛn o nyondoŋe aa bar o nyu te liire ɛ nyosone ɡbosoo.

⁶ Nɛnchɔɡe wobol do kɛŋɔ nɛn aa sɔah dɛɛ nyin o dɔŋ dɛ́ kpo, kɛ nɛn o wa aa toɡra wobol dɛ́ lɛ nɛra.

⁷ Wechɔɡ-ɛɛra mun ɛɛ heo kwaraa, ásɛ nɛra ba wa aa toɡra te dwee do le.

⁸ Wejeremee baa kpɛɛ, dɛɛ nyiŋi ɡɛna nyubaahna.

⁹ Dansaa waa dɔ bonɔɔ la, bɔ nɛn waa dɛ lii o te nɛnjen dɛ berɛ dɛɛ chɔ lɔr.

¹⁰ Nɛn o wa aa toɡra dɛ nyiŋi o kondɛɛra nɛɛ kɛrɛdɛ. Nɛnchɔɡaa dɛɛ ɛ nyubinikpeɡ ba kwaa nɛ.

¹¹ Paa waa swɛɛ siwi dɛɛ ɛ toma laanee, dɛɛ dɔ kondikwaa kohona. Gɛnee dɛɛ chɔɡ o te toma aa wola tɔnɔ dɔe ta.

¹² Nɛnchɔɡa pɛla waa bwaa kɛŋɔ bichɔɡwa, kɛ nɛn o wa aa toɡra te, dɛ́ che kiŋkiŋ ken.

¹³ Nɛnchɔɡe nyoa wobolee dɛɛ lawɔ, kɛ nɛn o wa aa toɡra te dɛ́ le wahala ta.

¹⁴ Nɛn kembɔr lɔ anɔ la waa bol ne o we-ɛɛle ta. Anee ɡela wɛɛ dɔ kwaa aa chɛo.

¹⁵ Gɛnee yon dɛɛ lii kɛŋɔ o wobɛlbwa wer, kɛ nɛn waa lɛ o dɔŋ waa dɛɛ ja o kwaa ta laanee wejereme.

¹⁶ Gɛne bandiaa baa na warane, kɛ nɛn waa dɔ nfɛrɛ laa liire dɛɛ kpɔ chɛɡa ta.

¹⁷ Nɛn waa dɛ di kasinteŋ laanee dɛɛ di danseɛ aa toɡra, nyosonteŋnii dɛɛ di dansewea.

¹⁸ Nɛra baa dɛ bol waa baa wola liire a ta do la, ba wobol dɛ we kɛŋɔ nii ken, wejereme wobol dɛ larawe bwara.

¹⁹ Kasinteŋ lole saŋ bɛlbwa, nyosonee dɔ jaɡa.

²⁰ Nyosone ɡboo nɛn waa dɛ lii wechɔɡa nyu bini. Nɛra baa dɛ ba deŋnesɔɔhna ne la dɔ silɛɛ.

²¹ Wechɔɡa aa nɛn o wa aa toɡra pu, kɛ nɛnchɔɡe te ne wejoree.

²² Korowii kii nyosonteŋni, o sie dɛ lɛ nɛn waa dɛ di kasinteŋ nɛ.

²³ Wejereme dɛ tɔ o wejemwaa ta, ɡɛnee dɛɛ pili o ɡɛnewaa ta dɛɛ tɛ nɛra.

²⁴ Nɛn waa dɛ ɛ toma kohonaa dɛɛ dɔ nomonome, bɔhwaahree dɛɛ do nɛn lɔɡa, baa doo tomkpeɡa ta.

²⁵ Waa liira kohona do kɛŋɔ bone ken, asɛ wobodɛɛɡa ɡe ɛɛ sɔɔh baah.

²⁶ Nɛn o wa aa toɡraa dɛɛ tɛ o dɔŋ liidɛɛɡa, nɛnchɔɡee dɛɛ neɡre o dɔŋ.

²⁷ Nɛn waa ɛ bɔhwaah la, waa o tetoo kwaa dɔ, kɛ nɛn o sie aa wola on hwah la o dɛ dɔ kwa.

²⁸ Waa aa toɡra ŋwɛnɛ chɔɔ kaa mkpa ta, wechɔɡa ŋwɛnɛ te, seo taa o kaa.