Sɛɡla 11 - mzwDBL

¹ Korowii kii nɛn waa dɛ faah nɛra kwaa yoɡa ta. O sie dɛ lɛ nɛn waa kpɔ kon waa maɡra ne kwaa maɡa nɛ.

² Mbarafo dɛ ba sihiih ne, asɛ pwɛre doe ɡe ɛɛ ba wejema ne.

³ He waa toɡrɔ aa, a ɡelɔ hɛɛ jemɛ anɔ la haa ɛ, kɛ nɛra baa wola kasinteŋ dɔe la we-ɛɛlaa dɛɛ chɔɡ ba.

⁴ Kondɔɔh ta tɔnɔ dɔe seo tɔpere, kɛ he waa toɡrɔ aa, a dɛ lee seo ta.

⁵ He waa toɡrɔ aa, dɛ he waa wer, kɛ he ɛ nɛnchɔɡe aa, he ɡbaɡba we-ɛɛla dɛ chɔɡe.

⁶ Nɛn o wa aa toɡra daa dɛɛ lɛo, asɛ nɛn waa wola kasinteŋ dɔe la ɡbaɡba pɛla waa dɛɛ lawɔ.

⁷ Nɛnchɔɡe sewaa, o hwɛɡa bwa ɛ pɛɛpɛɛ, anɔ la o sie aa dawɛ a ta bwa tonɔ.

⁸ Korowii dɛ lɛ nɛn o wa aa toɡra dɛɛ le wahala ta, a yon berɛ ba nɛnchɔɡe nɛ.

⁹ Nyoa nee nɛn waa nyiŋi nɛn sie mɔɔ dɛɛ ɛ waa ɛɛ chɔɡ o dɔŋ, kɛ nɛn o wa aa toɡra te, o wejemaa dɛɛ lɛo.

¹⁰ Nɛn o wa aa toɡra dɔ kɛrɛdɛ naa, bwɛɛ la tena bwa sie dɛ lɛ, kɛ dɛ nɛnchɔɡe baa sewaa, bɛlbwa dɛ mamɛ.

¹¹ Nɛra ba wa aa toɡra we-ɛɛla taa a che bwɛɛ ɛɛ pili, dɛ berɛ che nɛnchɔɡe wobol ta bwɛɛ ɛɛ paɡre.

¹² A ɛ ɡɛnewaa kɛŋɔ he muɡli he dɔŋ baah, kɛ he jemɛ waa tenaa, he dɛ lawɛ he nyoa.

¹³ Nɛn waa dɛ ŋwalɛ nɛra aa won waa ta tɔ, kɛ nɛn nɛra aa dɔ hwɛɡa o nɛɛ te dɛ tɔ wobɛlbwa ta.

¹⁴ Dɛ wejerema toole dɛ nyiŋi harɛ bɛl ta naa, o dɛ paɡre. Bela nomondɛɛɡa aa lole la, deŋnesɔɔhna lɔ bela.

¹⁵ Haa nɛn jemɛ aa, haa o habɔɔ che kem ta. Haa on ajinamuu di. He vɛoh bɔ kɛŋɔ haa kpɔ he te do a ta.

¹⁶ Haah waa dɔ dadɛɛɡe la dɛ dɔ nyanyini, kɛ nɛn waa dɛ lɛ ɡaeh dɛ́ dɔ kondɔɔh ɡbo.

¹⁷ Nɛn o wa aa wera dɛ́ dɔ kɛrɛdɛ, nyubinikpeɡ te dɛ ha o ɡbaɡba.

¹⁸ Wechɔɡ-ɛɛ koeh aa tɔnɔ bɛlbwaa dɔ tɛo, nɛn o wa aa toɡra dɛ́ dɔ kɛrɛdɛ.

¹⁹ Nɛn o siwi aa swɛɛra kɛŋɔ o waa toɡre kɛrɛdɛ la, dɛ́ dɔ o nyu, kɛ nɛn waa teŋa dɛɛ ɛ wechɔɡa la te dɛ́ sewɛ.

²⁰ Korowii kii nɛn o liire aa wola were, o sie dɛ lɛ nɛn o we-ɛɛla aa wera nɛ.

²¹ A ɛ kpela kɛŋɔ wechɔɡ-ɛɛra ɛɛ dɔ deŋnetɛraa, kɛ nɛndɛɛɡa te ɛɛ dɔ ba nyuu.

²² Handɛɛɡe waa wola da dɔe la, do kɛŋɔ baa kpɔ suuɡaswɛm noniseɡ do parakoo mee ta!

²³ Nɛn o wa aa toɡra konnyini ɛ wedɛɛɡa, kɛ kon wechɔɡ-ɛɛ aa dɛ hwɛɡɛ o waa la, o dɛ ba bandia ne.

²⁴ Nomɛl nɔn dɛ pili kɛ dɛ ta ɛɛ dɔ, asɛ bɛl ɡe nɔn aa pili kɛ dɛ ɡe nya.

²⁵ Dɛɛ pili nɔn ásɛ wobɛlbwa do wer tɛɛ, dɛɛ cha banfala ásɛ ba cha he ɡe.

²⁶ Nɛn waa tɔ mea cheɡ, dɛɛ kpa suuɡajena la, nɛra dɛ taahno, kɛ onɔ la waa le o kwaa ne dɛɛ yoɡa la, ba swee andɛɛɡa dɛɛ tɛo.

²⁷ He dɛ nyin wedɛɛɡa aa, nɛra dɛ nyin he wa, kɛ he dɛ nyin wechɔɡa aa, he dɛ dɔ.

²⁸ Nɛn waa dɛ hwɛɡɛ o kondɔɔh ta la, wɛɛ cholo kɛŋɔ hwel saŋ papoo yon le la, kɛ nɛn o wa aa toɡra te ɛɛ do werii, kɛŋɔ bwaala nee saŋ papoo ken.

²⁹ Nomɛlbwa waa kpɔ waa dɛɛ dawɛ o dem tena nɛɛ la dɛ chɔ pɛɛ. Gɛɛ a do ɡɛne ɛɛ berɛ wejereme bonɔɔ.

³⁰ Nɛn o wa aa toɡra we-ɛɛla ɡelɔ nɛra ɛɛ dɔ mkpa, kɛ naɡrenyin te dɛ chɔɡ o bala.

³¹ Nɛndɛɛɡa dɛ dɔ ba wedɛɛɡa kembɔr harɛ nɔ ta naa, ɡɛɛ wechɔɡ-ɛɛra baa wola Korowii ɔmɛ la, ɛɛ ba ba wechɔɡa kembɔr dɔe.