Sɛɡla 1 - mzwDBL

Gɛ sɛɡla aa cheɡa tɛ

¹ Kooro Devid bibaa Kooro Solomɔn o fa aa di kora Israel harɛ ta la sɛɡla.

² Waa aa lɔ sɛɡla la taa kɛ, nɛra che a ta dɛ́ dɔ wejema, ne ɡɛ baa lawɛ ba te, á cha ba bá won dɛɛ no waa a mun noe aa kpeɡa mun.

³ Aa che sɛɡla nɔ taa nɛra won jemɛ wa, dɛ́ won ba te lawa dɛ́ dɔ dadɛɛɡe, dɛɛ ɛ waa aa wera ne kasinteŋ, dɛ waa aa toɡra.

⁴ Aa ɡeloo nɛra baa wola wobɛlbwa jemɛ sie pili, ásɛ toli ne bonɔɔna dɔ wejema.

⁵ Wejerema, hé cheɡ deŋne, dɛ́ no sɛɡla nɔ, dɛ́ dɔ wejema kɛrɛdɛ. Nɛra baa dɛ no waa mun la won ba te lawa, anɔ la aa wera ne anɔ la aa wola were ta,

⁶ dɛ́ won dɛɛ no sɛɡla a mun noe aa kpeɡa, ne wejerema wobol ne wobobeela mun.

⁷ Wejema mumparee Korowii ɔma. Gɛna ɡboo dɛɛ vɛh wejema, ne waa baa dɛ do ba a ta.

Bonɔɔna ne toli jae wa

⁸ N bie, no waa he mɛɛ aa dɛ doe a ta, bɛ waa he nya aa dɛ baɡle vɛh.

⁹ Ba webaɡla la ɛɛ ɡeloo he dɔ dadɛɛɡe, ásɛ he waa do wer kɛŋɔ, haa di bonɔɔne kɛɛ toli, dɛ kpɔ yal vɔwɛ nyu, kɛɛ dɛ do baŋa kwaa la.

¹⁰ N bie, dɛ wechɔɡ-ɛɛra dɛ doe hé ɛ wechɔɡa aa, bɛ sɛh.

¹¹ Dɛ ba ŋɔ he be ŋɔ, “Ba ya ka nyin nɛn kpo, kɛɛ ya ka teŋe ŋwɛnɛ, dɛ́ kpo nɛn ne o tepoŋ pɛɛ,

¹² ya ka kwaa ba ne ba bokpeɡa sɔh, kɛɛ ya ka do ba ŋwɛnɛ ba kaa lalabwɛ.

¹³ Yaa dɔ kondɔɔh bwa soo siwii, ba su ya deremi kɛŋɔ laa ta kwa.

¹⁴ Anomanta, ba ja ya nɛɛ ásɛ ya bwa ka bɔne kwaa yaa ŋwɛ la.”

¹⁵ N bie, he ne nɛra baa do ɡɛ la bɛ valɛ, laa he te kpɔ ba nɛ,

¹⁶ ba ɡbaŋre wechɔɡa ɛɛ ta, baa won ba te lawɛ nɛŋkpoa ta.

¹⁷ He dɛ nyin jumbie dɛ́ lawaa, baa on bel harɛ o siwi ta, baa mea lwee nyubaah ta du.

¹⁸ Nɛn waa do ɡɛ la dɛ harɛ o te bel, o dɛ nyin o ɡbaɡba seo!

¹⁹ Gɛɛ nɛn waa dɛ nyin kafo waa do, o dɛ sewɛ ɡɛ yoi we-ɛɛla la ta.

Wejema dɛ yerɛ

²⁰ Wejema do kɛ haah dɛ do fɔɡbaahna dɛɛ yerɛ, o taa cheɡɛ chiŋ yawa baahna.

²¹ O cheɡɛ bwɛɛ doonyoo ne bela nɛra aa wara, dɛɛ do ɡbɔɡa o taa che chiŋ ŋɔ,

²² “Nɛra he sie aa wola pile, saŋ besoo hɛɛ nyin kɛ he ɡɛn ka tel ɔ? Haa waa hweli aa?

²³ Dɛ he no kaeh maa dɛ kah heya aa, n fe ɛɛ kpɔ n bambile bwaa tɛ heya, dɛ́ baɡle heyaa wa.

²⁴ N teŋɔ dɛɛ yerɛ heya, kɛ he vɛoh, n ta nɔn ŋɔ he ba, kɛ he mwaa n ne.

²⁵ Haa waa maa dɛ ja heyaa a waa la nyin, he vɛh waa maa bola dɛɛ baɡle heyaa la ɡe.

²⁶ Sibeɡra pu heya aa, n ɡe ɛɛ mamɛ heyaa, wekpeɡa ane aa do ɔma kohona ba he nɛ aa, n ɡe ɛɛ di he loroo.

²⁷ Awola siswɛm aa pu heyaa kɛŋɔ dompeu, dɛɛ ba he nɛɛ kohona kɛŋɔ peukpeɡ, ásɛ hɛɛ na weweele ne wahala la,

²⁸ belaa hɛɛ ba men maa dɔ wejema nɔ yera, ásɛ n mwaa he bwa ne. Hɛ́ɛ ɡaaɡoo dɛɛ nyin n bɔr bobɛlbwa yalayala ken, kɛ haa men na.

²⁹ Hé kii wejema, haa nyin kɛ he ɔmɛ Korowii.

³⁰ Hé ta waa maa dɛ ja heyaa la ta teŋɛ, he vɛh kaeh maa kah heyaa la nɛra bwa siwi ta.

³¹ Anomanta, hɛɛ dɔ ɡɛ haa dɛ nyinii, ásɛ he ɡbaɡba we-ɛɛla ɡure he nyu ta.

³² Gɛna dɛ sewɛ wejema baa vɛah wa, dɛkalkɛŋɔ ba kpɔ wejema dɛɛ ta habɔɔ, baa sie waa ta do.

³³ Kɛ nomɛlbwa waa dɛ no n waa la te ɛɛ so lee jeiih ken, o bwara sɔɔhno, ɔmee liire bɛlbwa aa wola on pu.”