Sefania 3 - mzwDBL

Jerusalam kerekere wa

¹ Bwɛjen baa dɛ do ba nɛra hɔhɔrɔwa, dɛ ɛ deŋnekpeɡ tena dɛɛ ɛ wedoŋa la, ó bwɛɛlɛ!

² O nɛra ta Korowii be noɛ, ba ta sɛɛh dɛ teŋɛ toɡra waa toɡ ba la ta. Ba ta ba te kpɔe dawɛ Korowii nɛ, kɛɛ dɛ soŋe chae le o be.

³ Bwɛjen la nomonome do kɛŋɔ nyujentena aa dɛ dooɡe lɔŋɔre ken, o koranar ɡe do kɛŋɔ ɡboli aa lawɛ ol jɔmɔra, aa wola won haŋre dɛ́ ɡel hoɡ ɡba ka tɔɔ per o ta.

⁴ O keamere waa ta kasinteŋ dɔe, ba dɔ mbarafo. O sɔfore kpɔ doŋa dɛɛ kah kwaa aa do ɡoroŋ, dɛɛ ɡole Korowii Mmara ɡɛ baa dɛ nyin.

⁵ Korowii ta lɔ bwɛjen la bini, o waa toɡrɔ, waa wola wedoŋa nyin. Tɔpere bɛlbwaa wɛɛ di o nɛra kasinteŋ, waa wola habɔɔ le saŋ bɛlbwa, kɛ ane a bwa, sihiih aa wechɔɡ-ɛɛra baa lɔ o ta la kpo.

⁶ Korowii ŋɔ, “N chɔɡ harɛre bwa nɛra ne ba bwɛjena, dɛ kuuɡi danjwɛɛre baa maa bara, ne a dejaŋa bwa a berɛ dimɡbeeni. Bwɛjena la chɔ pɛɛ, nɛra toole a fɔɡbaahna, nomɛlbwa ta kae kpa.

⁷ N ɛ n liire kɛŋɔ n nɛra fe ɛɛ che anɔ taa dɛ́ tɛ mɛ duure, dɛ́ sɛh teŋɛ toɡra maa dɛ toɡ ba la ta, dɛ bɛ deŋnetɛra maa kpɔa toɡ ba la soh. Kɛ buɡ nɔ ta ba we-ɛɛla berɔ kaa ba webena la ta.”

⁸ Anomanta, Korowii ŋɔ, “Dɛɛ kpaa mɛ ka tel tɔpere la maa ba bol harɛre nɛra wa. N ɛ n liire kɛŋɔ mɛɛ boa harɛre nɛra, ne koranar ne ba harɛre nyoaa, ásɛ dɛ kpɔ n bandia kohona ba ta ba nɛ. N bwaawee ɛɛ ir ba nɛɛ kohonaa, ásɛ dɛ fuh harɛ nɔ bwa kɛŋɔ nii ken.

⁹ A ɡɛ saŋ la, mɛɛ beɡre harɛre nɛra bwa liiree, ásɛ dɛ ɡel ba ɡel voɡa toma dɛɛ yerɛ n sɔn ɡbo. Ba bwa ɛɛ pɛ nyoa dɛɛ tom mɛ.

¹⁰ N nɛra baa lɔa peɡre ka do Itiopia harɛ bojaŋ la ɛɛ ba saraha kwaa nee ba tɛ mɛ, dɛ́ baa tom mɛ.

¹¹ Gɛ tɔpere la, maa ɡel sihiih kpo heyaa he deŋnekpeɡ haa ɛɛ mɛ la waa kpa. Mɛɛ le mbarafo tena bwa nee n bwɛjen nɔ ta, ásɛ bɛlbwa ɡe aa won ɛɛ mɛ sisawaa n bweɡoroŋ n Dea aa chɔŋɛ o ta la ta kpa.

¹² Nɛra ba waa aa pwɛra ne nɛra baa kpɔ ba te dawɛ n nɛɛ laanee dɛ́ so bela, ásɛ ba ba n be, ń cha ba.

¹³ Israel tena baa ka harɛ la ta la aa wechɔɡaa ɛ, kɛɛ dɛ́ teŋe nyosone, kɛɛ dɛ́ neɡre ba dɔŋa. Baa dɔ komɛlbwa baa dɛ nyinii ba deŋna sɔɔh ba, baa wola nomɛlbwaa ɔmɛ.”

¹⁴ Israel tena, hé ɡo yela silɛɛ ne, dɛ́ kpɔ takpeɡ kpɛɛ Korowii. Jerusalam tena, hɛ́ɛ hɛɡre bambile bwa ne!

¹⁵ Korowii ɡel he deŋne tɛra, dɛ le he dɔma bwa ne. Korowii waa ɛ Israel kooro la ja he nɛ. Komɛlbwa toole he ɔmɛ kpa.

¹⁶ Tɔpere bɛl dɛ ba ásɛ ba bol Jerusalam tena be ŋɔ, “He bɛ ɔmɛ, Bwɛɡoroŋ Saayɔn tena. He bɛ ɡel he bwara hwah.

¹⁷ Korowii haa dɛ tomɔ la ja he nɛ. O dɔ kpeɡri dɛ́ won lɛ heya. O sie ɛɛ lɛ he nɛɛ kohonaa, dɛ́ che o nyina ta tɛ heyaa mkpafale. Wɛɛ ɡo yelaa dɛɛ hɛɡre he wa.

¹⁸ O sie ɛɛ lɛo kɛŋɔ nɛra aa dɛ di tɔpejen bɛl dɛɛ lɛ ba sie la ken.” Korowii ŋɔ, “N ɡelɔ he wenaale la ba a jaɡa, dɛ laa waa aa dɛ do heyaa sihiih ɡe kpɔ.

¹⁹ Saŋ bɛl dɛ ba ń tɛr nɛra baa dɛ do heyaa hɔhɔrɔwa la deŋne. Mɛɛ lɛ banɔ la ba peri aa serewaa, dɛ́ berɛ ba banɔ baa laɡ ba kaa harɛfala ta la ne dem. Mɛɛ ɡeloo banɔ la ba fa aa di sihiih la berɛ dɔ duure, ásɛ harɛ nɔ ta nɛra bwa kpɛɛ ba.

²⁰ Saŋ bɛl dɛ ba ásɛ n boa he nɛra baa peɡra nyoa, dɛ́ ba ba ne dem. Mɛɛ ɛ heyaa nɛnjenaa, ásɛ harɛ nɔ ta nɛra bwa kpɛɛ heya, dɛ́ ɡel he berɛ dɔ kondɔɔh ja. Men Korowiirii bola.”