Sefania 2 - mzwDBL

Liire chara wa

¹ He nɛra, haa wola sihiih jemɛ, hé boa nyoa dɛ́ charɛ he liire

² mɔɔ Tɔpere Korowii aa lea cheɡ o do ɔma, dɛ́ kpɔ heya kɛŋɔ peu aa taa dɛ́ kpɔ haahra kaa la tel, mɔɔ Korowii bandia saŋ la ba, ásɛ o bwaawee bɛ he nɛɛ ir kohona.

³ He nɛra haa pwɛr he te dɛ do harɛ nɔ ta, hé charɛ he liire dɛɛ no Korowii wa. Hé ɡel he waa toɡre, dɛ́ ba he te ne harɛ o sie, o ken ɛɛ lɛ heyaa, waa wola he deŋnee tɛr kpa, awola o bwaawee aa ir nɛra nɛɛ la.

Filisti tena bolchɔɡe pae

⁴ Nomɛlbwa ɛɛ chwao le Gasa, ásɛ Askɛlɔn chɔ pɛɛ. Wee ne ŋɔ o ba che nyufala, dɛ Asdɔd tena bwa chwao le kaa, ásɛ Ekron tena bwa le kwaraa.

⁵ Filisti tena, hé bwɛɛlɛ. He nɛra haa soɡe mpo nyoa bwa, Korowii dɔɔ vɔrɔwe he deŋnetɛra waa bil tonɛ, dɛ ŋɔ wɛɛ chɔɡ heyaa, beŋkpoŋ kwaraa aa wola ka.

⁶ He harɛ waa lɔ mpo nyoa la ɛɛ berɛ peera dibɔree, dɛ́ berɛ peera leɡ, peteɡra ɡe do ba patare o ta.

⁷ Juda tena baa ka la ɛɛ ka so belaa, ó berɛ ba kondɛɛra dibɔr, ásɛ jɔmɔra telo aa, bá ka chɔ bwɛjen Askɛlɔn deene bini. Korowii baa dɛ tomɔ laanee dɛ́ nyiŋi ba nɛ, dɛ́ ɡel ba do wer, ɡɛ ba fa aa doa wubwa la.

Moab ne Amɔn bolchɔɡe pae

⁸ Nemenɛ Korowii ŋɔ, “N no chɛɡra ne bammuɡli wa Amɔn ne Moab tena aa dɛ ɛ n nɛra, dɛɛ aah ba ŋɔ baa lɛ ba harɛɛ.

⁹ Men Koranar Bwa Kooro Israel tena aa dɛ tom mɛ taa lole nɔ, n ŋwɛɛrɔ kɛŋɔ, Moab dɛ ba chɔɡa kɛŋɔ bwɛjen Sodom, ásɛ Amɔn ɡe chɔɡ kɛŋɔ bwɛjen Gomoora ken. Aa berɛ yar kwibɔraa, kpɔɡa le a ta, á chɔ pɛɛ saŋ bɛlbwa dɛɛ la. N nɛra baa ka laanee dɛ́ pa ba laala, dɛ́ ka kpɔ ba harɛ la so.”

¹⁰ Anɔɔ dɛ́ ɛ kembɔr tɛ Moab ne Amɔn tena, mbarafo ne chɛɡra dɛ bammuɡli waa baa kpɔa ɛ Koranar Bwa Kooro nɛra la wa.

¹¹ Korowii ɛɛ ɡeloo ɔmee kohona chole ba nɛ, dɛ́ chɔɡ ba voɡare aa lɔ harɛ la ta bwa. Ásɛ harɛ bɛlbwa ta nɛra ɛɛ tomɔ, bɛlbwa ɛɛ dɛɛ tomɔɔ o ɡbaɡba harɛ taa.

Itiopia bolchɔɡe pae

¹² Korowii ŋɔ wɛɛ kpoo Itiopia tena ɡe bwaa.

Asiiria bolchɔɡe pae

¹³ Korowii ɛɛ che o kpeɡri taa, dɛ́ chɔɡ Asiiria harɛ, ásɛ o bwɛjen Niniwe chɔ pɛɛ, dɛ́ berɛ pua hɛŋle ɡbo harɛ, nee aa wola o taa do.

¹⁴ Peera ne nae dɛ ola bwa soo siwi ɛɛ kpɔ belaa berɛ a chɔɔbɔra. Kwiure kpɔ o dimɡbeeni berɛ a sobɔra, a sii ɛɛ le a tokorore taa, ásɛ ɡaahɡaahre ɡe ɛɛ si a doonyoo. Peleme daa baa kpɔa ɛ doli dawɛ deene la ta la bwa chɔ baŋ.

¹⁵ Gɛɛ bwɛjen o nɛra aa dɛ lii kɛ ba soɡe deŋnesɔɔhna ta, wobɛlbwa aa ban ha la ɛɛ ba nae. Ba yon ŋɔ, “Ya bwɛjen ɛ bwɛjen tenten, bwɛɛ bɛlbwa toole o habɔɔ kpa.” Hé na chɔɡa waa chɔɡa, ásɛ kpɔɡ bini ola kpɔ bela berɛ a chɔɔbɔra. Nɛra báa teŋe baa kaa bwa ɛɛ mamɔɔ dɛɛ for nɔɔra.