Sefania 1 - mzwDBL

¹ Waa Korowii aa kpɔa baɡle Sefania, ɡɛ saŋ Amɔn bibaa Josia aa di kora Juda harɛ ta laanee nɔ. Sefania mɛɛ sɔne Kusi, asɛ Kusi mɛɛ sɔne Gedalia, Gedalia mɛɛ sɔne Amaria, asɛ Amaria ɡe mɛɛ sɔne Hɛsɛkea.

Korowii Tɔpere waa bol waa dɛ́ pa bole

² Korowii ŋɔ, “N dɛ ba komɛlbwa chɔɡa le harɛ nɔ ta.

³ Mɛɛ chɔɡ nɛwɛnyina ne ola bwaa, ne jumbii aa dɛ ɡah nyundua, ne mpo bini pɛŋa bwa. Nɛnchɔɡa ɛɛ daŋɔɔ chɔ kɛŋɔ dea aa chola chɔ ken, dɛ́ chɔɡ nɛwɛnyina bwa, nomɛlbwa aa wola ka. Men Korowiirii bola.

⁴ Mɛɛ tɛr Juda harɛ, ne nɛra baa soɡe Jerusalam la bwa deŋnee. Mɛɛ chɔɡ voɡ Baal ne o komɛlbwaa kwaraa, ásɛ nomɛlbwa aa o kerekpoŋra la waa lii kpa.

⁵ Mɛɛ chɔɡ nɛra baa teehna kaa deene dor kaa tomɛ wee, ne korobie dɛ weweela, ne banɔ la baa ŋwɛɛra ŋɔ ba dɛ tom mɛ kɛ dɛ berɛ kaa tomɛ voɡ Molɛk ɡe ja laanee.

⁶ Mɛɛ chɔɡ banɔ la baa berɛ habɔɔ dɛ vɛh n nɛɛ teŋa, ne banɔ la baa wola n be ba ń baɡ ba waa laanee.

⁷ Bɛ́lbwa hel men Nemenɛ Korowii sie. Tɔpere maa lea cheɡ dɛ́ bol n nɛra waa dɛ́ pa bole la telo tonɛ. N dɛ ba n nɛra Juda tena kpoora ɛ saraha, dɛ́ le ba dɔma bá ba yoo ba dɛ́ pa ba laala.

⁸ A ɡɛ Korowii saraha Tɔpere la, mɛɛ tɛr nomonome ne koobii dɛ nɛra baa kpɔ harɛfale bɛl nawee waa do ba te la deŋnee.

⁹ A ɡɛ tɔpere la, mɛɛ tɛr nɛra baa dɛ tomɛ voɡa deŋnee, ne banɔ la baa kpoo nɛra, dɛ ŋwɛ ba laala dɛ pa ka su ba voɡ baa dɛ tomɔ dea la ɡe deŋnee.

¹⁰ A ɡɛ tɔpere la, hɛɛ no wii le bwɛjen Jerusalam Pɛŋa Doonyoa bela, dɛ́ no wii le bwɛɛ la bwɛfala pera, ásɛ ɡbɔɡa kohona ɛɛ le deŋɡarere aa bɛne bwɛɛ la dor.

¹¹ He nɛra haa soɡe bwɛɛ la yawa ta bɔr pera, hɛ́ɛ wi kohona, he bonadiire ne banɔ la baa dɛ peɡri suuɡapoŋa la bwa dɛ́ ba serewa.

¹² A ɡɛ saŋ mɛɛ kpɔ kandeaa ɡaaɡe Jerusalam bwa, dɛ́ tɛr nɛra baa dɛ lii kɛŋɔ wobɛlbwa ta ban hiaeh, ba nyu bini do ba som la deŋne, dɛɛ lii ŋɔ, ‘Wobɛlbwa aa ɛ wedɛɛɡa kɛɛ anchɔɡa la, Korowii waane laa.’

¹³ Ba dɔma ɛɛ pa ba kondɔɔh bwaa kaa, dɛ́ chɔɡ ba deene. Baa ma deenee, kɛ baa a binii so, dɛ́ parɛ ɡrepo daa kooni, baa a nɔnaa dɔ ɛ sen nyɔ.”

Korowii Tɔpejen waa lea cheɡ

¹⁴ Korowii Tɔpejen waa lea cheɡ o do ɔma la telo tonɛ, o dɛ ba warawara, o pu yaa tonɛ. A ɡɛ tɔpere la ɛɛ ɛ sibeɡraa taeh, banyoola ɛɛ do lɔŋɔre kohonaa.

¹⁵ A ɡɛ tɔpere la, Korowii bwaawee ɛɛ ir nɛra nɛɛ taeh, suna ne wenaale tɔperee, wahala nae ne chɔɡa ɡbosoroo, ásɛ baama tɔ, bɔr ɛ jumaa ken. Bɔr dɛ ba bira kohona a ɡɛ tɔpere,

¹⁶ wɛɛ ɛ laa bɛle hoeh tɔperee, ásɛ laa tena lɔŋɔre tɔ. Baa yo bwɛjena baa ma danjwɛkpeɡa bara, a dɔ dejaŋaa.

¹⁷ Korowii ŋɔ, “Mɛɛ kpɔ a ɡɛ wenaale nɔɔ ba ta nɛra baa ɛ wechɔɡa dɛ jo n nɛ, ásɛ baa laɡre bɔr kɛŋɔ nyoŋa ken. Baa ɛɛ mɛ wechɔɡa nomanta, mɛɛ fuɡe ba chalee ta kɛŋɔ nee ken, ásɛ ba lala chɔ dɛ́ pɔh.”

¹⁸ Korowii bwaawee Tɔpere la, ba suuɡaswɛm kɛɛ suuɡapoŋa aa won lɛɛ ba. O bwaawee dɛ ba harɛ nɔ bwa fuih kɛŋɔ nii ken. Nomɛlbwa waa soɡe harɛ nɔ ta waa ɛɛ ba a jaɡaa buɡ ta.