Rut Tɔn 4 - mzwDBL

Boas mo Rut

¹ Boas la bwɛɛ la doonyoa baa soɡa dɛɛ kpɔ liire la, dɛ ka so bela. Belaa baa la Boas fa aa ŋɔa on tɔ sie o ɡe teŋɛ dɛ dɔ Rut nyiŋa la den baa kaa, asɛ o yerɔ dɛ ŋɔ, “N dam, ba so n be bonɔ tama.” Asɛ o ɡe la dɛ ka so o be bela.

² Belaa Boas ka yerɛ bwɛɛ la nomonome fi ba ba ja o nɛ ba bwa soŋni, ba bwa aa baa soŋni la,

³ o ŋɔ o lole la be ŋɔ, “Taraken Naomi aa le Moab harɛ ta dɛ ba nɔ, o dɛ nyin o yoɡ ya lole Ɛlemɛlɛk koo la,

⁴ mɛɛ nyin kɛ he ɡe jemɛ a wa. Dɛ he ɡbabir dɛ nyin koo la aa, n dɛ nyin kɛŋɔ he den yawɛ ya ne nomonome nɔ bwa sie bonɔ. Dɛ haa nyin ɡe aa, ɡel ya jemɛ, dɛkalkɛ dɛ nomɛlbwa ɛɛ won yawɛ aa, atane o tɔ sie nae mɔɔ ásɛ n ɡe teŋɛ.” Anee o sɛh ŋɔ “Mɛɛ yawɔɔ.”

⁵ Asɛ Boas ŋɔ, “Gɛ wer, kɛ dɛ he yawɛ harɛ la le Naomi ne Rut waa ɛ Moab te la be tenaa, hɛɛ kpɔ ya lole waa sewa la luhaah Rut la ɡee ja, ásɛ he ne o dɔ bie ya lole la sɔn bɛ he harɛ la ta.”

⁶ Belaa baa la chaŋe ŋɔ, “Mɛɛ yawɔɔ n bii aa harɛ la kpeɡrii ba dɔ tenaa, maa won. Hɛɛ wonoo waa, he yawɛ.”

⁷ Dɛ a saŋ la Israel tena nawee waa kɛŋɔ dɛ nomɛl dɔ o komɛl dɛɛ nyin o yoɡ asɛ nɛra cheme ken aa, o dɛ foo o naŋɡawa, dɛ́ kpɔ tɛ nɛn waa dɛ yawɛ la á ɛ danseɛ.

⁸ Anomanta, baa la ŋɔ Boas be ŋɔ, “He won yawa.” Asɛ dɛ foo o naŋɡawa tɛ Boas.

⁹ Belaa Boas bol nomonome ne nɛra baa cheme bela la bwa no kɛŋɔ, “Heyaa ɛɛ mɛ danseɛ fini tɔpere nɔ, kɛŋɔ n yawɛ Ɛlemɛlɛk komɛlbwa ne o bibaala Keleɔn ne Maalɔn kwaa bwa le Naomi be.

¹⁰ N berɔ dɔ Maalɔn luhaah Rut la ó ɛ n haah, ásɛ ya won lolɛ bie, dɛ́ ɡel ya lole waa sewa la sɔn bɛ he dea nɔ ta. Fini a ɛ he bwa siwi ta wa.”

¹¹ Belaa nomonome la ne nɛra baa lɔ doonyoa bela la sɛh ŋɔ, “Ɔɔh, ya bwa ɛ danseɛ tena. Korowiirii dɛ́ ɡel he haah nɔ waa dɛ ba he be bala nɔ do kɛŋɔ Rakɛl ne Lea baa lolɛ bii kohona, dɛ vɔrɔwe Israel la. Korowii ɡel he dɔ chebɔr Efrat baa bera dɛɛ yerɔ Bɛtlɛham la,

¹² he náanar Korowii aa dɛ ba he tɛɛ dɛ le ɡɛ haah nɔ be la do kɛŋɔ Taama ne Juda bibaa Pɛrɛs lolanar.”

Boas ne o naanar

¹³ Asɛ Boas ir dɛ kpɔ o haah Rut kaa dem o ɛ o haah, asɛ o ne o chɔ Korowii chao, asɛ o kpoŋe tea dɛ lolɛ bibaa.

¹⁴ Anee haahna la ŋɔ Naomi be ŋɔ, “Korowii jam kɛŋɔ fini waa tɛɛ lole tenten wáa di he kwaa nɔ. Korowiirii dɛ́ ɡel o sɔn le Israel harɛ ta bwa!

¹⁵ Wɛɛ tɛɛ silɛɛ, ásɛ dɛ lawɛ kpoŋe he hwɛɛhra bini. Dɛkalkɛ Rut waa dɛ nyini lolɛ bibeŋkpoŋ ɡwaa he be kɛŋɔ he fe aa lolɛ bibaala banuanɛ.”

¹⁶ Asɛ Naomi lɛ bie la dɛɛ nyiŋu.

¹⁷ Haahna baa lɔ bela la ŋɔ, “Naomi dɔ naa,” dɛ pa o sɔn Ɔbɛd. On lolɛ Jese, asɛ Jese nɔ lolɛ Kooro Devid.

¹⁸ Banɔɔ ɛ Pɛrɛs bii ne o naanar. O lolɛ Hɛsrɔn,

¹⁹ asɛ Hɛsrɔn lolɛ Ram, Ram ɡe lolɛ Aminadab.

²⁰ Aminadab lolɛ Naasɔn, asɛ Naasɔn lolɛ Salmon,

²¹ Salmon lolɛ Boas, asɛ Boas ɡe lolɛ Ɔbɛd,

²² Ɔbɛd lolɛ Jese, asɛ Jese lolɛ Kooro Devid.