Rut Tɔn 2 - mzwDBL

Rut kaa cheme Boas

¹ Dɛ Naomi jaa Ɛlemɛlɛk dɔ lole bɛl baa yerɔ Boas. O ɛ nɛn waa dɔ o te dɛ dɔ jirima.

² Awola bɛl, Rut ŋɔ Naomi be ŋɔ, “N poori, tɛ́ mɛ ŋwɛnɛ ń la nomɛlbwa waa na n sum koo ta dɛ́ ka kuuh mea.” Anee o sɛh dɛ ŋɔ, “N bie, kaa.”

³ Anomanta, o la koo bɛl ta, dɛ ka teŋɛ tom-ɛɛra nɛ dɛɛ kuuh mea la. Jaah dɛ Ɛlemɛlɛk lole Boas koo taa.

⁴ Baa lɔ bela la, Boas le dem ba, dɛ ba jam tom-ɛɛra la, dɛ ŋɔ, “Hé jam ne ɛɛ. Korowii dɛ kwaa he kwa.” Asɛ ba ɡe sɛh ŋɔ, “Korowii tɛɛ hɛɛra.”

⁵ Belaa o bɔɔ tom-ɛɛra la nomoa ŋɔ, “Tolo besoo ɡee lɔ bela nɔɔ?”

⁶ Anee o chaŋe ŋɔ, “Bitolo bɛl waa le Moab harɛ ta dɛ teŋɛ Naomi nɛɛ ba laanee.

⁷ O baa soŋ mɛ ŋɔ ń ɡel ó teŋɛ tom-ɛɛra nɔ nɛ, ásɛ dɛɛ kuuh anɔ la aa leera la. Chɔɔ bwaa o le ɛ toma asɛ dɛ baa onɛ pata bini tama la.”

⁸ Asɛ Boas suuh tel Rut dɛ ŋɔ, “Bɛ koo bɛlbwa ta la ka kuuh mea kpa ka ja koo nɔ ta. Dɛɛ teŋɛ haahna baa dɛ ɛ toma koo nɔ ta nɔ nɛ.

⁹ Dɛɛ do sie baala la nɛ, dɛɛ teŋɛ toli la nɛ. N ŋɔ baala la be ŋɔ ba bɛ hen panya. Nyɔɡre dɛ kpoe naa, ka nyɔ nee baa dɔa ba nɔ ane.”

¹⁰ Belaa Rut ɡuŋu harɛ dɛ ŋɔ, “Jam kɛŋɔ maa ɛ hɔɔh n ɡe waa hiaih ɡɛ nɔ.”

¹¹ Asɛ Boas chaŋe ŋɔ, “He jaa seo habɔɔ la, n no waa bwa haa ɛa dɛ tɛ he helahaah. N no ɡɛ haa ɡel he nya ne he mɛɛ, ne harɛ haa le o ta, dɛ ba so nɛra haa wola ban jemɛ bwa bini nɔ.

¹² Korowiirii dɛ́ tɛɛ he kembɔr he waa la haa ɛa la wa. Korowii Israel tena aa dɛ tomɔ he chwa ba marɔ nɔ, ó tɔ he nɛ kɛ jal yon kpɔ kena tɔ o bii nɛɛ la, dɛ́ kwaa he kwaa tɛɛ kohona.”

¹³ Anee Rut ŋɔ, “N dɔɔ, a lole kɛŋɔ n ta he tom-ɛɛra la bɛl ɛɛ te, kɛ he nyin n waa kohona, dɛ larawe n bwara ɡe.”

¹⁴ Kondikwaa dii saŋ aa tela la, Boas ŋɔ o be ŋɔ, “Ba lɛ paanoo tama dɛ́ kpɔ li sennyɛɡa nɔ ta.” O ne tom-ɛɛra la aa soɡa dɛɛ di kwaa la, Boas berɛ kpɔ mea baa hala tɛo ja. O diu dɛ vaɡɛ asɛ ane ka.

¹⁵ Rut aa baa ir dɛ kuuh mea la la, Boas ŋɔ o bonɔɔna la be ŋɔ, “O ɡaaɡɔ dɛ ka kuuh anɔ la baa boa a nyoa bil la jwɛh kwaraa naa, he bɛ on panya.

¹⁶ Hɛ́ɛ won tɛr ane le anɔ la haa boa a nyoa bil la ta, ásɛ o ba pa. He bɛ o nɛɛ nyɛɡ.”

¹⁷ Anomanta, Rut ɡaaɡe koo la ta dɛ ka tel jɔmɔra. O lɔ mea waa dɔa la bwa asɛ a ɛ kuruware fi.

¹⁸ O cheɡaa ba dem asɛ o helahaah na ɡɛ del waa dɔa. Rut kpɔ kondikwaa waa dia a ka la ɡe tɛo.

¹⁹ Asɛ Naomi bɔɔro ŋɔ, “Leperaa he ka ɡaaɡe fini nɔ? Ume koo taa he ka kuuh dɛ dɔ anɔ bwa ken? Korowiirii dɛ cha naate waa na he sum nɔ.” Anee Rut ŋɔ o be ŋɔ, “Boas koo taa n ka ɡaaɡe.”

²⁰ Naomi ŋɔ, “Korowiirii dɛ́ kwaa Boas kwaa tɛo. N nao kɛŋɔ Korowii ta teŋɔ dɛɛ nyin weera ne serewa.” Dɛ berɛ ŋɔ, “A ɡɛ baa la ɛ ya lole tenten. O ɛ nɛra baa chɛ kɛŋɔ báa nyiŋi ya nɛɛ la bini bɛl.”

²¹ Belaa Rut ŋɔ, “Silɛɛ wa aa jaa laanee kɛŋɔ, o ŋɔ ń teŋɛ o tom-ɛɛra nɛɛ dɛɛ kuuh mea ka tel kɛŋɔ baa teŋe tonɛ.”

²² Naomi ɡe ŋɔ o be ŋɔ, “Kasinteŋii, a wer kɛŋɔ he ne toli la bwa pɛ dɛɛ ɛ toma Boas koo ta. He la nomɛl koo ta naa, ba ken ɛɛ panyae.”

²³ Gɛɛ a do o ne ba ɛ toma asɛ o kuuh mea la ka tel saŋ baa koma tonɛ. Asɛ o so o helahaah be.