Rut Tɔn 1 - mzwDBL

Naomi Ne Rut wa

¹ Saŋ la Israel tena aa wola kooro dɔe mɔɔ, asɛ sitɔɔla yon dɛɛ nyiŋi bela harɛ ta la, dɛ lɔr lɔ harɛ la ta. Belaa baa bɛl waa le Bɛtlɛham o do Juda harɛ ta, ne o haah ne bibaala banɛ ir dɛ ba so Moab harɛ ta.

² Baa la sɔne Ɛlemɛlɛk, o haah ɡe sɔne Naomi. O bibaala la bɛl sɔne Maalɔn, asɛ nɛɛte la ɡe sɔne Keleɔn. Dɛ Efrat dea naanaree ban, ba le Bɛtlɛham waa lɔ Juda harɛ ta.

³ Baa kaa so bela la, Ɛlemɛlɛk sewɔ, asɛ a ka Naomi ne bibaala banɛ la ɡbo.

⁴ Bibaala la mo Moab haahna. Bɛl sɔne Ɔpa, asɛ bɛl ɡe Rut. Baa soɡa bene fi habɔɔ la,

⁵ Maalɔn ne Keleɔn baa sewɛ. Aa ba ɡɛ la a ka Naomi ɡbo.

⁶ A habɔɔ la, o baa no kɛŋɔ Korowii cha o harɛ ta nɛra dɛ ɡel ba dɔ kondikwa. Anomanta, o ne o bii la haahna la kpɔ ba te ásɛ dɛ berɛ kaa o bwɛ.

⁷ Ba bwa leɔ dɛ kpɔ Juda ŋwɛnɛ ta dɛɛ kaa.

⁸ Ŋwɛnɛ ta la, Naomi ŋɔ ba be ŋɔ, “Hé berɛ kaa he nyawa be. Korowiirii dɛ́ cha heya, ɡɛ haa cha n ne n jaa ne n bii la.

⁹ Korowiirii dɛ́ cha heya, ásɛ bɛlbwa berɛ dɔ jaa dɛ́ dɔ bodɛɛɡe so.” Belaa o ka mo ba lwɛɛma dɛ kal ba. Asɛ ba pa mun dɛɛ wi,

¹⁰ dɛ ŋɔ o be ŋɔ, “Akai, ya ne henee dɛ́ kaa he nɛra be.”

¹¹ Anee Naomi chaŋe ŋɔ, “N bii, hé berɛ kaa he bwɛ. N ne he kaala mun ɔ? N lol tonɔ, mɛɛ won berɛ lolɛ bii bá kpɔ heyaa mo ja aa?

¹² Hé berɛ kaa he bwɛ. Taraken bela maa tela nɔ, maa jaaree dɔ kpa. Dɛ hwɛɡa lole kɛŋɔ ń dɔ jaa aa, hale n ne o chɔɔ fini kwara naa, maa won den kpoŋe tea dɛ́ loɡle bibaala tɛ heya.

¹³ Dɛ a ba ɡɛ kwara naa, hɛɛ won soŋni ka tel kɛŋɔ baa kpeɡ aa? Hɛɛ won so dɛ́ ŋɔ haa yalaa? Akai n bii, he ɡbabir jemɔ ŋɔ ɡɛ aa won maɡre. N nyuu wola were mɛɛ di suna, he te laa chɛ kɛŋɔ he di suna. Korowiirii ɛɛ mɛ ɡɛ.”

¹⁴ Asɛ ba berɛ wi anɔ ɡe ta ja. Belaa Ɔpa mo o lwɛɛma dɛ kalo. Kɛ Rut te ta lawɔ kpoŋe dɛ ŋɔ waa on ta.

¹⁵ Anee Naomi ŋɔ o be ŋɔ, “Nyiŋi na, he nahaahnee bera dɛɛ kaa o harɛ ta ne ba voɡa bini la. He ɡe ka puu hé kaa.”

¹⁶ Asɛ Rut chaŋo ŋɔ, “Bɛ n be ŋɔ n ɡele. Bobɛlbwa haa kaa ne bela haa so la, n ɡee so belaa. Mɛɛ kpɔ he nɛraa ɛ n nɛra, ásɛ Korowii haa dɛ tomɔ la, ń ɡee tomɔ.

¹⁷ Bela haa sewɛ laanee n ɡee ba sewa, ásɛ ba huɡ mɛ bela. Dɛ seo laa aa, n ŋwɛɛrɔ kɛŋɔ wobɛlbwa aa won pere ya baah.”

¹⁸ Naomi aa naa kɛŋɔ Rut marɛ o nɛɛ kɛŋɔ o ne ó kaa la, o ta wobɛlbwa bolɛ kpa.

¹⁹ Anomanta, haahna banɛ nɔ valɔ dɛ ba tel Bɛtlɛham, asɛ bwɛɛ la tena bwa lɔ kpu dɛɛ pɛɛ ŋɔ, “Naomii nɔ tenaa?”

²⁰ Asɛ o chaŋe ŋɔ, “He bɛ men Naomi yerɛ. Hɛɛ yer mɛ Mara dɛkalkɛ Korowii Waa Ɛ Kpeɡri Bwa Dɔɔ ta ɡelɛ n sie lɛ n soɡa bini.

²¹ Maa dɛ le bonɔ dɛ́ kaa la, dɛ n dɔ kwaa kohona. Kɛ Korowii ɡelɔ n valɛ nɔŋɡbala ba. Ɛrɛɛ Korowii Waa Ɛ Kpeɡri Bwa Dɔɔ ɛɛ mɛ nyuchɔɡe te dɛ ɡel mɛɛ na wahala nɔ, asɛ hɛɛ yer mɛ Naomi nɔɔ?”

²² Gɛɛ a do Naomi ne o helahaah Rut waa ɛ Moab te la ɛ dɛ ba Bɛtlɛham. Dɛ mea koma dɛ pa mun.