Tɔn Pɔɔl Aa Chwerɛ Rom Tena 9 - mzwDBL

Korowii ne o nɛra

¹ Kasinteŋii mɛɛ ba bola la. Maa ɛ Yeesu Kristo nɛn la nomanta, maa nyosone teŋe. Korowii Domadɛɛɡe la ɡelɔ n jemɛ n bambile bini kɛŋɔ maa nyosone teŋe.

² N tea bini chɔɡɔ, n bambile ɡe aa n wee ɡel bwa.

³ N ɡbaɡba bwɛɛ tena baa ɛ n nɛraa ɡela n bambile bwa wee mɛ ɡɛ nɔ. Dɛ Korowii taah mɛ asɛ n ne Yeesu Kristo baah pere kwaraa ásɛ o lɛɛ ba aa, n dɛ nyin ɡɛ.

⁴ Israel tena maa dɛ bol ba waa nɔ, Korowii ɛɛ ba o bii dɛ baɡ ba o jirima. O ne ba fɔwɛ fɔo, asɛ o tɛɛ ba o Mmara, dɛ baɡ ba ɡɛ aa chɛ kɛ baa tomɔ, dɛ baɡ ba nyoa bele aŋwɛnɛ bwa.

⁵ Ba nabaala la nɛra bwa aa jemɛ ba waa la naanaree ban. Kristo la Korowii aa baɡɛ nyoa ŋɔ wɛɛ tomɔɔ ó ba lɛɛ ba la, o nɛwɛnyini ɛɛ be pera la, ba dwee on. Korowiirii dɛɛ nyiŋi nɛwɛnyini bwa nɛɛ saŋ bɛlbwa. Onee chɛ kpɛɛra. Aamen.

⁶ N ta ŋɔe ŋɔ Korowii vɛh o nyobaɡa la ta teŋa, kɛ Israel tena bwa laa Korowii le kɛ o nɛra.

⁷ Abraham naanar bwa ɡe laa Korowii bii. Korowii aa ŋɔ Abraham be ŋɔ, “Aesek luɡe taa hɛɛ ba he naanar maa baɡɛ nyoa dɔe” la,

⁸ a baɡlɔ kɛŋɔ Abraham dwee la te bwa waa lol ba ɡɛ nɛra bwa aa dɛ lolɛ la, Korowii nɛra laa ban. Abraham bie la Korowii aa baɡɔ nyoa la, o dweee Korowii jemɛ kɛŋɔ Abraham naanaree ban,

⁹ dɛkalkɛŋɔ Korowii aa baɡɛ Abraham nyoa la, waa waa bola laanee kɛŋɔ, “Benanyoa saŋ nɔ mɛɛ berɔɔ ba. N ne bala dɛ Saara lolɛ bibaa.”

¹⁰ Anɔ ɡbo laa. Rebɛka aa kpoŋe o kpara la tea la, ba bwa mɛɛ ɛ beŋkpoŋ. Ya nabaa Aesekee ba mɛɛ.

¹¹ Baa wola ban lolɛ mɔɔ, a ɛ kɛŋɔ ba ɛ wechɔɡa kɛɛ wedɛɛɡa la, dɛ Korowii dɔɔ ŋɔ ba nya be ŋɔ,

¹² “Bii nɔ, bechala la ɛɛ lɛ nomonome o dɔɔ bee, ásɛ o dɔɔ la berɛ dɛɛ tomɔ.” A ɡɛ waa nɔ baɡlɔ kɛŋɔ lee Korowii aa le Jekɔb la, o tetooraa o leo. Jekɔb we-ɛɛla laa o nyiŋi dɛ leo.

¹³ Anee Korowii Tɔn la baɡle ŋɔ, “N nyin Jekɔb dɛ hah Esɔ” la.

¹⁴ Amɔ yaa wonoo ŋɔ Korowii waa ta toɡrɛ kɛɛ? O waa toɡrɔ.

¹⁵ O ŋɔ Mosis be ŋɔ, “Naate n tea aa toora kɛŋɔ ń sune o nɛɛ la, mɛɛ sune o nɛɛ. Naate n tea aa toora kɛŋɔ ń tea domɛ o nɛɛ la, n tea ɛɛ domɛ o nɛɛ.”

¹⁶ Waa nɛwɛnyina aa dɛ nyin ne anɔ la yaa dɛ ɛ la, Korowii te aa an nyiŋi. O te suna waa sune nɛwɛnyina nɛɛ la, anee wɛɛ nyiŋi.

¹⁷ Ba chwerɛ Korowii Tɔn bini ɡɛ Korowii fa aa ŋɔ Ijipt kooro be la. Anee kɛŋɔ, “N ɡelɔ he ɛ kooro ásɛ nɛwɛnyina bwa che he nɛɛ dɛ na ɡɛ maa dɔ kpeɡri, asɛ dɛ yerɛ n sɔn harɛ ta bobɛlbwa.”

¹⁸ Naate Korowii tea aa toora kɛŋɔ ó sune o nɛɛ la, o nɛɛ wɛɛ sune. Naate ɡe o tea aa toora kɛŋɔ ó ɡel o deŋne do kpeɡri la, onee o ɡel o deŋne ɛɛ do kpeɡri.

¹⁹ Nomɛl ɛɛ ŋɔɔ, “Dɛ kenii a do aa, Korowii ɛɛ wonoo ŋɔ nomɛl deŋne kpeɡri nomanta, o ɛ wechɔɡa aa? Umee dɛ́ won ŋɔ Korowii we-ɛɛla bɛ won ɛɔ?”

²⁰ Dɛ henee ume kɛŋɔ Korowii bol waa he chaŋe bɛl ɔ? Vii ɡee wonoo bɔɔ mamaa waa aa bala o mao ɡɛ waa mao wa aa?

²¹ Naate waa dɛ ma la, o ta ŋwɛnɛ dɔe kɛ o kpɔ choh waa dɛ ma a ne la ma kwaa aa too o tea aa? A too o tea aa, wɛɛ kpɔ a ɡɛ choh laanee ma viine anɛ, dɛ́ kpɔ bɛl dɛɛ ɛ kwaa tɔpejena ɡbo, dɛ́ kpɔ bɛl ɡe dɛɛ ɛ kwaa tɔpere bɛlbwa.

²² Gɛɛ a do Korowii be. Nɛwɛnyina ɛ o viine waa maa. Bane chɛ chɔɡa. O ma bane ɡe ásɛ ba ba na som o be. Dɛ o fe dɛ nyin o baɡle o bandia nɛra baa chɛ chɔɡa la nɛɛ dɛ́ ɡel nɛra na o kpeɡri, kɛ o lawɛ bambile,

²³ ásɛ nɛra waa sune ba nɛɛ dɛ cheɡ ba kɛŋɔ bá ba na som la won jemɛ ɡɛ o som la aa doa dɛ dɔ jirima kohona.

²⁴ Yanee o sune ya nɛɛ la. Yanee o le ŋɔ ya ɛ o nɛra la. Israel tena ɡbo bini laa o le nɛra ŋɔ ba ɛ o nɛra. O le bane nɛra baa wola Juu tena ɛɛ ɡe bini.

²⁵ Kenii o ŋɔ o keame Hosia tɔn bini. “Nɛra ba fa aa wola n nɛra ɛɛ n fa aa wola ban nyin la, mɛɛ yer baa n nɛra ne n nɛnnyinaa.”

²⁶ Ba chwerɛ tɔn la bobɛl ɡe ŋɔ, “Nɛra Korowii fa aa ŋɔ ba be ŋɔ, ‘N nɛra laa heyaa’ la, baa berɔ yer ba Korowii waa lole saŋ bɛlbwa bii.”

²⁷ Aesaya bol Israel tena waa ŋɔ, “Dɛ Israel tena warɔ kɛŋɔ mpo nyoa hɛŋle kwaraa naa, ba bini tamaa kenii Korowii ɛɛ ba lɛɛ.

²⁸ Wɛɛ bol nɛwɛnyina bwa waa wɔrɔbe nɛɛ dɛ́ pa bole.”

²⁹ Anee Aesaya fa bol la, “Dɛ Koranar Bwa Kooro fe ta o nɛra dwee tama bane ɡelɛ aa, ya fe ɛɛ tonɔɔ kwaraa kɛŋɔ Sodom ne Gomoora tena.”

Israel tena yarada bɛ dɔe

³⁰ Ɛrɛɛ yaa ba ŋɔe yɔ? Nɛra baa wola Israel tena ɛɛ la, ba siwi aa wola swɛɛrɛ kɛŋɔ Korowii lɛɛ ba kɛ nɛndɛɛɡa ba waa su o siwi la, ba yarada nomanta, Korowii siwi su ba.

³¹ Kɛ Israel tena te aa swɛɛ siwi dɛ kpɔ ba sie do Mmara ta teŋa ta, dɛ ŋɔ anee dɛ́ ɡel Korowii lɛɛ ba kɛ nɛndɛɛɡa ba waa su o siwi la, o siwi ta ba te kwaraa sui.

³² Aah dɛ bɔkwaa ɡela a ba ɡɛ nɔ? Baa wola sie kpɔe dawɛ Korowii yaradae ta, dɛ kpɔ sie dawɛ ba we-ɛɛla ta kɛŋɔ anee dɛ́ ɡel Korowii siwi su ba la, a waa. Anomanta, ba lɔ naa Bwe nɛra aa lɔ naa o ta dɛɛ chole la ta.

³³ O waa ba chwerɛ Korowii Tɔn bini la. Ba chwerɔ ŋɔ, “Mɛɛ kpɔ Bwee cheɡ Saayɔn, ásɛ nɛra ɛɛ lɔ naa o ta dɛɛ choɡli. Kɛ nomɛlbwa waa yaradao la, sihiih aa o kpoe ba.”