Tɔn Pɔɔl Aa Chwerɛ Rom Tena 8 - mzwDBL

Mkpa dɔe Korowii Domadɛɛɡe la ta

¹ Taraken nɔ nɛra ba ne Yeesu Kristo aa pɛa la te aa bolchɔɡe dii ba ba tɛr ba deŋne.

² Maa dɛ ŋɔ nɔ, Korowii Domadɛɛɡe lɔɡa maa lole dɛ dɔ mkpa nɔ taa Yeesu Kristo che dɛ lɛɛ mɛ le wechɔɡa ne seo lɔɡa n fa aa lole la ta.

³ Nɛwɛnyini mar aa do ɡɛ, waa wola kpeɡe dɛɛ tɔ Mmara ŋwɛnɛ, asɛ Mmara lɛ nɛwɛnyini kahonɛ la, Korowii te wono lɛ nɛwɛnyini. O ɡelɔ o Bie tenten kpɔ nɛwɛnyini mar wechɔɡa aa suu nɔ dɔŋ, dɛ ba chɔɡ liichɔɡa kpeɡri o fa aa dɔa nɛwɛnyini nɛɛ la dɛ laa wechɔɡa kpɔ,

⁴ ásɛ ya waa do sweih kɛŋɔ Mmara la aa baɡla ŋɔ yá do la. Yaa nɛwɛnyini mar liichɔɡa aa suu nɔ waa ta teŋɛ, Korowii Domadɛɛɡe waa taa yaa teŋɛ.

⁵ Nɛra baa dɛ teŋɛ nɛwɛnyini mar liichɔɡa aa suu nɔ tetoowaa ta la, a taa ba ɡe liire do. Nɛra ba ɡe aa dɛ teŋɛ Korowii Domadɛɛɡe waa ta la, a taa ba liire do.

⁶ He kpɔ liire do nɛwɛnyini mar nɔ liichɔɡa waa ta naa, he ne sewee. Kɛ he kpɔ liire do Korowii Domadɛɛɡe tetoowaa ta naa, he dɔ mkpa dɛ dɔ deŋnesɔɔhna.

⁷ Nomɛlbwa waa kpɔ o liire do bwadabii waa ta dɛ ɡwaa wobɛlbwa la, o som laa Korowii, waa Korowii Mmara ta teŋɛ. Waa won teŋɛ Korowii Mmara ta ɡe bwa.

⁸ Nɛra baa kpɔ ba liire do nɛwɛnyini mar wechɔɡa aa suu nɔ dɛ ɡwaa wobɛlbwa la, ba waa aa won too Korowii tea bwa.

⁹ He te la, he ta he nɛwɛnyini mar nɔ wechɔɡa aa suu nɔ som kpɔe ɡwaa wobɛlbwa. Dɛ Korowii Domadɛɛɡe lɔ he nɛ aa, ɡɛ waa dɛ baɡle heyaa laanee hɛɛ ba dɛɛ ɛɛ. Nomɛlbwa waa wola Domadɛɛɡe Yeesu Kristo aa dɛ tɛ la dɔe la, dɛ Yeesu nɛn laa on.

¹⁰ Dɛ Yeesu Kristo Domadɛɛɡe la lɔ he nɛ aa, wechɔɡa nomanta, he bwadabii ɛɛ sewɔɔ te. Kɛ Korowii aa lɛ heyaa kɛ nɛndɛɛɡa he waa su o siwi nomanta, he lileore ɛɛ dɔ mkpaa.

¹¹ Korowii waa ir Yeesu Kristo seo ta la, dɛ o Domadɛɛɡe lɔ he nɛ aa, ɡɛ Korowii aa iru seo ta la, wɛɛ che o Domadɛɛɡe la taa, dɛ́ tɛ he bwadabii aa dɛ ba pɔeh kerekere nɔ mkpa.

¹² Anomanta, yabala, waa dawɛ ya nɛ, ya di kem, kɛ ya nɛwɛnyini mar nɔ wechɔɡa aa suu nɔ kem laa ya di á ɛ kɛŋɔ yaa teŋɛ o nɛɛ,

¹³ dɛkalkɛŋɔ dɛ nɛn teŋɛ nɛwɛnyini mar wechɔɡa aa suu nɔ pɛla waa ta naa, waa mkpa dɔe ba. Kɛ dɛ nɛn cheɡɛ Korowii Domadɛɛɡe la nɛɛ dɛ vɛh o bwadabii pɛla wobɛlbwa naa, wɛɛ dɔ mkpaa.

¹⁴ Nɛra baa kpɔ ba te tɛ Korowii Domadɛɛɡe wɛɛ baɡ ba ŋwɛnɛ la, Korowii biirii ban.

¹⁵ Korowii Domadɛɛɡe la waa kpɔa tɛ heyaa la, o ta ɡelɛ he ne Korowii baah do kɛŋɔ nɛn ne o yom asɛ hɛ́ɛ ɔmɔ. O ɡelɔ he ɛ Korowii bii. O alaworomɛ ya won wii dɛ́ yerɛ Korowii ‘Mɛɛ, n Mɛɛ’, kɛŋɔ bie aa dɛ yerɛ o mɛɛ la.

¹⁶ Korowii Domadɛɛɡee yon ɡel ya jemɛ ya bambile bini kɛŋɔ Korowii biirii yaa.

¹⁷ Yaa ɛ Korowii bii nomanta, dɛ ya sɛoh dɛ na wahala Yeesu Kristo aa naa la aa, ya ɡee di o kapɛrɛɛ kɛŋɔ Yeesu Kristo aa dɛ di la, ásɛ Korowii kpɛɛ yaa ɡɛ waa kpɛɛ Yeesu Kristo la.

Kerekere jirima wa

¹⁸ Wahala nɔ yaa dɛ na taraken nɔ, he nyiŋi som yaa dɛ ba nae kerekere la aa, a ta wahala ɛɛ kwaraa.

¹⁹ Korowii kontaala bwa siwi swɛɛrɔ aa kpa tɔɔ la wee Korowii aa baɡle nɛra baa ɛ o bii la.

²⁰ A dɛ yo dɛ yo kaahonɛ, dɛkalkɛŋɔ a ta a te dɔe. Korowiirii taa o tetoora ta kɛŋɔ a bɛ kpeɡri dɔ. Kɛ a dɛ hwɛɡɛ

²¹ kɛŋɔ tɔpebɛl Korowii ɛɛ ɡeloo a foo dɛ́ le kpeɡri bɛ dɔe nɔ ta, aa wola pɔh kpa, dɛ́ ja Korowii bii nɛɛ dɛ́ ɡe na som kɛŋɔ baa foora la.

²² Ya jemɔ kɛŋɔ ba le fini, Korowii kontaala bwa bwara dɛ nyɛɡ, aa pɛmɛ kɛŋɔ lol tea aa lɔ haah o yon dɛɛ pɛmɛ la.

²³ Maa dɛ ŋɔ nɔ, Korowii kontaala ɡbo bwara laa dɛɛ nyɛɡ. Ya nɛra yaa dɔ Korowii Domadɛɛɡe kɛŋɔ kwaa Korowii aa ba tɛ yaa la bini konloɡle la, ya ɡba bwara dɛ nyɛɡ. Ya dɛ nyiŋi Korowii ŋwɛnɛ kɛŋɔ wɛɛ ba ɛ yaa o biirii, dɛ́ lɛ ya bwadabii le wechɔɡa ne seo nɔn ta.

²⁴ Korowii aa lɛ yaa la, dɛ ɡɛ hwɛɡa nɔɔ ya dɔ. Kon nɛn aa dɔa la, waa berɛ dɛɛ hwɛɡɛ o waa kɛŋɔ wɛɛ dɔɔ kpa, dɛkalkɛŋɔ kon waa wola nɛn nɔn ta joɛ la, o waa baa hwɛɡɛ.

²⁵ Ya te la, kon waa wola ya nɔn ta joɛ mɔɔ la, o waa yaa hwɛɡɛ. Yaa too.

²⁶ Gɛ ya hwɛɡa yaa dɔa la aa lawɛ yaa ya wahala bwa bini la, ɡɛɛ Korowii Domadɛɛɡe ɡee cha yaa, dɛkalkɛŋɔ ya yarada aa kanɛ. Yaa jemɛ ɡɛ aa chɛ kɛ yaa soŋe Korowii kwara. Korowii Domadɛɛɡe soŋɔ dɛɛ tɛ yaa sum ne, nɛn aa wola won baɡle kwara.

²⁷ Korowii te jemɛ nɛn bambile bini waa bwa, dɛ jemɛ o Domadɛɛɡe la nyu bini, dɛkalkɛŋɔ ɡɛ Korowii aa dɛ nyin la, ɡɛɛ o Domadɛɛɡe la soŋo dɛɛ tɛ o nɛra ba wa aa toɡra.

²⁸ Ya jemɔ kɛŋɔ nɛra baa dɛ nyin Korowii la, wobɛlbwa aa puu ba la, o ɡelɔ a ɛ wedɛɛɡa dɛɛ tɛɛ ba. O tetooraa o lee ba ba ɛ o bii.

²⁹ Nɛra Korowii aa jemɛ ba waa cheɡ wubwa la, waa wola ban tae mɔɔ la, dɛ o tɔ sie lee ba ŋɔ bá ba do kɛŋɔ o Bie la ken, ásɛ ba bwa ɛ o Bie la nimanar, ásɛ o ɡe ɛ ba Dɔɔ.

³⁰ Anomanta, nɛra Korowii aa tɔ sie lee ba ɡɛ la, o lee ba ŋɔ bá ɛ o toma. Waa lee ba ŋɔ bá ɛ o toma la, o lɛɛ ba kɛ nɛndɛɛɡa ba waa su o siwi, asɛ o tɛɛ ba ŋwɛnɛ kɛŋɔ ba ba so o jwɛh dɛ́ dɔ jirima.

³¹ Ya ta sie nyiŋi anɔ bwa na naa, ɛrɛɛ yaa ba ŋɔe yɔ? Dɛ Korowii teŋɛ ya nɛ aa, umee dɛ́ won ɛ yaa waane ɔ?

³² Nɛn waa wola yaa o Bie kwaraa vɔmɛ, dɛ koh ya bwa waa kpɔɔ do nɛwɛnyina nɔn ta ba kpoo la, bɔkwaa bala waa wola tea ta dɛ́ tɛ yaa komɛlbwa dɛ ja o Bie la nɛɔ?

³³ Umee dɛ́ won na Korowii bii waa lee ba nɔ bwara wechɔɡe bɛl dɛ bolɔ? Korowii kwara waa dɛ pa bole la, o ŋɔ ba waa wer dɛɛ su o siwi.

³⁴ Aah dɛ umee dɛ́ won pa ba bolchɔɡe ɔ? Yeesu Kristo kɛɛ? Sewaa o te koh ya waa sewɛ, kɛ a ɡbo laa. O berɔ ir seo ta dɛ ka so nomombɔr Korowii diɡ ta, dɛ soŋo dɛɛ tɛ yaa.

³⁵ Bɔkwaa dɛ won pere ya ne Yeesu Kristo baah waa wola ya waa nyina ba kpaɔ? Noe aa dɛ no yaa kɛɛ wahala yaa dɛ na, kɛɛ cheɡa nɛra aa cheɡɛ ya nɛ, kɛɛ lɔr, kɛɛ nyaa, kɛɛ dɛ ya cheɡɛ seo nyoa o, kɛɛ sewɔ?

³⁶ Gɛ Korowii Tɔn aa dɛ baɡle la, “He nomanta, ya cheɡɛ seo nyoa saŋ bɛlbwa. Saŋ bɛlbwaa baa ɛ yaa kɛŋɔ peera baa dɛ la ka kpoa la ken.”

³⁷ Anɔ bwa sekwaraa ta la, ya jemɔ kɛŋɔ yaa yoo le. Yeesu Kristo waa nyin yaa la nɛɛ yaa ba cheɡa dɛ le.

³⁸ N jemɔ kɛŋɔ wobɛlbwa toole dɛ tɔ yaa ŋwɛnɛ waa wola ya waa nyina ba. Seo kɛɛ mkpa aa won tɔ yaa ŋwɛnɛ. Nyundua toroma kɛɛ Bɔnsam toroma aa bea yaa wola an na aa won tɔ yaa ŋwɛnɛ. Waa aa dɛ ɛ fini nɔ kɛɛ anɔ la aa dɛ ba ɛɛ kerekere ɡe aa won tɔ yaa ŋwɛnɛ. Kwaa aa dɔ kpeɡri bɛlbwa sese ɡe aa won tɔ yaa ŋwɛnɛ.

³⁹ Komɛlbwa toole dɛ do nyundua kɛɛ harɛ bobɛlbwa dɛ́ won tɔ yaa ŋwɛnɛ. Korowii kontaala bini komɛlbwa toole dɛ́ won pere yaa le Korowii nyina aa cheɡɛ ya Dɔɔ Yeesu Kristo nɛɛ wɛɛ nyin yaa la ta.