Tɔn Pɔɔl Aa Chwerɛ Rom Tena 6 - mzwDBL

Wechɔɡa taa a che seo ba asɛ a che Yeesu nɛɛ mkpa ba

¹ Taraken nɔ, ɛrɛɛ yaa ba ŋɔe yɔ? A chɛ kɛ ya na dɛɛ ɛ wechɔɡa tɔpere bɛlbwa, ásɛ Korowii ɛɛ na ya sum, dɛ́ kpɔ dɛɛ kɛ yaa tɔpere bɛlbwa kɛɛ?

² Akai! Gɛ nɛn sewaa, waa wola toole wobɛlbwa bini kpa la, ɡɛɛ ya ne wechɔɡa baah do. Aah dɛ ya ne wechɔɡa aa wola toole wobɛlbwa bini nɔ, ŋwɛnɛ besoo taa yaa ba wona dɛɛ ɛ wechɔɡa jaɔ?

³ He soɔh kɛŋɔ baa sɔ yaa Korowii nee yáa teŋɛ Yeesu Kristo nɛɛ la, ya ne onee pɛa sewɛ kɛɛ?

⁴ Baa sɔ yaa Korowii nee la nomanta, a kaa ɛ kɛŋɔ ya ne Yeesu Kristoo ba pɛ huɡe. Ya ne waa pɛa sewɛ la nomanta, ɡɛ Korowii aa cheɡɛ o kpeɡri a dɔŋ aa wola toole la ta dɛ iru seo ta la, ɡɛɛ wɛɛ ba ya ɡe chae ya kwaa so sofale waa wera, dɛ́ charɛ dofale waa wera.

⁵ Dɛ ya ne o pɛo dɛ sewaa, ya ne wɛɛ pɛo ir seo ta.

⁶ Ya jemɔ kɛŋɔ ya dobene la ne Yeesuu ba pɛ saɡɛ o daɡaɡre ta. Ya dobene la ne o wechɔɡa bwaa ba kpo, ásɛ o bɛ won di kpeɡri ya nɛɛ kpa, ásɛ wechɔɡa bɛ won yawɛ yaa yoma kpa.

⁷ Nomɛlbwa waa sewa la, o fooro le wechɔɡa kpeɡri aa dɛ di la be pera.

⁸ Ya ne Yeesu Kristo aa pɛa sewɛ la nomanta, ya dɔ yarada kɛŋɔ yaa dɔ mkpaa ya ne o pɛ so.

⁹ Ya jemɔ kɛŋɔ Yeesu Kristo ir seo ta waa wola sewɛ kpa bwa, seo ta kpeɡri dɔe o nɛɛ kpa.

¹⁰ O seo waa sewa la, kerabeŋkpoŋii o sewɛ dɛ pɔ kpeɡri wechɔɡa aa dɔa la nɛ. Taraken soɡa waa soɡa nɔ, o soɡoo tɛ Korowii.

¹¹ Gɛɛ a chɛ kɛ he kpɔ he te kɛŋɔ he ne wechɔɡa toole wobɛlbwa bini kpa kɛ nɛn aa sewa la. He ne Yeesu Kristo aa pɛa la nomanta, a chɛ kɛ he jemɛ kɛŋɔ Korowiirii he do le tɛ.

¹² A ta chɛ kɛŋɔ hé ɡel wechɔɡa ɛɛ di kpeɡri he nɛ, ásɛ hɛɛ ɛ he bwadabii waa wola lee do saŋ bɛlbwa nɔ tetoowa.

¹³ He bɛ he bwadabii bobɛlbwa kpɔ dɛɛ ɛ wechɔɡa. A chɛ kɛŋɔ hé kpɔ he te tɛ Korowii kɛŋɔ nɛra baa sewa dɛ ir, dɛ charɛ ba soɡa ne ba dor. Hé kpɔ he bwadabii bobɛlbwa tɛ Korowii, dɛ kpɔa dɛɛ ɛ waa aa toɡra.

¹⁴ Wechɔɡa aa kpeɡri dɔe ba he nɛ, dɛkalkɛŋɔ Korowii suna waa dɛ sune nɛra nɛɛ la lɔɡaa he do. He toole Mmara lɔɡa kpa.

Yá kpɔ ya te do wedɛɛɡa ta dɛ́ do ɡoroŋ

¹⁵ Yaa lɔ Korowii suna waa sune ya nɛɛ lɔɡa yaa wola toole Mmara lɔɡa nɔ, a chɛ kɛ yaa ɛ wechɔɡa kɛɛ? Akai!

¹⁶ Kɛ he jemɔ kɛŋɔ dɛ he kpɔ he te do nomɛl nɔn ta ŋɔ on dɔ heya aa, dɛ on dɔ heyaa kenɛ? He kpɔ he te tɛ wechɔɡa aa, hɛɛ dɛɛ ɛ wechɔɡaa ásɛ dɛ sewɛ. He kpɔ he te tɛ Korowii dɛɛ no o be naa, wɛɛ lɛ heyaa kɛ nɛndɛɛɡa, ásɛ he waa su o siwi.

¹⁷ Korowii jam! Wechɔɡa fa aa yawɛ heyaa yom, asɛ taraken nɔ he no o waa baa chaɡle heyaa dɛ kpɔ he te tɛo he bambile bwa ne nɔ,

¹⁸ Korowii le heyaa wechɔɡa yawa a fa aa yawɛ heyaa yom la ta. Taraken nɔ, he berɛ yoma dɛ tɛ wedɛɛɡa ɛɛ.

¹⁹ He waa mun noe jaŋne, a waa n kpɔ waa haa dɛ noa tɔpere bɛlbwa dɛɛ baɡle heyaa waa la. Gɛ he fa aa teŋa dɛ kpɔ he te do wedoŋa ta wubwa dɛɛ ɛ wechɔɡa la, ɡɛɛ a chɛ kɛŋɔ hé berɛ kpɔ he te do wedɛɛɡa ta, ásɛ he waa do ɡoroŋ.

²⁰ Wubwa la, dɛ wechɔɡa yawɛ heyaa yoma. Dɛ he ne wedɛɛɡa toole wobɛlbwa bini.

²¹ Dɛ wechɔɡa ɡboo hɛɛ ɛ. Taraken nɔ, a waa dɛ ɛ heyaa sihiih. A ɡɛ waa nɔ, dɛ tɔnɔ besoo a dɔ tɛ heya ɔ? Waa aa lɔ ɡɛ wechɔɡa nɔ habɔɔ laanee seo.

²² Kɛ taraken nɔ, Korowii le heyaa wechɔɡa ta. On dɔ heya. He tɔnɔ haa dɔa laanee kɛŋɔ he soɡa bini aa toɡra Korowii be. A taa aa ba cheɡa ásɛ he dɔ mkpa aa wola jaɡa dɔe.

²³ Wechɔɡa dɔ a kembɔr. A kembɔree seo. Asɛ kon Korowii ɡe aa dɛ tɛ laanee mkpa aa wola jaɡa dɔe bwa. Ya Dɔɔ Yeesu Kristo nɛɛ o che dɛɛ tɛ a ɡɛ mkpa nɔ.