Tɔn Pɔɔl Aa Chwerɛ Rom Tena 2 - mzwDBL

Korowii bole pae aŋwɛnɛ ta wa

¹ He naate haa dɛ pwah he dɔŋ la, he ta wobɛlbwa dɔe dɛ́ bol dɛ́ lɛ he te kpa. Henee ume noo, haa dɛ pwah he dɔŋ dɛ berɛ dɛɛ ɛ o wechɔɡa waa dɛ ɛ la dɔŋa la, dɛ he ɡbaɡbaa hɛɛ pa bolchɔɡe la.

² Nɛn ɛ wechɔɡa nɔ dɔŋa aa, Korowii dɛ pao bolchɔɡe. O te, aŋwɛnɛ taa wɛɛ pa nɛwɛnyini bolchɔɡe.

³ Kɛ he te, waa haa dɛ pwah nɛra a waa la, anee he ɡee ɛ. He dɛ lii kɛŋɔ Korowii aa he te waa bola ba dɛ́ pa bole kɛɛ?

⁴ Waa nɔ bwaa Korowii ta tea dɛɛ ɛ heya, dɛɛ tɛ heyaa sisɔna dɛɛ lawɛ bambile nɔ bwa, ásɛ he charɛ he liire dɛ́ le he wechɔɡa ta. Kɛ haa o wedɛɛɡa nɔ bu, dɛɛ nyiŋa pɛɛ.

⁵ He deŋne kpeɡri. Haa ɡelɛ he tea bini ɛɛ chɔɡ he wechɔɡa wa. He ɡelɔ Korowii bwaawee ɛɛ do kan he nɛɛ tɔpere bɛlbwa. Awola waa ba pa bole kasinteŋ ne la, o baah ɛɛ di he nɛɛ taeh.

⁶ Gɛ nomɛlbwa we-ɛɛla aa doa la, anee wɛɛ ba nyiŋa dɛ́ bol o waa dɛ́ pa bole.

⁷ Nɛra baa dɛ nyin jirima Korowii be, dɛɛ nyin kɛ Korowii kpɛɛ ba, dɛɛ nyin mkpa aa wola jaɡa dɔe, dɛ koh a waa dɛ lawɛ bambile dɛɛ ɛ wedɛɛɡa saŋ bɛlbwa la, Korowii ɛɛ tɛɛ baa mkpa aa wola jaɡa dɔe bwa.

⁸ Nɛra baa dɛ ɛ ba tetoowa, baa wola Korowii waa aa ɛ kasinteŋ ta teŋɛ, dɛɛ ɛ wechɔɡa la, Korowii bwaawee ɛɛ ir ba nɛɛ taeh.

⁹ Nɛra baa dɛ ɛ wechɔɡa la, ba bwara ɛɛ nyɛɡoo taeh, aa noo baa taeh. Juu tenaa dɛ tɔ sie na bonyɛɡa a noo ba, nɛra baa wola Juu tena ɛɛ la ɡe jao.

¹⁰ Asɛ nɛra baa dɛ ɛ wedɛɛɡa la, Korowii ɛɛ ɡeloo ba dɔ jirima, dɛ́ kpɛɛ ba, dɛ́ tɛɛ ba bambisɔɔhna. Juu tenaa dɛ́ tɔ sie na anɔ bwa, nɛra baa wola Juu tena ɛɛ la ɡe jao.

¹¹ Korowii aa nomɛl waa nyin ɡwaa bɛl.

¹² Nɛra baa wola Mmara Korowii aa kpɔa tɛ Mosis la jemɛ dɛɛ ɛ wechɔɡa la, baa sewɔɔ. Kɛ Mosis Mmara la ta laa Korowii ɛɛ ba nyiŋa, dɛ́ bol ba waa dɛ́ pa bole. Banɔ la baa jemɛ Mmara la, Mmara la taa Korowii ɛɛ ba nyiŋa dɛ́ bol ba waa dɛ́ pa bole.

¹³ Maa dɛ bol nɔ, Mmara nɔ noe laa ɡela nɛn ɛɛ ɛ nɛndɛɛɡe o wa ɛɛ su Korowii siwi. Mmara la ta teŋaa ɡela nɛn ɛɛ ɛ nɛndɛɛɡe o wa ɛɛ su Korowii siwi.

¹⁴ Nɛra baa wola Juu tena ɛɛ la, baa Mosis Mmara la jemɛ. Kɛ saŋ bɛlbwa ba ɡbaɡba aa kpɔ ba nyu bini nfɛrɛ dɛ ɛ ɡɛ Mmara la aa dɛ baɡle la, dɛ ba nyu bini nfɛrɛ la ɛ Mmara tɛɛ ba. Kɛ a fe lole kɛŋɔ baa Mosis Mmara la jemɛ te.

¹⁵ Ba we-ɛɛla chaɡlɔ kɛŋɔ waa Mosis Mmara la aa dɛ baɡle la lɔ ba bambile bini. Ba liire ɡba dɛ di danseɛ ɡɛ waa nɔ ta, dɛkalkɛŋɔ a tel ane ta naa, ba ɡbaɡba liire yon ɛɛ ba kɛŋɔ ba ɛ wechɔɡa, ane ɡe ta ba ɡbaɡba liire yon ɛɛ ba kɛŋɔ ba ɛ wedɛɛɡa.

¹⁶ Waa nɔ bwaa dɛɛ ba ɛɛ awola Korowii aa dɛ ba nɛra wechɔɡa baa ɛa dɛɛ sɔh la ne bochaah lee, ásɛ Yeesu Kristo pa ba bole. Gɛɛ me Amanesoma la ɛɛ baɡle.

Juu tena ne Korowii Mmara wa

¹⁷ Asɛ he naate haa dɛ yerɛ he te Juu te, dɛ kpɔ he sie dawɛ Mosis Mmara la ta dɛ kpɔ Korowii dɛɛ ta nyoa la ɡe sɛ?

¹⁸ He jemɛ ɡɛ Korowii aa dɛ nyin kɛ hɛɛ ɛ, dɛ jemɛ Mmara la, dɛ jemɛ waa aa wera bwa.

¹⁹ Kɛ he dɛ yerɛ he te nɛn waa jemɛ waa dɛɛ baɡle nɛra baa wola wobɛlbwa jemɛ. Kɛ he ŋɔ henee ɛ nii dɛɛ chaah nɛra baa lɔ biro ta.

²⁰ Wejema bwa ne Korowii wobɛlbwa lɔ Mmara la bini, anomanta, he kpɔ he te kɛ wejereme dɛɛ baɡle ɡɛna ne bamuɡe wa.

²¹ Haa dɛ baɡle he dɔŋa waa nɔ, ɛrɛɛ haa wola won baɡle he te ɡbaɡba ɔ? Haa dɛ ŋɔ nɛra be ŋɔ ba bɛ dɛɛ ŋwɛ, asɛ dɛ te dɛɛ ŋwɛ nɔ sɛ?

²² Hé tenten nɔ, he ŋɔ nɛra bɛ ba bala haahna ne ba bala jaranar dɛɛ nyin. Hé ɡbaɡba, haa ɡɛ ɛa? Hé ŋɔ he kii voɡa, hen ɡee bera dɛɛ ŋwɛ kwaa a deene bini.

²³ Hen kpɔ Mmara la dɛɛ ta nyoa, he ɡee wola a ta teŋɛ, asɛ nɛra koh he we-ɛɛla waa dɛɛ ɛ Korowii nɛnhɛla.

²⁴ Korowii Tɔn baɡlɔ ŋɔ, “He Juu tena aa ɡela nɛra baa wola Juu tena ɛɛ la siwi sa Korowii la.”

²⁵ He dɛ teŋɛ Mmara la ta naa, dɛ he pena teŋa nɔ dɔ mun. Kɛ dɛ haa Mmara la ta teŋaa, ate he fe ɡel he pena teŋa bɔ.

²⁶ Nɛra baa wola Juu tena ɛɛ baa wola ba pena teŋe la, ba dɛ teŋɛ Mmara la ta naa, haa jemɛ kɛŋɔ Korowii ɛɛ lɛɛ baa kɛŋɔ nɛra baa teŋe ba pena aa?

²⁷ He Juu tena te jemɛ Mmara nɔ dɛɛ teŋe he pena, kɛ he bane aa Mmara la ta teŋɛ. Asɛ nɛra baa wola Juu tena ɛɛ la ɡe, baa ba pena teŋe, kɛ ba bini bane dɛ teŋɛ Mmara la ta. Ba we-ɛɛla ɛɛ ɡeloo Korowii pa heyaa bolchɔɡe.

²⁸ Nɛn waa ɛ Juu te, wobɛlbwa aa wola toole dɛɛ baɡle kɛ o ɛ Juu te, dɛ ja o pen teŋa ɡbo ta la, Juu te tenten laa on. Penteŋa dɔ mun.

²⁹ Waa aa dɛ baɡle kɛŋɔ nɛn ɛ Juu te tenten la, bambile binii a do. Korowii Domadɛɛɡe laanee dɛɛ ba toma ɛɛ he bambile bini, ásɛ he won ɛ Juu te tenten. Mmara bɛlbwa aa ɡɛ bambile nɔ tɛ. Nɛn Korowii Domadɛɛɡe la aa chao asɛ o bambile bini waa ɛɛ baɡle kɛŋɔ o ɛ Korowii nɛn la, nɛwɛnyini laa dɛɛ ba o kpɛɛra, Korowiirii dɛɛ ba o kpɛɛra.