Tɔn Pɔɔl Aa Chwerɛ Rom Tena 16 - mzwDBL

Pɔɔl kal asɔre tena ŋɔ o dɛ na ba

¹ Yɔɔ. Ya nimambie nɔ sɔne Fiibi. Asɔre tena baa lɔ Keŋkrea la binii o do dɛɛ ɛ toma.

² Hé lɛo ja he nɛɛ ɡɛ aa chɛ kɛ Korowii nɛra lɛ ba dɔŋ la ya Dɔɔ Yeesu nomanta. Komɛlbwa waa dɛɛ nyin dɛ le he be la, hé chao, dɛkalkɛŋɔ o ɡba cha Korowii nɛra ba wa aa toɡra taeh. N ɡbabir nɔ, o cha mɛ ka.

³ N dɛ na Presela ne Akwela n ne ba bwa aa dɛ ɛ Yeesu Kristo toma nɔ la.

⁴ Ba fa koh n waa dɛ kpɔ ba nyuune charɛ seo. N ne asɔre tena baa wola Juu tena ɛɛ la bwaa dɛɛ jam ba.

⁵ N dɛ na asɔre tena baa cheme ba dem dɛɛ tomɛ Korowii la bwa. N dɛ na n chamenate Epaenitus waa tɔ sie yarada Yeesu Kristo waa nɔ Eesia harɛ ta bwa la.

⁶ N dɛ na Mɛɛre waa dɛ ɛ toma he bini ɡa la.

⁷ Hé ŋɔ n bwɛɛ tena Andronikus ne Junias ba fa aa do n ne ba dea ka la be ŋɔ n dɛ na ba. Ba ɛ nɛra bane ba sɔn aa lea Yeesu toroma bini. Ba tɔ sie ɛ asɔre tena n nɛ.

⁸ N dɛ na Ampelatos waa ɛ n chamenate ya Dɔɔ Yeesu nɛɛ teŋa ta la.

⁹ N dɛ na Ɔrbanus ya ne o bwa aa dɛ ɛ Yeesu Kristo toma nɔ la, ne n chamenate Stakes.

¹⁰ N dɛ na Apeles wekpeɡa aa puu o ta che kiŋkiŋ Yeesu Kristo waa nɔ ta la. N dɛ na Aristobulus dem tena bwa.

¹¹ N dɛ na n bwɛɛ te Herodion. N dɛ na Nasesos dem tena la baa ɛ asɔre tena la bwa.

¹² N dɛ na n nimambii Trefiina ne Trefosa ba bwa aa dɛ ɛ ya Dɔɔ Yeesu toma nɔ la. Hé ŋɔ n nimambie Pɛɛsis nomɛlbwa aa dɛ nyin o waa la be ŋɔ n dɛ nao. O ɡe koh ya Dɔɔ Yeesu toma nɔ ta ɡa.

¹³ N dɛ na Rufus o sɔn aa lea ya Dɔɔ Yeesu toma nɔ ta la, ne o nya waa nyiŋ mɛ kɛ n ɡbaɡba nya la.

¹⁴ N dɛ na Asiŋkritus, ne Fleɡɔn, ne Hɛɛmes ne Patrobas, ne Hɛɛmas, dɛ yabala baa jaa la bwa.

¹⁵ N dɛ na Faelolɔɡɔs, ne Julia, ne Nɛreɔs ne o nimambihaah, ne Ɔlempas, dɛ Korowii nɛra ba wa aa toɡra bane ba do bela la bwa.

¹⁶ Hɛ́ɛ lea dɔŋa kɛrɛdɛ kɛŋɔ nyabii. Nɛra baa dɛ teŋɛ Yeesu Kristo nɛɛ la bwa dɛ na heya.

¹⁷ Yabala, n dɛ soŋe heyaa kɛŋɔ, hɛɛ nyiŋi nɛra baa ɡela he baah ɛɛ peɡri, dɛɛ baɡle waa a ne Yeesu Kristo waa baa baɡle heyaa nɔ aa wola jo, asɛ dɛɛ vuuɡi heyaa la. Hé jem ba dɛɛ ke he te ba nɛ.

¹⁸ A ɡɛ nɛra nɔ, ya Dɔɔ Yeesu Kristo laa baa tomɛ. Waa ba sie aa dɛ lɛ a ta la, anee baa ɛ. Nyotor ne nyosone nee baa neɡre nɛra baa wola wobɛlbwa jemɛ la.

¹⁹ Nɛra bwa dɛ bol he teŋa haa dɛ teŋɛ Yeesu waa la ta waa bobɛlbwa, anomanta, n sie lɛ he nɛɛ kɛrɛdɛ. Kɛ n dɛ nyin kɛŋɔ he ɛ wejerema wedɛɛɡa ɛɛ bɔr, asɛ dɛ ɛ nɛra haa wola wobɛlbwa jemɛ wechɔɡa ɛɛ be pera.

²⁰ Korowii waa dɛ tɛ yaa deŋnesɔɔhna la aa biɡri chɔɡ Bɔnsam ne o toma, ásɛ he tiɡri o nɛ. Yá Dɔɔ Yeesu Kristo cha heya.

²¹ Timoti n ne waa dɛ ɛ toma la dɛ na heya. Lusias ne Jasen, dɛ Sosipata ba bwa aa ɛ n bwɛɛ tena la dɛ na heya.

²² Men Tɛɛseɔs Pɔɔl aa ɡela n chwerɛ tɔn nɔ tɛo la, n ɡe dɛ na heyaa ya Dɔɔ Yeesu Kristo sɔn ta.

²³ Men Pɔɔl dea te Gayos dɛ na heya. O deemii bonɔ asɔre tena ɛɛ cheme. Erastos waa dɛ cheɡ bwɛɛ nɔ suuɡa la, o ne ya dɔŋ Kwaatos bwa dɛ na heya.

²⁴ Ya Dɔɔ Yeesu Kristo sune he nɛ dɛ cha he bwa sekwaraa. Aamen!

²⁵ Hé ɡel ya jam Korowii. Wɛɛ wonoo ɡel he che kiŋkiŋ Yeesu Kristo Amanesoma maa dɛ bol he be la ta. Korowii pili a ɡɛ waa nɔ bini. Anee fa ɛ wesɔɔhla saŋ la bwa la,

²⁶ kɛ taraken te, o cheɡɛ o keamere waa baa chwera la ta, dɛ le a bwa ne baŋ. Korowii waa lole saŋ bɛlbwa la tɛ ŋwɛnɛ taraken ŋɔ nɛ́ra bol o waa la. O ɛ ɡɛ ásɛ ba bola dɛɛ baɡle nɛra bwa ásɛ ba yaradaa dɛ́ teŋɛ a ta.

²⁷ Hé ɡel ya che Yeesu Kristo nɛɛ dɛ́ jam Korowii o ɡbo aa ɛ Korowii, dɛ ɡbo jemɛ wobɛlbwa la. O jirima aa tonɛ bwa! Aamen.