Tɔn Pɔɔl Aa Chwerɛ Rom Tena 15 - mzwDBL

Ɛ he bala tetoowa dɛɛ tɛɛ ba

¹ Ya nɛra ya yarada aa kana la, a chɛ kɛ yaa lawɛ bambile banɔ la ba yarada aa wola kanɛ la nɛɛ dɛɛ cha ba. A ta chɛɛ kɛ yaa ɛ ya ɡbo tetoowa.

² A chɛ kɛ ya bɛlbwa ɛɛ ɛ waa aa wera dɛɛ tɛ ya dɔŋa, ásɛ a cha ba, ásɛ ba won che kiŋkiŋ.

³ Yeesu Kristo aa lɔ harɛ ta la, dɛ o tetoowaa laa wɛɛ ɛ. Korowii Tɔn bolɔ ŋɔ, “Korowii, chɛɡa baa chɛɡɛ la, anee ba kpɔ tɛ mɛ.”

⁴ Wobɛlbwa ba fa aa chwera la, dɛ yanee ba chwera tɛ kɛŋɔ yá hweli waa le a ta. A ɡɛ waa nɔɔ dɛɛ ja yaa bambile dɔe ta, dɛɛ do yaa ɡbemba, ásɛ a che a ta ya dɔ hwɛɡa.

⁵ Korowii waa dɛ tɛ nɛn bambile dɛɛ do ɡbemba la, on dɛ tɛ heyaa nyopɛo teŋa haa dɛ teŋɛ Yeesu Kristo nɛɛ la ta,

⁶ ásɛ he pɛ dɛ́ kpɔ nyopɛo kpɛɛ ya Dɔɔ Yeesu Kristo Mɛɛ Korowii.

⁷ Anomanta, hé lɛ nɛra dɛɛ ja he nɛɛ ɡɛ Yeesu Kristo aa lɛ heyaa la, ásɛ nɛra na dɛ tɛ Korowii jirima,

⁸ dɛkalkɛŋɔ Yeesu Kristo wono ɛ toma Juu tena bini, asɛ dɛ chaɡle kɛ Korowii waa dɔ kasinteŋ. Anee Korowii ɛ dɛ chuɡri o nyobaɡa waa baɡɛ Israel tena naawa la,

⁹ ásɛ a che a ta nɛra baa wola Juu tena ɛɛ la ɡe kpɛɛ Korowii kɛŋɔ waa dɛ sune nɛra nɛɛ kohona. Ba chwerɛ Korowii Tɔn bobɛl ŋɔ, “Anomanta, mɛɛ yerɛ he sɔn nɛra baa wola Israel tena ɛɛ baahnee, dɛ́ ɡo yela kpɛɛre.”

¹⁰ Dɛ berɛ chaɡle bobɛl ɡe ŋɔ, “He nɛra haa wola Juu tena ɛɛ, hé pu Israel tena hɛɡre.”

¹¹ Dɛ berɛ chwerɛ ŋɔ, “Nɛra haa wola Juu tena ɛɛ, hé bwa jam N Naa Korowii, dɛ́ ɡo yela kpɛɛro.”

¹² Asɛ Aesaya ɡe bol ja, dɛ ŋɔ, “Jese naa bɛl ɛɛ bao. On dɛ́ ir dɛ́ di kora nɛra baa wola Israel tena ɛɛ nɛ. O nɛɛ baa ba hwɛɡa dɔe.”

¹³ Korowii waa ɡela ya dɔ hwɛɡa Yeesu nɛɛ la, ó tɛ heyaa silɛɛ ne bansɔɔhna he yarada haa dɛ yarada Korowii la ta, ásɛ Korowii Domadɛɛɡe ɡe cha heyaa, ásɛ he won dɛɛ hwɛɡɛ Yeesu nɛɛ kohona.

Pɔɔl bol waa baɡle nɛra baa wola Juu tena ɛɛ

¹⁴ Yabala, n ɡbabir jemɔ kɛrɛdɛ kɛŋɔ he dɛ ɛ wedɛɛɡa taeh. He jemɛ waa kohona, dɛ won dɔŋa waa baɡla ɡe.

¹⁵ He nyiŋo na naa, n tɔn nɔ maa chwerɔ nɔ, n di heyaa kasinteŋ waane ta dɛɛ lii heya. Korowii aa sune n nɛɛ

¹⁶ dɛ kpɔ o toma nɔ do n nɔn ta ŋɔ mɛ́ɛ baɡle nɛra baa wola Juu tena ɛɛ la, a waa n won di heyaa kasinteŋ ɡɛ la. Maa dɛ bol Yeesu Kristo Amanesoma la dɛɛ baɡle he nɛra haa wola Israel tena ɛɛ la, n kpɔ n te ɛ kɛŋɔ Sɔfo waa lɛ nɛra kwaa ɛ saraha dɛɛ tɛɛ ba Korowii Dea bini la. N dɛ nyin he no a waa dɛ yaradaa, ásɛ Korowii Domadɛɛɡe won laa he doŋa kpɔ he nɛ, ásɛ he ɛ Korowii nɛra. Belaa ń won kpɔ heyaa tɛ Korowii kɛŋɔ baa ɛ saraha dɛɛ tɛo la, ásɛ he waa su o siwi o lɛ heya.

¹⁷ N ne Yeesu Kristo aa pɛa nomanta, n won n te maŋkurae toma maa ɛa dɛɛ tɛ Korowii nɔ ta.

¹⁸ Waa Yeesu Kristo aa cheɡɛ n nɛɛ dɛ ɛ he nɛra haa wola Israel tena ɛɛ bini la, maa lii kɛŋɔ mɛɛ won bol anfala ane ja a ta. A ɡbo waa n jemɛ. Anee kɛŋɔ taraken haa yarada Korowii waa nɔ. Waa Yeesu aa cha mɛ mɛɛ bol dɛɛ baɡle heya, ne waa waa cha mɛ mɛɛ ɛ,

¹⁹ ne wekpeɡa ne nyokpowaa Korowii Domadɛɛɡe la kpeɡri aa ɡela mɛɛ ɛ la bwa ɡelɔ he yarada Korowii waa nɔ. Taraken nɔ, le Jerusalam ka le Ilirikum le bwa, n bol Yeesu Kristo Amanesoma nɔ bela.

²⁰ N ɛ n liire wubwa kɛŋɔ mɛɛ bol Yeesu Kristo Amanesoma nɔɔ. Kɛ harɛre baa bol o waa a ta la, a ta laa mɛɛ bola. A waa laa aa, dɛ nomɛl toma waa pa a mun cheɡ la taa n kpɔ dɛɛ choŋi la.

²¹ Ba chwerɛ Korowii Tɔn bini ŋɔ, “Nɛra nomɛlbwa aa wola o waa bolɛ ba be ka la, baa no o waa, dɛ́ jemɔ.”

²² Anɔ waa maa wola bɔr dɔe dɛ ba he be kera aŋwɛnɛ bwa la.

²³ Kɛ taraken nɔ maa tonɛ n toma bonɔ nɔ, asɛ n sie che chiŋ bene aŋwɛnɛ nɔ bwa kɛŋɔ ń ba na heyaa nɔ,

²⁴ n dɛ nyin kɛŋɔ n ba dɛ kaa Speen harɛ ta naa, ń na heya. N jemɔ kɛŋɔ n baa so he be tɔpera anɛ, dɛ le bela dɛɛ kaa Speen harɛ ta naa, hɛɛ cha mɛɛ.

²⁵ Taraken nɔ, kwaane nee mɛɛ ba ń ba kaa ka tɛ Korowii nɛra ba wa aa toɡra dɛ do Jerusalam.

²⁶ Ba bala baa lɔ Makidoonia ne Akaya harɛre ta koŋkwaare ane ŋɔ ń kpɔ ka tɛ Jerusalam Korowii nɛra ba wa aa toɡra, ba soɡa bini do kpeɡri tɛɛ ba la.

²⁷ Ba sie lɛo kɛŋɔ baa ta kwaa la. Kasinteŋ, baa won jam Jerusalam Korowii nɛra la ka tonɛ, dɛkalkɛŋɔ ɡɛ Korowii aa cha Israel tena asɛ nɛra baa wola Israel tena ɛɛ di ba tɔnɔ la, ɡɛɛ a chɛ kɛ dɛ nɛra baa wola Israel tena ɛɛ la ɡe dɔ harɛ bonɔ kwaa aa, Israel tena ɡe di ba tɔnɔ.

²⁸ Dɛ n kpɔ ba suuɡa bwa ka do ba nɔn ta tonaa, mɛɛ ba kaa Speen harɛ taa. Kɛ mɛɛ che he bee.

²⁹ N jemɔ kɛŋɔ dɛ n ba he be naa, mɛɛ soŋe Yeesu Kristo ó swee andɛɛɡa tɛ heyaa kɛrɛdɛ.

³⁰ Yabala, n kpɔ ya Dɔɔ Yeesu Kristo ne nyina Korowii Domadɛɛɡe la aa ɡela yaa nyin dɔŋa la, dɛɛ soŋe heyaa kɛŋɔ he cha mɛ dɛ́ swɛɛ siwi soŋe Korowii tɛ mɛ.

³¹ Hé soŋe Korowii tɛ mɛ ásɛ o kpɔ nɔn tɔ n nɛɛ Juda harɛ tena baa wola Yeesu yarada la bini, ásɛ waa maa dɛ la ka ɛ Jerusalam Korowii nɛra ba wa aa toɡra bini la, bá sie lɛ a ta,

³² ásɛ dɛ Korowii sɛoh waa, ń ba he be silɛɛ ne, dɛ́ ba onɛ tama.

³³ Korowii waa dɛ tɛ yaa deŋnesɔɔhna la, ó cha he bwa. Aamen.