Tɔn Pɔɔl Aa Chwerɛ Rom Tena 14 - mzwDBL

He bɛ dɔŋa dɛɛ pwah

¹ Dɛ Kristo te bɛl lole, o yarada aa wola kanɛ wɛɛ nyin o jo he bini naa, hé lɛo do he bini. He bɛ o we-ɛɛla aa korɛ he kwaa ta la dɛɛ tɔŋle.

² Bɛl yarada ɡelɔ o won komɛlbwa dii, asɛ naate o yarada aa wola kanɛ la, o ɡee di papooni ne taŋna ɡbo, waa ol di.

³ Naate waa dɛ di komɛlbwa la, a ta chɛɛ kɛŋɔ wɛɛ lii naate waa wola ol di la nɛndoŋ. Naate waa wola ol di la, o bɛ naate waa dɛ di komɛlbwa wechɔɡ-ɛɛ dɛɛ lii, dɛkalkɛŋɔ Korowii lɛo dɛ ɛo o bie.

⁴ Henee umeo he won pwah nomɛl bonɔɔ nɔ? O dɔɔ ɡbaɡbaa dɔ ŋwɛnɛ kɛŋɔ ó won baɡle kɛ o bonɔɔ dɛ ɛ waa kɛɛ waa waa ɛ. Waa ɛ ya Dɔɔ Yeesu Kristo bonɔɔ la nomanta, wɛɛ ɛ waa, dɛkalkɛŋɔ wɛɛ wonoo chao o ɛ wa.

⁵ Nomɛl ɛɛ dɛɛ liiruu kɛŋɔ tɔpere bɛl ɛ onjen ɡwaa bɛl, ásɛ bɛl ɡee lii kɛŋɔ tɔpera bwa kɛrɛdɛ. A chɛ kɛ bɛlbwa jemɛ anɔ la aa wera kɛŋɔ o ɛ ne anɔ la aa wola were o nyu bini.

⁶ Nomɛlbwa waa dɛ lii kɛŋɔ tɔpere bɛl ɛ onjen dɛ ɡwaa bɛl la, o dɛ tɛ Korowii duure, a waa wɛɛ ɛ ɡɛ. Nomɛlbwa waa dɛ di komɛlbwa la, o dɛ tɛ Korowii duure, a waa wɛɛ ɛ ɡɛ, dɛkalkɛŋɔ o dɛ jam Korowii kondikwaa la wa. Nomɛlbwa waa dɛ ki kondikwaa ane soo dii la, o ɡe dɛ tɛ Korowii duure, a waa wɛɛ ɛ ɡɛ. O ɡba dɛ jam Korowii.

⁷ Ya bini bɛlbwa toole dɛ so le dɛ tɛ o ɡbo, bɛlbwa ɡe toole o seo ɛ o ɡbo wa.

⁸ Yaa lɔ mkpa ta nɔ, dɛ ya Dɔɔ Yeesu waa ya do le. Dɛ ya baa sewɛ ɡe aa, dɛ onee ya sewɛ tɛ. Anomanta, ya lɔ mkpa ta noo, sewaa ya sewoo, ya Dɔɔ Yeesuu dɔ yaa.

⁹ Yeesu Kristo seo waa sewa dɛ ir la, o ɛ ɡɛ dɛ ɛ weera ne lala bwa dɔɔ.

¹⁰ Aah dɛ bɔkwaa ɡela he nɛra haa wola ol di ɛɛ pwah he bala baa dɛ di komɛlbwa nɔɔ? He banɔ la haa dɛ di komɛlbwa ɡe la, bɔkwaa ɡela hɛɛ lii he bala baa wola ol di nɛndoŋa nɔɔ? Ya bwa ɛɛ che Korowii siee, ásɛ o bol ya waa dɛ́ pa bole.

¹¹ Korowii Tɔn baɡlɔ kɛŋɔ, “N Naa Korowii bolɔ ŋɔ, ‘N ŋwɛɛrɔ kɛŋɔ nɛra bwa ɛɛ ɡuŋ mɛ harɛɛ, ásɛ nomɛlbwa di kasinteŋ kɛŋɔ Korowiirii men.’ ”

¹² Anomanta, ya bɛlbwa ɛɛ baɡle o toma waa ɛa Korowii siee.

¹³ Aa do ɡɛ nɔ, yá ɡel dɔŋa pwaeh. Waa aa chɛ kɛ yaa ɛ laanee kɛŋɔ ya ɛ ya liire kɛŋɔ waa aa ɡel ya dɔŋa lɔ naa dɛ chole kɛɛ ba ɛ wechɔɡa la, yaa ɡel a ɛɛ.

¹⁴ Pɛɛ n ne n Dɔɔ Yeesu aa pɛa nɔ ɡelɔ n jemɛ kaih kɛŋɔ, kondikwaa bɛlbwa toole dɛ ɛ kondikondoŋa. Kɛ dɛ nomɛl lii o nyu bini kɛŋɔ kondikwaa ane ɛ kondikondoŋa aa, dɛ a ɛ doŋa dɛ tɛo.

¹⁵ Dɛ he koh he kondikwaa waa dɛ ɡel he dɔŋ ɛ wechɔɡa o tea bini chɔɡ aa, dɛ he dɛ nyinu wa aa? O waa Yeesu Kristo koh dɛ sewɛ, anomanta, bɛ ɡel he kondikwaa haa dɛ di la chɔɡo.

¹⁶ Bɛ ɡel nɛra dɔ ŋwɛnɛ dɛ yerɛ waa haa dɛ liira wedɛɛɡa la wedoŋa.

¹⁷ Kondikwaa yaa dɛ di ne anɔ la yaa dɛ ki la ta wejena bɛlbwa ɛɛ Korowii Kora waa bini. Waa aa ɛ wehiah laanee kɛŋɔ ɡɛ yaa ɛ ya waa su Korowii siwi, ne waa aa dɛ ba deŋnesɔɔhna ne ya ne ya dɔŋa baah ta, ne silɛɛ aa le Korowii Domadɛɛɡe be.

¹⁸ Nɛn a ɡɛ waa nɔ aa hiaoh Yeesu Kristo toma bini la, Korowii sie dɛ lɛ o nɛ, asɛ o wa ɛɛ su nɛwɛnyina ɡe siwi.

¹⁹ Anomanta, a chɛ kɛ ya ɡel ya siwi swɛɛ waa aa dɛ ba deŋnesɔɔhna ne, ne waa aa dɛ ba ɡela ya dɔŋa che kiŋkiŋ ta.

²⁰ Bɛ kondikwaa waa koh dɛ́ chɔɡ waa Korowii aa ɛa. Ya won kondikwaa bɛlbwa dii, kɛ aa were kɛŋɔ ya di kondikwaa aa dɛ ba nɛn ne wechɔɡa ta laŋa.

²¹ Waa aa toɡra kɛ hɛɛ ɛ laanee kɛŋɔ ol dii ne sen nyɔe, ne wobɛlbwa aa dɛ ba wona ɡel he dɔŋ lɔ naa chole la, a chɛ kɛ he laa he te kpɔ a ta.

²² Gɛ he liire aa dɛ ɛɛ kondikwaa dii be pera la, kpoŋe a bini ɡɛ, ásɛ a do he ne Korowii ɡbo baah ta. Nomɛlbwa waa dɛ ɛ wobɛlbwa dɛ jemɛ kɛŋɔ aŋwɛnɛ taa wɛɛ ɛa, aa wola o liire bini aahna aahna ɛ la, o na som!

²³ Kɛ dɛ o dɛ di komɛl dɛɛ ɛ aahna-aahna kɛŋɔ o ɛ kondoŋ kɛɛ o ta kondoŋ ɛɛ yaa, Korowii ɛɛ pao bolchɔɡee kɛŋɔ waa dɛ diu, dɛkalkɛŋɔ o waa waa dɛ ɛ la, waa an ɛ yarada ne. Wobɛlbwa ɡe nɛn aa dɛ ɛ waa wola an ɛ yarada ne, o liire aa wola on kɛrɛdɛ do a ta la, a ɛ wechɔɡa.