Tɔn Pɔɔl Aa Chwerɛ Rom Tena 12 - mzwDBL

Ya kpɔ ya te ɛ saraha tɛ Korowii

¹ Anomanta, yabala, n dɛ soŋe heya. Hé nyiŋi Korowii suna waa sune ya nɛɛ la dɛ́ kpɔ he te tɛo. Gɛ baa kpɔ kondɛɛɡa aa chɛ Korowii dɛɛ su o siwi dɛ kpo dɛ ɛ saraha tɛo dɛɛ tomɔ la, hé ɡe kpɔ he te kɛŋɔ ɡɛ saraha la, dɛ́ laa doŋa bɛlbwa kpɔ he nɛɛ dɛɛ tomɔ he bokpeɡa ne. Gɛɛ a chɛ kɛ hɛɛ tomɛ Korowii.

² He bɛ nɛra baa dɔ harɛ nɔ ta liire la da kpɔ. Hé ɡel Korowii tɛ heyaa liifala, dɛ́ berɛ heyaa ásɛ he won jemɛ waa waa dɛ nyin, dɛ́ jemɛ waa aa wera o be dɛɛ too o tea, ne waa aa toɡra.

³ N cheɡɛ suna Korowii aa sune n nɛɛ dɛ kpɔ o toma do n nɔn ta nɔ ta, dɛɛ ja heyaa kɛ ɡɛ bɛlbwa haa doa la, ɡel ba nae ɡɛ. Bɛ́lbwa pwɛr o te, dɛ́ won jemɛ waa Korowii aa tɛo yarada ŋɔ ó kpɔ ɛ.

⁴ Ya bwadabii ɛ kombeŋkpoŋ, dɛ dɔ nyu, ne nɔɔra, ne nakpale, dɛ amesoore bwa. A bwa ɡe ne a tomaree.

⁵ Gɛɛ ya ɡba do. Ya warɔ te, kɛ ya ne Yeesu Kristo aa pɛa nɔ, ya bwa ɛ beŋkpoŋ, ya bɛlbwa ɡe lole tɛ ya dɔŋa.

⁶ Kpeɡri Korowii aa cha ya bwa ya dɔ kokoɡrɔ. A chɛ kɛ ya bɛlbwa kpɔ kpeɡri Korowii aa sune o nɛɛ dɛ tɛo la ɛ toma. Dɛ Korowii Waa bola kpeɡrii o kpɔ tɛɛ naa, a chɛ kɛ hɛɛ bola ɡɛ del he yarada aa doa.

⁷ Dɛ he dɔŋa toma kpeɡrii Korowii tɛɛ naa, a chɛ kɛ hɛɛ ɛ ɡɛ. Dɛ waa baɡla kpeɡri ɡee o tɛɛ naa, a chɛ kɛ hɛɛ baɡle.

⁸ Dɛ nɛra ɡbemba doe kpeɡrii Korowii tɛɛ naa, a chɛ kɛ hɛɛ ɛ ɡɛ. Dɛ dɔŋa kwaa kɛɛ kpeɡrii o tɛɛ naa, a chɛ kɛ hɛɛ ɛa bambile bwa ne. Dɛ waa sie tɔe kpeɡrii o tɛɛ naa, a chɛ kɛ hɛɛ ɛa tea bwa ne. Dɛ wedɛɛɡa ɛɛ kpeɡrii o tɛɛ naa, a chɛ kɛ hɛɛ ɛa tepoŋ ne.

⁹ Hɛ́ɛ nyin dɔŋa bambile bwa ne. Hé hah wechɔɡa te bɛlbwa, dɛ́ lawɛ wedɛɛɡa te bɛlbwa bini kpoŋe kiŋkiŋ.

¹⁰ Hé lawɛ dɔŋa kɛ nyabii, dɛɛ tɛ dɔŋa duure ɡwaa ɡɛ haa dɛ lii he te ɡbaɡba.

¹¹ Hé laa bɔhwaah kpɔ he waa bini, dɛ́ do ɡbemba dɛɛ tomɛ ya Dɔɔ Yeesu Kristo.

¹² Haa dɔ hwɛɡa nomanta, hé ɡel he sie lɛ. Wobɛlbwa pu heya aa, hé lawɛ bambile. Hé swɛɛ siwi dɛɛ soŋe Korowii saŋ bɛlbwa.

¹³ Hɛ́ɛ tɛ he dɔŋa asɔre tena ba soɡa bini aa kpeɡa tɛɛ ba he kwaa haa dɔa la ane. He bɛ hɔɔhra dɛɛ doŋi he deremi.

¹⁴ Hé soŋe andɛɛɡa Korowii be dɛɛ tɛ nɛra baa cheɡɛ he nɛ. Hé soŋe andɛɛɡa dɛɛ tɛɛ ba, he bɛ wechɔɡa soŋe dɛɛ tɛɛ ba.

¹⁵ Nɛra lɔ silɛɛ bini naa, hé puu ba he ne ba lɛ sie. Ba dɛ wi ɡe aa, hé ne ba wi.

¹⁶ Hé ne he dɔŋa so sodɛɛɡa. He bɛ jenu dɛɛ ɛ, he bɛ he te pere dɛɛ le nyaara ne nɛŋɡwɛɡra bini. He bɛ he te wejerema kohona dɛɛ lii.

¹⁷ He bɛ wechɔɡa kpɔ dɛɛ bɔ wechɔɡa kem. Hɛ́ɛ ɛ waa aa wera nomɛlbwa be.

¹⁸ Dɛ aa maɡroo waa, hɛɛ wonoo waa, hé takapɔ ásɛ wechɔɡa bɛlbwa bɛ he ne nomɛlbwa baah do.

¹⁹ Yabala, nɛra ɛ heyaa wechɔɡa aa, he bɛ ane ɛ dɛɛ bɔ kem. Hé kpɔ tɛ Korowii. O baah dɛ di ba nɛɛ taeh. On dɛ bɔ ba kem, dɛkalkɛŋɔ ba chwerɛ Korowii Tɔn bini ŋɔ, “Korowii bolɔ ŋɔ, ‘Mɛɛ tɔ a peɡee, mɛɛ bɔ ba a kemee.’ ”

²⁰ He bɛ waa kem dɛɛ bɔ. Hɛ́ɛ ɛ ɡɛ Korowii Tɔn aa ŋɔa hɛ́ɛ ɛ la. “He dɔm chɔ lɔr aa, tɛo kondikwaa ó di. Nyɔɡre dɛ kpoo waa, tɛo nee ó nyɔ. He ɛ ken aa, sihiih dɛ ba o kpoe o baŋa ɡole.”

²¹ He bɛ ɡel liichɔɡa lɛ he lem. Hé kpɔ wedɛɛɡa dɛɛ tɔ wechɔɡa ŋwɛnɛ.