Tɔn Pɔɔl Aa Chwerɛ Rom Tena 11 - mzwDBL

Korowii ta o nɛra Israel tena waa soɛh

¹ N dɛ bɔɔ heyaa ŋɔ, Korowii vɛh o nɛra Israel tena kɛɛ? Akai! N ɡbabir nɔ, Israel tee men. N ɛ Abraham naa dɛ le Bɛnjamen dea.

² Korowii ta nɛra o fa aa lee ba cheɡ wubwa ba ɛ o nɛra la vɛɛh. Kɛ he jemɛ ɡɛ Korowii Tɔn aa bol Korowii keame Elaeja waa ŋɔ o chɔɡ Israel tena tɛ Korowii laɔ?

³ O bolɔ ŋɔ, “N Naa Korowii, ba kpoo he keamere dɛ huɡri bela baa kpoo kwaa dɛɛ tɛɛ bwa. N ɡboo kaa, dɛ ba dɛ nyin n ɡba kpoe.”

⁴ Ɛrɛɛ Korowii chaŋe Elaeja ɔ? O chaŋo ŋɔ, “N ta dɔ nɛra kaɡboŋa banuanɛ bane ba do le dɛ ɛ n nɛra baa wola voɡ Baal ɡuŋe bwa.”

⁵ Gɛɛ a do taraken. Nɛra tama bane ta lole Korowii aa na ba sum dɛ lee ba ba ɛ o nɛra.

⁶ Ba we-ɛɛla ta laa a che o lee ba. Ba sumii o na dɛ lee ba ba ɛ o nɛra. Dɛ ba we-ɛɛla taa a fe che o lee ba ba ɛ o nɛra aa, dɛ suna baa ŋɔa Korowii dɛ sune nɛwɛnyini nɛɛ dɛɛ cha ba la ta mun dɔe.

⁷ Ɛrɛɛ yaa ba ŋɔe yɔ? Gɛ Israel tena aa dɛ nyin kɛ ba waa su Korowii siwi la, ba ta ɡɛ dɔe. Nɛra tama Korowii aa lee ba ba ɛ o nɛra la, ba waa su o siwi. Ba kar taŋ deŋne Korowii be.

⁸ Anee ba chwerɛ Korowii Tɔn bini ŋɔ, “Korowii saa ba liire, dɛ tɛɛ ba sie aa wola kasinteŋ laanee na, ne deŋna aa wola kasinteŋ laanee no, dɛ kpoŋe ba le fini tɔpere nɔ” la.

⁹ Ya nabaa Devid bolɔ ŋɔ, “Korowii, ɡɛ saŋ baa dɛɛ di kwaa dɛɛ lɛ ba sie la, ɡel siswɛm piɡ ba. Gel waa ba sie aa dɛ lɛ a ta la ɛ kon baa lɔ naa o ta dɛɛ choɡli, dɛ́ ɛ bel dɛɛ laɡ ba, ásɛ ba wa ɛɛ ɡure ba nɛ.

¹⁰ Gel ba nyoŋe, ásɛ dɛɛ na wahala saŋ bɛlbwa.”

Nɛra baa wola Juu tena ɛɛ lɛɛ wa

¹¹ Mɛɛ bɔɔ webeŋkpoŋii ja. Israel tena aa lɔ naa dɛ chole la, ba denɔ chole baa wola won ir kpa aa? Akai! Baa iruu, kɛ ba wechɔɡa la taa a che Korowii lɛɛ waa lɛ nɛwɛnyina la maa nɛra baa wola Israel tena ɛɛ, ásɛ Israel tena na ba bwara wee ba.

¹² Israel tena wechɔɡa baa ɛa la ba wedɛɛɡa ne ba tɛ nɛwɛnyina, asɛ ba chola baa chola dɛ paŋɛ kwaa Korowii be la ɡe ba wedɛɛɡa tenten ne dɛ ba tɛ nɛra baa wola Israel tena ɛɛ. Israel tena chola la kwaraa aa ba wedɛɛɡa ne ba tɛ nɛwɛnyina nɔ, dɛ ba bwa lɛ Korowii wa aa, ɛrɛɛ aa ba doe yɔ?

¹³ He nɛra haa wola Israel tena ɛɛ la, he bee mɛɛ bol waa nɔ. Korowii aa lee mɛ ŋɔ ń ɛ Yeesu torome he be nɔ, mɛɛ maŋkura n toma nɔɔ.

¹⁴ Bɛl lole n bwɛɛ tena na ɡɛ naa, baa meeroo, asɛ a che a ta ba bane lɛ Yeesu waa nɔ.

¹⁵ Aa cheɡɛ Israel tena ne Korowii baah chɔɡa ta asɛ nɛwɛnyina kabora ne Korowii baah kwaa nɔ, dɛ Korowii berɔ lɛ Israel tena dɛ kpɔ ba ɛ o bii aa, bɔkwa nee aa ba bala ɔ? Aa ba silɛɛ nee kohona, kɛŋɔ lala bwa aa ir seo ta.

¹⁶ Dɛ kon pera wer dɛ chɛ Korowii aa, dɛ o kar la bwa ɡe wer. Dɛ daa lune wer dɛ chɛ Korowii aa, dɛ o ne o kpala bwaa.

¹⁷ Moo laa pala dɛɛ kaa nyundua la aa? Israel tena do kɛ kobaah ɔleve da. Ba teŋe o kpala ane ta, dɛ kpɔ hen haa wola Israel te ɛɛ dɛ do kɛ kpɔɡ baah ɔleve daa kpale, dɛ ba vɔrɔwe marɛ kobaah kon la bɛl buɡ ta, asɛ hɛɛ nyɔ o nedɛɛɡa dɛ di, dɛ dɛɡ.

¹⁸ Anomanta, bɛ kena dɛɛ kpaɡri daa kpala la baa kɛa ta la nɛ. He mbarafo mun ɔ? Daa kpale laa hen kɛɛ? Hen ɡela daa la lune do le kɛɛ an ɡela he do le nɔ?

¹⁹ He te ɛɛ ŋɔɔ he waa ba kɛ daa la kpala la ta asɛ dɛ vɔrɔwe marɛ.

²⁰ He ŋɔ ɡɛ naa, kpelaa he ŋɔ. Baa wola Yeesu waa la yaradae waa ba teŋ ba ta. He ɡe aa yarada Yeesu waa la, a waa he ta che la. Anomanta, bɛ mbarafo dɛɛ ɛ. Pwɛr he te dɛɛ nyiŋi kɛrɛdɛ.

²¹ Israel tena kwaraa baa ɛ daa la tenten pera la, Korowii kɛ ba ta. He tenee dɛ ɛ deŋnekpeɡ, waa wola heyaa kɛ ta aa?

²² He nyiŋo na naa, dɛ he jemɔ kɛŋɔ Korowii tea som, kɛ o waa ɡe kpeɡri taeh. Nɛra ba deŋne aa kpeɡa baa wola o ŋwɛnɛ ta teŋɛ la, o dɛ nyiŋ ba sinyɛɡa ne. Kɛ dɛ hɛɛ dɛɛ teŋɛ o ŋwɛnɛ taa te naa, wɛɛ ta tea tɛ he te. Kɛ dɛ he ta o ŋwɛnɛ ta teŋaa, wɛɛ kɛ he ɡee ta.

²³ Dɛ Israel tena berɔ yarada Yeesu waa la te naa, Korowii ɛɛ berɔɔ lɛɛ ba do ba buɡ ta, dɛkalkɛŋɔ aa kpeɡe o be.

²⁴ Korowii laa ɡela ba teŋe he nɛra haa do kɛ kpɔɡ baah ɔleve daa kpala, dɛ ba vɔrɔwe marɛ kobaah ɔleve daa muŋkpul ta nɔ naa, ba fe aa an ɡɛ ɛ wubwa. Aah dɛ Korowii won he nɛra haa do kɛ kpɔɡ baah ɔleve daa kpala kwara kɛɛ, dɛ vɔrɔwe marɛ kobaah kwaa kwaraa ta a maɡre aa, Israel tena baa do kɛ kobaah ɔleve daa kpala waa kɛa ta la, ɛrɛ waa dɛ o berɔ kpɔ ba vɔrɔwe marɛ ba buɡ ta aa wola maɡre ɔ?

Korowii ɛɛ lɛ Israel tena bwaa

²⁵ Yabala, wesɔɔhla anee mɛɛ nyin kɛ he jemɛ, ásɛ dɛ jemɛ kɛŋɔ wobɛlbwa laa he den jemɛ. Anee kɛŋɔ Israel tena nɔ bane deŋnekpeɡ baa dɛ ɛ nɔ, ken laa aa ba kae. Nɛra baa wola Israel tena ɛɛ Korowii ɛɛ nyin kɛ o lɛɛ ba la, ba tel ɡɛ del waa dɛ nyin la aa, Israel tena ɛɛ ɡel ba deŋnekpeɡ nɔɔ.

²⁶ Anomanta, Korowii ɛɛ lɛ Israel tena bwaa ba ɛ o bii, kɛŋɔ Korowii Tɔn aa baɡla la. O baɡlɔ ŋɔ, “Nɛwɛnyina Lɛɛ la ɛɛ le Saayɔnee ba, dɛ́ ba le Israel tena waa aa ɡela baa wola Korowii waa ta teŋɛ bwa la ta.

²⁷ Fɔo n ne báa fɔwɛ laanee kɛŋɔ mɛɛ lee baa ba wechɔɡa taa.”

²⁸ Israel tena aa vɛh Yeesu Amanesoma la nomanta, ba berɛ Korowii dɔma, asɛ a le wedɛɛɡa tɛ heya. Kɛ baa ɛ nɛra Korowii aa chal ba la nomanta, o ta dɛ nyin ba taeh. Nyoa waa baɡɛ ba naawa la, a waa o taa nyin ba la.

²⁹ Korowii te dɔɔ ŋɔ o nɛnee nɛn, dɛ ŋɔ wɛɛ ɛo wedɛɛɡaa yaa, waa nsana le.

³⁰ Gɛ he nɛra haa wola Juu tena ɛɛ fa aa wola Korowii waa ta teŋɛ, asɛ o koh kɛ Israel tena vɛh o waa ta teŋa, asɛ dɛ sune he nɛɛ la,

³¹ ɡɛ tenten Israel tena aa vɛh Korowii waa ta teŋa la, wɛɛ koh suna waa sune he nɛɛ la waa dɛ́ sune ba ɡe nɛ.

³² Nɛwɛnyina bwa taŋ deŋne Korowii be, asɛ o koh a waa dɛ pa nɛra bwa bolchɔɡe. Ŋwɛnɛ bɛlbwa toole yá che o ta dɛ́ le a ɡɛ bolchɔɡe nɔ ta. A ɛ ɡɛ ásɛ Korowii na ya bwa sum.

Korowii kpɛɛra

³³ Ei! Korowii liire ne o wejema kan te! Umee dɛ́ won jemɛ Korowii waa mun ɔ? Umee dɛ́ won jemɛ o waa bini bwa nɔ?

³⁴ Anee Korowii Tɔn baɡle la. O bolɔ ŋɔ, “Umee jemɛ Korowii nyu bini nɔ? Umee dɛ́ won baɡlo waɔ?

³⁵ Ume komɛlee Korowii kemɛ ka a ɛ kɛŋɔ Korowii di o kem dɛ ba bɔɔ wɔ?”

³⁶ O ta nomɛlbwa kem dii, dɛkalkɛŋɔ on ta kon te bɛlbwa. O nɛɛ komɛlbwa che dɛ do le, o waa ɡee a do le. O chɛ jirima saŋ bɛlbwa. Aamen.