Tɔn Pɔɔl Aa Chwerɛ Rom Tena 1 - mzwDBL

¹ Men Pɔɔl maa ɛ Yeesu Kristo bonɔɔ la, men chwerɛ tɔn nɔ. Korowiirii lee mɛ dɛ ɡel n ɛ Yeesu torome, dɛ kpɔ o Amanesoma tɛ mɛ ŋɔ mɛ́ɛ bol nɛra be.

² A ɡɛ Amanesoma nɔ waa o che o keamere waa lee ba nɛɛ dɛ baɡɛ nɛwɛnyina nyoa a saŋ la. A waa ba chwerɛ Korowii Tɔn bini la.

³ Korowii Bie Yeesu Kristo waa ɛ ya Dɔɔ la, o waa Amanesoma la ɛɛ baɡle. O nɛwɛnyini ɛɛ be pera la, Kooro Devid deaa o le,

⁴ asɛ o Korowii ɛɛ ɡe be pera la, Korowii cheɡɛ o seo ta ira la ta, dɛ baɡle kpeɡri ne kɛŋɔ o Korowii Biee on.

⁵ O nɛɛ Korowii che dɛ sune n nɛ, dɛ cha mɛ, dɛ ɡel mɛɛ ɛ Yeesu toma dɛɛ baɡle nɛwɛnyina te bwa o waa ásɛ ba yaradaa dɛɛ ɛa, ásɛ o dɔ sɔn.

⁶ He Rom tena ɡe ja a ɡɛ nɛra nɔ Korowii aa lee ba ŋɔ bá ba ɛ Yeesu Kristo nɛra nɔ nɛ.

⁷ He Rom tena Korowii aa dɛ nyin heyaa dɛ le heyaa ŋɔ hé ba ɛ o nɛra he wa aa toɡra la, he bwaa mɛɛ chwerɛ tɔn nɔ. Ń Naa Korowii ne ya Dɔɔ Yeesu Kristo bwa na he sum, dɛ́ cha heya, dɛ́ tɛ heyaa bosɔɔhna.

Korowii soŋa ne o jaama

⁸ Mɛɛ tɔ sie che Yeesu Kristo nɛɛ dɛ́ jam N Naa Korowii he waa kɛŋɔ haa yarada Yeesu Kristo waa nɔ kohona, asɛ nɛra bwa ɛɛ bol he waa nɔ.

⁹ Korowii maa dɛ tomɔ n bambile bwa ne, dɛɛ bol o Bie la Amanesoma waa la, o jemɔ kɛ saŋ bɛlbwaa n soŋo dɛɛ tɛ heya. Onee n danseɛ te.

¹⁰ N dɛ soŋo kɛŋɔ dɛ o sɛoh waa, ń fe won ba na heyaa taraken te.

¹¹ N sie cheɡɛ chiŋ mɛɛ nyin kɛ n na heyaa dɛ́ cha heyaa waane Korowii Domadɛɛɡe la aa tɛ mɛ ne, ásɛ he do kpeɡri he teŋa haa dɛ teŋɛ Yeesu nɛɛ la ta.

¹² Ya bwaa dɛɛ ba dɔŋa chae. Gɛ maa yarada Yeesu Kristo la, aa do heyaa ɡbembaa, ásɛ ɡɛ he ɡe aa yaradao la do n ɡe ɡbemba.

¹³ Yabala, n dɛ nyin kɛ hé jemɛ kɛŋɔ saŋ bɛlbwaa n fe ɛɛ nyin kɛ ń ba he be, asɛ waa yon dɛɛ tɔ mɛ ŋwɛnɛ. N dɛ nyin ń dɔ he bane dɛ tɛ Yeesu Kristo kɛŋɔ maa dɔ bane le nɛra ba ɡe aa wola Juu tena ɛɛ bini la.

¹⁴ A chɛ kɛ ń bol Yeesu Amanesoma la nɛra bwa be, nɛra baa kaa sie ne banɔ la baa ka mun, nɛra ba sie aa pila ne banɔ la ba sie aa wola pile bwa be.

¹⁵ Anomanta, n siwi swɛɛrɔ mɛɛ nyin kɛ ń bol Yeesu Amanesoma la he Rom tena ɡe be.

¹⁶ Sihiih aa men kpo Yeesu Amanesoma nɔ bola ta. A taa Korowii che dɛɛ baɡle o kpeɡri, dɛɛ lɛ nɛra bwa baa yarada o waa la. Juu tenaa ó tɔ sie lɛ, nɛra baa wola Juu tena ɛɛ ɡe jao.

¹⁷ Yeesu Amanesoma laanee dɛɛ baɡle ɡɛ Korowii aa dɛ nyin kɛŋɔ nɛwɛnyini do ásɛ ya waa su o siwi. Le waa la mumpar ka tel a jaɡa bwa, o waa yaradae waa ɡboo a bwa. Korowii Tɔn baɡlɔ kɛŋɔ, “Naate o wa aa toɡra dɛ su Korowii siwi la, wɛɛ yaradao dɛ́ dɔ o nyu.”

Korowii baah diu kohona nɛwɛnyina wechɔɡa wa

¹⁸ Korowii baah di nɛra ba wechɔɡa aa tɔ o kasinteŋ waa la ŋwɛnɛ asɛ a sɔɔh ba la nɛ. O baah dɛ di ba wechɔɡa la ta kɛrɛdɛ.

¹⁹ Korowii wobɛlbwa nɛwɛnyini aa wona jemɛ la, o ɡelɔ ba naa chasee ken. O ɡbaɡbaa pili a bini baɡ ba.

²⁰ Dɛ́ le ɡɛ saŋ Korowii aa ta harɛ la, o bwara waa nɛwɛnyini aa wola wone dɛɛ na siwi ne, kɛŋɔ o kpeɡri aa wola jaɡa dɔe ne o dor bwa, o ɡelɔ nɛwɛnyini na a bwa. Nɛwɛnyini wono che Korowii kwaa waa taa ta, dɛ na o kpeɡri ne ɡɛ waa doa. Anomanta, nɛwɛnyini aa won ŋɔ baa jemɛ kɛ Korowii lole.

²¹ Nɛwɛnyini jemɔ kɛŋɔ Korowii lole, kɛ baa on duu ɡɛ aa chɛ kɛ baa duuru. Baa jam kpɔe dɛɛ tɛo. Nɛwɛnyini wechɔɡa ɡelɔ ba wili, ba ta liire dɔe kpa.

²² Ba dɛ yerɛ ba te wejerema, kɛ ɡɛna ɡee ban.

²³ Korowii te aa sewɛ bwa. Kɛ ba vɛh o toma, dɛɛ tomɛ kwaa ba ɡbaɡba aa kwaara a do kɛŋɔ nɛwɛnyini, kɛɛ jumbii, kɛɛ konaatena, kɛɛ kontuuɡa la.

²⁴ Anomanta, Korowii ta ba waa tɛɛ ba, asɛ baa ɛ wedoŋa ba bambile aa lawa, dɛɛ chɔ baala ne haahna aa wola Korowii ŋwɛnɛ ta ɛɛ.

²⁵ Ba ɡel Korowii kasinteŋ la toma, dɛɛ tomɛ kwaa aa wola kasinteŋ dɔe. Kwaa Korowii aa taa la, anee baa tomɛ, dɛ ɡel Korowii ɡbaɡba. On chɛ kɛ yaa kpɛɛro saŋ bɛlbwa. Aamen.

²⁶ Ba ken ɛɛ nomanta, Korowii ta ba waa tɛɛ ba, asɛ baa ɛ ba pɛla waa aa ɛ sihiih kohona. Ba haahna kwaraa ne baala aa chɔ kpa, ba ne ba dɔŋa haahnaa dɛɛ chɔ baa ne haah.

²⁷ Gɛɛ ba baala ɡe ne haahna aa wola chɔ kpa, dɛ berɛ dɛɛ pɛlɛ ba bandɔŋa nɛɛ kɛŋɔ haahna ken. Ba ne ba dɔŋa baalaa dɛɛ chɔ baa ne haah. Ba wechɔɡa baa dɛ ɛ la nomanta, ba dɛ dɔ a kembɔr aa chɔɡ ba nɛndaa.

²⁸ Baa wola sɛɛh kɛŋɔ bá jemɛ Korowii waa nomanta, o ta ba waa tɛɛ ba, asɛ ba liire bwa ɛ anchɔɡa, asɛ baa ɛ waa aa wola chɛɛ kɛ baa ɛ.

²⁹ Harɛ bini wechɔɡa nɔ bwaa baa ɛ, mur ne sibeɡra ne meesɔɔh, ne bɔweela ne nɛŋkpoa, ne naɡra ne dɔŋa neɡra, ne dɔŋa haeh dɛ nɛra ŋwala.

³⁰ Baa dɔŋa wedɛɛɡa bol, ba hah Korowii, ba siwi aa nɛn tɔɡɛ, ba jenu, ba mbarafo. Saŋ bɛlbwaa baa nyin ŋwɛnɛfala dɛ́ ɛ wechɔɡa. Ba siwi aa ba mɛɛnanar ne ba nyare su.

³¹ Ba nya nfɛrɛ, ba waa ta kasinteŋ dɔe, ba chal toole dɔŋa nɛ, ba tea aa nɛn nɛɛ domɛ.

³² Ba jemɔ kɛŋɔ Korowii ŋɔ nɛra baa dɛ ɛ ken la, ba chɛ kpoe, kɛ dɛ ɡe ta na dɛɛ ɛa, dɛ ɡarɛ dɛɛ kpɛɛ nɛra baa dɛ ɛa la.