Faelemɔn 1 - mzwDBL

¹ Men Pɔɔl baa koh Yeesu Kristo waa dɛ do mɛ dea la, ne ya dɔŋ Timotii chwerɛ tɔn nɔ dɛɛ tɛ ya dandɛɛɡe Faelemɔn waa bera ɛ ya dɔŋ tom-ɛɛ ɡe la,

² ne ya nimambie Afia, ne ya dɔŋ Akipus ya ne waa cheɡa dɛ yo dɛɛ tɛ Korowii o toma nɔ ta la, ne asɔre tena baa dɛ cheme he dem la bwa.

³ Ń Naa Korowii ne ya Dɔɔ Yeesu Kristo cha heya, dɛ tɛ heyaa bosɔɔhna.

Jaama ne wesoŋa

⁴ N Korowii soŋa bini te bɛlbwa, n dɛ yerɛ he Faelemɔn sɔn dɛ kpɔ jam dɛɛ tɛ Korowii,

⁵ dɛkalkɛŋɔ n no he nyina haa dɛ nyin Korowii nɛra ba wa aa toɡra bwa, ne ɡɛ haa dɛ yarada ya Dɔɔ Yeesu la wa.

⁶ Waa maa dɛ soŋe Korowii laanee kɛŋɔ nyopɛo la he ne o nɛra aa dɔa hɛɛ yaradao la chae kɛrɛdɛ, ásɛ he won jemɛ wedɛɛɡa te bɛlbwa Korowii aa dɛ nyin o cha yaa ya won dɔ, pɛɛ ya ne Yeesu Kristo aa pɛa la nomanta.

⁷ N dam, he nyina haa dɛ nyin Korowii nɛra ba wa aa toɡra la dɛ do mɛ ɡbemba dɛ ɡel n sie ɛɛ lɛ taeh, dɛkalkɛ he dɛ nyiŋ ba dɛɛ do ba ɡbemba.

Pɔɔl soŋɔ tɛ Onisemɔs

⁸ He nɛnnyin nomanta, n dɛ nyin kɛ n soŋe waane. N fe dɔ ŋwɛnɛ Yeesu Kristo be pera kɛŋɔ ń di kpeɡri he nɛɛ dɛ́ ŋɔ hé ɛ ɡɛ aa wera kɛŋɔ he ɛ, kɛ maa ɡɛɛ ɛ.

⁹ Nyina haa dɛ nyin nɛra la taa n che dɛɛ soŋe, nyiŋi ɡɛ men Pɔɔl aa ɛ banjena, ne dea baa koh Yeesu Kristo waa dɛ do mɛ nɔ ta dɛ no n waa nɔ.

¹⁰ He nɛndɔɔle Onisemɔs waa ɛ n bie Yeesu Kristo be pera la naa taa n che dɛɛ soŋe waa nɔ. Gɛ saŋ baa do mɛ dea la taa n bol Yeesu waa baɡlo o kpɔ o te tɛo.

¹¹ Wubwa la dɛ o ta tɔnɔ dɔe tɛɛ, kɛ taraken te o dɔ tɔnɔ tɛ ya bwa.

¹² N ɡelɔ wɛɛ ba he be kɛŋɔ n ɡbaɡba bie maa dɛ nyinu n bambile bwa ne la.

¹³ N fe dɛ nyin kɛ o do n be bonɔ, dɛ́ che he naa ta dɛɛ cha mɛ n dea doe nɔ baa koh Amanesoma la waa dɛ do mɛ nɔ ta.

¹⁴ Kɛ maa nyin n ɛ wobɛlbwa dɛ́ le he habɔɔ dɛ n ta he be ŋɔe, ásɛ a ba ɛ kɛŋɔ n dɛ di kpeɡri he nɛ. N dɛ nyin kɛŋɔ wedɛɛɡe haa ɛ la le he ɡbabir bambile bini.

¹⁵ Bɛl lole naa, Korowiirii ŋɔa o ken le he nɔn ta tama mɔɔ dɛ berɛ ba he ne ó so ka tonɛ.

¹⁶ O ta he yom ɡbo ɛɛ kpa. O ɛ he nimedɛɛɡe ya Dɔɔ Yeesu be pera. Gɛ n kwara aa dɛ nyin o waa nɔ, n jemɔ kɛ he te ɛɛ nyin o waa ɡwaa ɡɛ, dɛkalkɛŋɔ o ɛ he yom ne he nime tenten ya Dɔɔ Yeesu be pera.

¹⁷ Dɛ he jemɔ kɛŋɔ n ne he bwa ɛ beŋkpoŋ aa, lɛo kɛŋɔ haa dɛ ba n lɛɛ ken.

¹⁸ Dɛ o fa ɛɛ wechɔɡa ane, kɛɛ dɛ he kem bɛlee o dio, kpɔ pɛɛ mɛ.

¹⁹ N Pɔɔl ɡbaɡbaa chwerɛ ɡɛ waa nɔ bonɔ kɛŋɔ mɛɛ bɔe kemee la. Kɛ jemɛ kɛ he ɡba di n kem Korowii mkpa la haa cheɡɛ n nɛɛ dɛ dɔ la ta.

²⁰ Anomanta, n dam, ɡel n ɡe dɔ tɔnɔ dɛ́ le nyopɛo n ne haa cheɡɛ Yeesu Kristo nɛɛ dɛ dɔ la ta, ásɛ n baah sɔɔh mɛ.

²¹ N jemɔ kɛŋɔ hɛɛ no n waa nɔɔ dɛ ɛ ɡwaa ɡɛ kwara. A waa n chwerɛ tɔn nɔ la.

²² Anɔ la ɡe aa jaa laanee kɛŋɔ nyin dea dɛɛ cheɡ mɛ. N dɔ hwɛɡa kɛŋɔ Korowii ɛɛ no he wesoŋa haa dɛ soŋo dɛɛ tɛ mɛ laanee ásɛ dɛ berɛ kpɔ mɛ ba tɛ heyaa ja.

²³ Epafras baa koh Yeesu Kristo waa dɛ do n ne on dea la dɛ nae.

²⁴ Gɛɛ Mak ne Aristakus ne Demas dɛ Luk baa ɛ n bala tom-ɛɛra la ɡe ɛɛ nae.

²⁵ Yá Dɔɔ Yeesu Kristo sune he nɛ, dɛ́ cha he bwa sekwaraa. Aamen.