Obadia 1 - mzwDBL

¹ Waa aa dɛ ba Edom harɛ ta chiɡa Nemenɛ Korowii kpɔ baɡle Obadia laanee nɔ. Ya noɔ ɡɛ Korowii aa bol Edom harɛ wa. O tomɛ o torome bɛl harɛre nɛra be ŋɔ, “Hé ir, ya kpɔ ya te ka pu Edom tena yo.”

² Korowii ŋɔ Edom tena be ŋɔ, “Mɛɛ ɡeloo he ɡwɛɡre harɛre nɛra bwa bini, ásɛ ba hah heya, dɛɛ nyiŋi he nyubaahna.

³ He mbarafo neɡre heya. He soɡe bɔɔne bini bwejena dor, dɛ yon ŋɔ, ‘Umee dɛ́ won ba n ne harɛ nɔ?’

⁴ A lole kɛ he soŋnibɔr lɔ nyundua, kɛŋɔ kee yon ka sɔh o kɔr nyundujaɡla la, kɛ mɛɛ ɡeloo he le bela ba harɛ. Men Korowiirii bola.

⁵ Ŋwɛɛra dɛ ba jwaana aa, anɔ la baa dɛ nyin ɡboo baa kpɔ. Nɛra dɛ pa daa nɔna aa, ba dɛ ɡel beŋkpoŋa ane. Kɛ he Edom tena te, he dɔma kpoo he bwa.

⁶ He Esɔ naanar, he dɔma pa he kondɔɔh haa kpɔa sɔh bwa kaa.

⁷ Nɛra he ne baa fɔwɛ fɔo ɛɛ le he ne he harɛ taa. Baa neɡre heyaa, dɛ́ pɔ he nɛ. Daamanar he ne baa pɛ nɔn di kwaa ɛɛ harɛ heyaa belii haa wola jemɛ.”

⁸ Korowii ŋɔ, “Awola tɔpere la, mɛɛ tɛr Edom wejerema deŋnee, nɛra baa dɛ no waa mun dɛ so bwejaŋa dor bwaa mɛɛ ba chɔɡa.

⁹ Bwɛjen Teman laa tena bwa ɛɛ ɔmɔɔ kohona. Baa kpoo ba bwaa Edom harɛ la taa.

¹⁰ Edom tena, haa cheɡɛ ŋwɛnɛchɔɡe ta kpoo he lolanar baa ɛ Jekɔb naanar nomanta, chɔɡaa hɛɛ ba chɔɡa, dɛ́ di ncho saŋ bɛlbwa dɛɛ la.

¹¹ Awola Jekɔb naanar dɔma aa lɔa ka tɔ Jerusalam tena nɛɛ la, he Edom tena cheɡɔ nyiŋi ba pa ba kondɔɔh bɔne dɔŋa. He ɡe ɛ nɛnchɔɡa kɛ ban.

¹² A fe ta chɛɛ kɛ he sie lɛ he lolanar baa lɔ Juda harɛ wenaale wa. A ta chɛɛ kɛ he hɛɡre ba chɔɡa wa, kɛɛ dɛ mam ba ba sibeɡra tɔpere wee.

¹³ A ta chɛ kɛ he jo n nɛra be bwɛjen la ta he sie lɛ ba wenaale wa, dɛ́ kpɔ kpeɡri pa ba kondɔɔh kaa ba chɔɡa tɔpere wee.

¹⁴ A ta chɛɛ kɛŋɔ he ka che ŋwɛnɛ chɛchɛre ta lawɛ banɔ la baa dɔ bɔr chwa le dɛɛ kaa la. A ta chɛ kɛ he kpɔ ba ka do ba dɔma nɔn ta ba sibeɡra tɔpere wee.

¹⁵ Tɔpere men Korowii aa kpɔ bol harɛre ta nɛra bwa waa dɛ́ pa bole la telo tonɛ. Gɛ haa ɛa nɔɔ mɛɛ ba kpɔa ɛ he Edom tena ɡe, he we-ɛɛla bwa ɛɛ ɡure he nyu taa.

¹⁶ N ɡelɔ n nɛra nyɔ n danana nee Saayɔn Bwejen waa do ɡoroŋ ta. Kɛ harɛre aa bara cheme nɔ nɛra ɡe ɛɛ nyɔ danana nee á ɡwaa a nɔ ka tel saŋ baa serewe.

¹⁷ Kɛ Jekɔb dea bii bane ɛɛ dɔ ba nyuu Saayɔn Bwejen la ta, ásɛ o ɛ bɔr waa do ɡoroŋ, bá berɛ dɔ harɛ waa ɛ ba kapɛrɛ kon wubwa la.

¹⁸ Jekɔb ne Josef nɛra ɛɛ doo kɛŋɔ nii, dɛ́ chɔɡ Esɔ dea bii ɡɛ nii yon dɛɛ fuh haahra la. Esɔ naanar bini bɛlbwa aa kae ba. Men Korowiirii bola.

¹⁹ Nɛra baa soɡa bɛne Nɛɡɛv pua hɛŋle ɡbo harɛ ta ɛɛ ba so Edom harɛ bwejaŋa doree, ásɛ banɔ la baa le deŋɡarere lɔɡre ba lɛ Filisti tena harɛ so. Israel tena ɛɛ ba so Efrem ne Samaria harɛre taa, ásɛ Bɛnjamen dea bii ɡe ba lɛ Gelead harɛ so.

²⁰ Israel laa tena baa chwaa ka so Keenan harɛ ɛɛ berɔɔ ba lɛ Foniisia harɛ, dɛ́ kpoŋe ka le Sarefat, dɛ́ so o ta, ásɛ banɔ la ɡe baa le Jerusalam dɛ do Sɛfarad la ka lɛ bwɛɛre aa lɔ Nɛɡɛv, dɛ́ so a ta.

²¹ Jerusalam baala baa yoa dɛ le la ɛɛ ka yo Edom tenaa, dɛ́ kpɔ harɛ la dɛɛ nyiŋi o ta. Asɛ Korowii ɡbabir ɛ ba kooro.”