Nɛra Kura 9 - mzwDBL

Galekaa Tɔpejen dii

¹ Mosis aa kpɔ Israel tena le Ijipt harɛ ta, bennɛɛte korobie beŋkpoŋ ta la, Korowii bol waa o be Sinai pua hɛŋle ɡbo harɛ ta dɛ ŋɔ,

² “Ŋɔ Israel tena la be baa di Galekaa Tɔpejen la o saŋ ta.

³ A chɛ kɛ baa diu saŋ men Korowii aa lea cheɡ la ta. Korobie nɔ tɔpera fi dɛ anaarɛ jɔmɔraa wee aa dɛɛ le harɛ la, bá diu. Bá teŋɛ o we-ɛɛla bwa ta, dɛ́ diu aŋwɛnɛ ta.”

⁴ Asɛ Mosis ŋɔ Israel tena la be ŋɔ bá di Galekaa Tɔpejen la,

⁵ anee ba di ɡɛ tɔpejen la Sinai pua hɛŋle ɡbo harɛ la ta, korobie waa tɔ sie, tɔpera fi dɛ anaarɛ ta jɔmɔra wee aa le harɛ la. Ba ɛ wobɛlbwa kɛrɛdɛ ɡɛ tenten Korowii aa do Mosis la.

⁶ Ba bini bane ta wone di Galekaa Tɔpejen la awola, dɛkalkɛŋɔ dɛ ba leɡe nomɛl waa sewa dɛ kah doŋa. Anomanta, ba la Mosis ne Arɔn be awola tenten,

⁷ dɛ ka ŋɔ, “Ya ta wone di tɔpere la doŋa yaa kaah dɛ le nomɛl aa sewa ya leɡo la wa. Kɛ bɔkwaa dɛɛ tɔ yaa ŋwɛnɛ, ya ne yabala Israel tena la bwa aa wola won pɛ kpɔ ya saraha kwaa saŋ nɔ ta ba tɛ Korowii ɔ?”

⁸ Asɛ Mosis ŋɔ, “Hé che bonɔ ásɛ n la ka no le Korowii be, ɡɛ waa do mɛ he waa nɔ wa.”

⁹ Belaa Korowii ŋɔ Mosis be ŋɔ,

¹⁰ “Gel Israel tena la no kɛŋɔ, dɛ ba bini bɛlbwa kɛɛ ba naanar bɛlbwa leɡe nɛn waa sewa dɛ kah doŋa, kɛɛ dɛ bobɛlee ba kaa ba ta wone di Galekaa Tɔpejen la aa,

¹¹ a chɛ kɛ bá diu korobinɛɛte tɔpera fi dɛ anaarɛ ta jɔmɔra wee aa le harɛ. Bá kpɔ pebie ja papojeɡre ane aa do nyɛɡre ne paanoo baa wola iisi a ta doe ta dɛ́ di.

¹² Ba bɛ ane kpɔ cheɡ tɔɔ per a ta, ba bɛ pebie la hoɡa ɡe bɛlbwa paɡre. Bá di Galekaa Tɔpejen la aŋwɛnɛ ta, dɛ́ teŋɛ o we-ɛɛla bwa ta.

¹³ Dɛ nomɛlbwa ta doŋa kaeh, o ta bobɛlbwa ɡe kaalɛ dɛ saah vɛh tɔpejen la dii yaa, baa naatee kure ja n nɛra nɛɛ kpa, dɛkalkɛŋɔ o ta o saraha kwaa kpɔe ba tɛ men Korowii a saŋ ta. Naate nyin waa dawɛ o nɛ, dɛ chɛ deŋnetɛra.

¹⁴ Dɛ hɔɔh bɛl soɡe he bini dɛɛ nyin kɛ o ɡe di tɔpejen la aa, hé tɛo ŋwɛnɛ. Kɛ hé ɡel o teŋɛ a ŋwɛnɛre ne a we-ɛɛla la bwa ta. A chɛ kɛ wesiwi beŋkpoŋ chɔ tɛ hɔɔhra ne Israel tena bwa.”

Bam waa baa tɔ Korowii Tɛnte Dea

¹⁵ Awola tɔpere baa tonɛ Korowii Tɛnte Dea waa ɛ o Dea Cheremibɔr dɛ cheɡ o koŋkwaa bwa la, bam baa tɔ o bwa. Dɛ o baa tɔ le jɔmɔra ka tel tɔɔ aa pera chɔɔbɔr aa, dɛ o do kɛŋɔ nii ken.

¹⁶ Gɛɛ aa ɛ, dɛ bam la baa tɔ o ta webaŋa ɡe aa, jwaana dɛ o berɔ do kɛŋɔ nii ken.

¹⁷ Dɛ bam la baa le o nyundua bela aa, ɡɛɛ Israel tena la yon ir teŋɛ ka so bela waa ka che.

¹⁸ Gɛ Korowii aa do ba la taa ba teŋɛ dɛ ir dɛɛ kaa, dɛ berɛ dɛɛ so. Dɛ bam la ta o nyundua leɛ yaa, baa bela ir.

¹⁹ Saŋ te bɛlbwa bam la aa tɔ o nyundua bela biɡri la, Israel tena la dɛ no ɡɛ Korowii aa dɛ baɡ ba dɛ so dɛɛ biɡri.

²⁰ Ane ta bam la dɛ tɔ bela tɔpera tama ane. Dɛ baa iruu kɛɛ baa soo waa, Korowiirii dɛɛ baɡle.

²¹ Ane ɡe ta bam la dɛ tɔ bela jwaana beŋkpoŋ, ásɛ tɔɔ perɔ chɔɔ aa, o yon le o ta, ásɛ ba ir dɛɛ kaa. Saŋ bɛlbwa bam la aa ba le o ta la, chɔɔree yoo, jɔmɔraa yoo, dɛ ba iro teŋɛ.

²² Tɔpera anɛ kɛɛ korobie kɛɛ benanyoaa bam la ɛɛ ba Korowii Tɛnte Dea la nyundua tɔe ka tel aa, ba dɛ so bela. Kɛ awola waa den le o ta la, dɛ ba iro teŋɛ.

²³ Korowii do ba ŋɔ bá so naa, ba dɛ so, o berɔ ŋɔ bá ir aa, ba dɛ ir. Ba ɛ wobɛlbwa Korowii aa cheɡɛ Mosis nɛɛ dɛ do ba la.