Nɛra Kura 8 - mzwDBL

Kandea da ne o kandere cheɡa

¹ Korowii ŋɔ Mosis be ŋɔ,

² “Ŋɔ Arɔn be kɛŋɔ ó kpɔ kandea daa la ne o kandere anuanɛ la ba cheɡ, ásɛ a sie chaɡɛ boɡoroŋ bela dɛ́ won chaahna kɛrɛdɛ.”

³ Arɔn ɛ ɡɛ. O kpɔ kandere la chɔŋɛ asɛ a sie chaɡɛ boɡoroŋ bela dɛ won chaahna kɛrɛdɛ. Gɛ tenten Korowii aa do Mosis laanee o ɛ.

⁴ Gɛ baa ɛ kandea daa la, suuɡaswɛm ɡbosoo nee ba loɡɔ, le o mun ta kaa o numoli aa do kɛ daa fee la ta. Gɛ tenten Korowii aa baɡle Mosis laanee o ɛo.

Lewi dea tena lee cheɡ tɛ Korowii

⁵ Korowii berɔ ŋɔ Mosis be ŋɔ,

⁶ “Lawɛ Lewi dea tena le ba dɔŋa Israel tena la bini, dɛ́ sɔ ba doŋa bwa ta dɛ́ lee ba cheɡ tɛ mɛ.

⁷ Kenii hɛɛ ba ɛɛ, dɛ́ sɔ ba doŋa bwa ta, kpɔ nee baa kpɔa dɛɛ sɔ nɛn doŋa ta la merɛ ba nɛ, dɛ́ ɡel ba fonɛ ba bwadabii bwa, ásɛ dɛ chɛɡɛ ba laala bwa ɡe. Gɛɛ baa ba ɛɛ, dɛ́ laa doŋa bɛlbwa kpɔ ba nɛ.

⁸ Gel ba kpɔ nabale ba, dɛ́ kpɔ men aa kpera kɛrɛdɛ noo koo a ta ɛ mea saraha ja o ta. Berɛ lɛ nabale la bɛl ja, dɛ́ kpɔ ɛ wechɔɡa kpɔe dɛ kɛ saraha.

⁹ Yerɛ Israel tena la bwa cheme, dɛ́ ɡel Lewi dea tena la ba che n Dea Cheremibɔr la sie.

¹⁰ Ba Lewi dea tena la ne men Korowii sie, ásɛ Israel tena la kpɔ nɔɔra dawɛ ba nɛ.

¹¹ Arɔn chɛ kɛŋɔ ó kpɔ Lewi dea tena ba kɛŋɔ saraha kwaa Israel tena aa ba a ne, ásɛ o ɛɛ ba kɛŋɔ saraha baa ɡɔɔra nyundua dɛ viiɡa n sie ken, dɛ́ kpɔ ba te dɛ́ won ɛ men Korowii toma.

¹² Lewi dea tena la aa kpɔ nɔɔra darawe nae la nyuune ta tonɛ la, bá kpɔ beŋkpoŋ ɛ wechɔɡa kpɔe dɛ kɛ saraha tɛ mɛ, asɛ dɛ kpɔ nɛɛte la ɡe ɛ saraha baa dɛ fuah dɛ́ kpɔ soŋe Lewi dea tena wechɔɡa n be tɛɛ ba.

¹³ Gel Lewi dea tena la che Arɔn ne o bibaala sie, ásɛ he kpɔ ba tɛ mɛ kɛŋɔ saraha kwaa baa ɡɔɔra nyundua dɛ viiɡa n sie ken.

¹⁴ Gɛ we-ɛɛla nɔ taa aa ba cheɡa he le Lewi dea tena le Israel tena baa kaa la bini tɛ mɛ, ásɛ ba ɛ n nɛra.

¹⁵ Sɔ Lewi dea tena la doŋa ta, bá do ɡoroŋ, dɛ́ ɛɛ ba kɛŋɔ saraha kwaa baa ɡɔɔra nyundua dɛ viiɡa n sie. He tonaa, a chɛ kɛ ba ba n Dea Cheremibɔr bela, dɛ́ ba ɛ ba toma.

¹⁶ Israel tena bini, banee chɛ kɛ ba kpɔ ba te tɛ mɛ kɛrɛdɛ. Menee lee ba tɛ n te, dɛ kpɔ ba chiɡ Israel tena bibanloɡla naa ta, Israel tena bibanloɡla bwa ɛ n nɛra.

¹⁷ Gɛ saŋ n fa aa kpo Ijipt tena bibanloɡla la taa n le Israel tena bibanloɡla, hale ba kondɛɛra biloɡla bwa, ba ɛ n kwa.

¹⁸ N kpɔ Lewi dea tena nɔ chiɡ Israel tena bibanloɡla naa ta.

¹⁹ Israel tena bwa bini la, Lewi dea tenaa n kpɔ do Arɔn ne o bibaala nɔn ta baa cha ba, dɛ́ che Israel tena naa ta dɛɛ ɛ toma n Dea Cheremibɔr bela. Bá soŋe ba wechɔɡa men Korowii be dɛɛ tɛɛ ba, ásɛ dɛ bɛlbwa la Boɡoroŋ la jwɛɛh kwara naa, weechɔɡa bɛlbwa bɛ on pu.”

²⁰ Gɛ Korowii aa do Mosis la, ɡɛɛ o ne Arɔn dɛ Israel tena bwa ɛ Lewi dea tena la.

²¹ Lewi dea tena la sɔ ba doŋa bwa ta dɛ do ɡoroŋ, dɛ chɛɡɛ ba laala. Asɛ Arɔn ɛɛ ba kɛŋɔ saraha kwaa baa ɡɔɔra nyundua, dɛ viiɡa Korowii sie ken, dɛ soŋe ba wechɔɡa tɛɛ ba, dɛ sɔ ba doŋa bwa ta ba do ɡoroŋ.

²² Baa ɛ ɡɛ tonɛ la, Lewi dea tena pa mun kaa ɛ toma Korowii Dea Cheremibɔr bela, asɛ Arɔn ne o bibaala ɛɛ nyiŋi ba nɛ. Gɛ Korowii aa do Mosis ŋɔ bá ɛ Lewi dea tena la, ɡɛɛ ba ɛ.

²³ Korowii ŋɔ Mosis be ja ŋɔ,

²⁴ “Lewi dea te bɛlbwa waa di bene fifraanɛ dɛ anue dɛɛ kaa laanee chɛ kɛ o ba ɛ n Dea Cheremibɔr la toma,

²⁵ kɛ dɛ o baa di bene fifraanue naa, ó ɡel toma baa dɛ ɛa tɔpere bɛlbwa la ɛɛ, dɛ bɛ an ɛ kpa.

²⁶ A ɡe habɔɔ la, wɛɛ cha o bala n Dea Cheremibɔr bela, kɛ o bɛ toma la lɛ dawɛ o nɛ. Gɛɛ hɛɛ ba ɛɛ dɛ́ kpɔ Lewi dea tena toma baa dɛ ba ɛɛ do ba nɔn ta.”