Nɛra Kura 5 - mzwDBL

Nɛra doŋa aa lɔ ba nɛɛ wa

¹ Korowii ŋɔ Mosis be ŋɔ,

² “Do Israel tena la kɛŋɔ, nomɛlbwa waa dɔ bwadabii weebuula, ne nomɛlbwa nee ane aa dɛ fuɡo, ne nomɛlbwa waa leɡe ol-lale kɛɛ chɔɔ la, o kah doŋa. Bá le o ne ba baah ta.

³ Haahna ne baala bwa baa do ɡɛ la, bá le ba ne dahara, ásɛ ba bɛ doŋa ba kpɔ kah bela haa soɡa n do he baah ta la.”

⁴ Israel tena la ɛ ɡɛ dɛ́ le ɡɛ nɛra la le ba baah ta baa so dahara, ɡɛ tenten maa bol Mosis be la.

Wechɔɡa kem bɔe

⁵ Korowii berɔ ŋɔ Mosis be ŋɔ,

⁶ “Ŋɔ Israel tena be ŋɔ, Dɛ haah kɛɛ baa ɛ o dɔŋ bɛl wechɔɡa ŋwɛnɛ bɛlbwa ta naa, dɛ o jo men Korowii nɛ. Naate di bolchɔɡe.

⁷ A chɛ kɛ ó bol wechɔɡa waa ɛa la, dɛ́ bɔ kwaa baa lɛo la bwa, dɛ́ berɛ bɔne anɔ la waa bɔa la bini bele anue, dɛ́ kpɔ bɔrbeŋkpoŋ ja a ta tɛo.

⁸ Dɛ naate waa ɛo wechɔɡa la sewaa, a chɛ kɛ ó bɔ tɛ o lole tenten. Dɛ o ta ɡɛ nɛn dɔe yaa, a ɛ men Korowii kwa. Ó bɔ tɛ sɔfo la dɛ́ kpɔ pebal ja, ásɛ sɔfo la kpɔ soŋe naate wechɔɡa n be ń kpɔ kɛo.

⁹ Kwaa nɔ bwa Israel tena aa kpɔa baa tɛ men Korowii la ɛ sɔfo kwa.”

¹⁰ Baa bɛlbwa kwaa waa kpɔ ba tɛ sɔfo ɛ sɔfo la kwa.

Haah waa le o jaa habɔɔ

¹¹ Korowii ŋɔ Mosis be ja ŋɔ

¹² ó bol Israel tena be ŋɔ, “Dɛ bɛl haah le o habɔɔ,

¹³ dɛ ka chɔ banfale dɛ o jaa la ta jemɛ, doŋa waa kaah la ɡe ta baŋ leɛ nɛn di danseɛ, kɛɛ dɛ lawɛ o nɔn a ta,

¹⁴ dɛ o jaa la baa dɔ a liire kɛŋɔ haah la kah doŋa dɛɛ meeraa, hale dɛ o ta doŋa kaeh yoo,

¹⁵ a chɛ kɛ báa la kpɔ o haah la la sɔfo be, dɛ́ che haah la naa ta, dɛ́ nyin men aa kpera kuruwa beŋkpoŋ, dɛ bɛ noo kɛɛ daawiile a sɔɔh aa soma baa dɛ fuah a ta do, dɛkalkɛŋɔ a ɛ mea saraha dɛ tɛ meera. A ɛ saraha aa dɛ baɡle kɛ nɛn di bolchɔɡe kɛɛ o ta bolchɔɡe dii.

¹⁶ Sɔfo la chɛ kɛŋɔ, ó kpɔ haah la ba che men Korowii sie,

¹⁷ ásɛ dɛ ɛ vii bini nee aa do ɡoroŋ la, dɛ́ ɛ n Tɛnte Dea bela harɛ teera, dɛ́ kpɔ do nee la ta, ásɛ a do kpeli.

¹⁸ Sɔfo la aa kpɔ haah la ka che men Korowii sie la, ó laa kon kpɔ o nyu ta, ásɛ dɛ kpɔ meera mea saraha la do o nɔn ta. Anee dɛ baɡle kɛ haah la di bolchɔɡe kɛɛ o ta bolchɔɡe dii. Sɔfo la ɛɛ kpɔ nee aa do kpeli o ɛa do kon ta dɛ do teera a ta aa ba nyotaahna ne laanee kpoŋe.

¹⁹ Ásɛ sɔfo la ɡel haah la ŋwɛɛ ntam dɛ́ ŋɔ o be ŋɔ, ‘Dɛ he ta he jaa habɔɔ leɛ dɛ ka chɔ banfale dɛ kah doŋa aa, nyotaahna aa lɔ nee aa do kpeli nɔ ta bɛ won ɛɛ wobɛlbwa.

²⁰ Dɛ he ta lɔ he jaa dea dɛ le o habɔɔ ka chɔ banfale dɛ kah doŋa aa,

²¹ Kórowii ɡel he hwie serewe, dɛ́ do jeɡre he tea su, dɛ́ ɡel he nɛra taahne dɛ́ vɛɛh.

²² Kórowii ɡel nee nɔ aa dɛ ba nyotaahna ne nɔ jo he bwara, dɛ́ ɡel he hwie serewe, dɛ́ do jeɡre, he tea su.’ Aa do ɡɛ nɔ, a chɛ kɛ haah la ŋɔ, ‘N sɛh ɡɛ. Kórowii ɡel á ɛ ɡɛ!’

²³ Sɔfo la chɛ kɛ ó chwerɛ nyotaahna waa la dawɛ kon ta, dɛ́ yaɡla do nee aa do kpeli la ta,

²⁴ dɛ́ ɡel haah la nyɔ nekpela la aa dɛ ba nyotaahna ne o nɛɛ bala la, ásɛ a jooɡo dɛ́ ɡel o bwara nyɛɡo kɛrɛdɛ.

²⁵ Ásɛ sɔfo la laa meera mea saraha la lɛ haah la nɔn ta, dɛ́ ɡɔɔra nyundua men Korowii sie, dɛ́ kpɔ kaa kon baa dɛ ɛ saraha o ta la ta,

²⁶ dɛ́ ɛ mea la nɔndel, dɛ́ fuah bela tɛ men Korowii, name dɛ́ ɡel haah la nyɔ nee la.

²⁷ Dɛ a balɔ kɛŋɔ o le o jaa habɔɔ kpela dɛ ka chɔ banfale dɛ kah doŋa dɛ nyɔ nee la aa, aa jooɡoo, dɛ́ ɡel o bwara nyɛɡo kɛrɛdɛ o tea su, o hwie serewe dɛ́ do jeɡre, ásɛ o nɛra na kɛŋɔ nyotaahna lawɔ.

²⁸ Dɛ haah la ta doŋa kaeh o tea too te naa, baa tao tɔɔ, o ta bolchɔɡee dii kpa, dɛ́ won dɛɛ lolɛ.

²⁹ Dɛ haah le o jaa habɔɔ dɛ ka chɔ banfale dɛ kah doŋa aa, a ɡɛ waa nɔɔ ɛ meera Mmara,

³⁰ kɛɛ dɛ baa dɔ liire kɛŋɔ o haah le o habɔɔ dɛ ka chɔ banfale dɛɛ meeraa, sɔ́fo la ɡel ó ba che men Korowii sie, dɛ́ teŋɛ waa bwa Mmara la aa baɡla la ta.

³¹ Baa la te aa bolchɔɡee di a ɡɛ waa nɔ ta, dɛ haah la di bolchɔɡe aa, o ɡboo dɛ́ dɔ deŋnetɛra o wechɔɡa la wa.”