Nɛra Kura 4 - mzwDBL

Lewi dea bii baa ɛ Kohat tena toma

¹ Korowii ŋɔ Mosis ne Arɔn be ŋɔ,

² “Kure Lewi dea bii baa ɛ Kohat naanar ne ba lolanar.

³ Kure baala baa di bene fifraatoro ka tel bene fifraanue, baa dɛ ba wona ɛ n Dea Cheremibɔr la toma.

⁴ Kohat naanar la tomaa kɛŋɔ, báa nyiŋi kwaa aa do ɡoroŋ tenten ta, n Dea Cheremibɔr bela.

⁵ Dɛ Israel tena la ŋɔ bá ir kaa bofale aa, Arɔn ne o bibaalaa chɛ kɛ bá jo dɛ́ ka laa pateesan waa saɡɛ Korowii Ne Nɛwɛnyina Fɔo Daka la sie, kpɔ dɛ́ kpɔ tɔ o ta.

⁶ Ásɛ dɛ kpɔ mpo nae tɔne la bɔle pateesan la ta. Dɛ́ berɛ kpɔ yal waa ɛ burum tenten bɔle o ta, ásɛ mɔɔ dɛ́ kpɔ daa baa kpɔa dɛɛ cheo la suuɡi nɔnloɡa aa lɔ o loŋkoni la ta.

⁷ Bá paɡri yaburum bɛl bɔle teebur Korowii paanoo aa dɛ dawɛ o ta la ta, dɛ́ pa tafolabɔtɔre ne loɡa ne lerwe baa dɛ do sen a bini, dɛ́ kpɔ ɛ saraha dawɛ bela. Paanoo la baa yon kpɔ dawɛ o ta la chɛ kɛ ó ta dawɛ bela.

⁸ Bá kpɔ yaswɛm bɔle ɡɛ laala la ta, dɛ́ berɛ kpɔ mpo nae tɔne bɔle a ta ja, ásɛ mɔɔ dɛ́ kpɔ daa baa kpɔa dɛɛ che teebur la suuɡi o nɔnloɡa aa lɔ o loŋkoni la ta.

⁹ Bá kpɔ yaburum bɛl bɔle kandea daa la ne o kandere la ta, ne kwaa baa kpɔa dɛɛ kwaa o ŋwɛɛra la, ne o loɡbakorɔre ne loŋa baa kpɔ noo dɛɛ do a bini, dɛ́ kpɔ dɛɛ do kandere la ta.

¹⁰ Ásɛ ba kpɔ mpo nae tɔne dɛ fɔrɔwe kandea la ne o kwaa bwa, dɛ́ kpɔ dawɛ kon baa kpɔa dɛɛ chea la ta.

¹¹ Bá kpɔ yaburum bɛl paɡri bɔle suuɡaswɛm kon baa dɛ ɛ saraha o ta la, dɛ́ kpɔ mpo nae tɔne bɔle, ásɛ mɔɔ dɛ́ kpɔ daa baa kpɔa dɛɛ cheo la suuɡi nɔnloɡa aa lɔ o loŋkoni la ta.

¹² Bá kpɔ yaburum bɛl fɔrɔwe koŋkwaa bwa baa kpɔa dɛɛ ɛ toma Boɡoroŋ bela la, dɛ́ berɛ kpɔ mpo nae tɔne bɔle a ta, dɛ́ kpɔ dawɛ kon baa kpɔa dɛɛ chea la ta.

¹³ Bá laa tɔɔ aa lɔ saraha kon baa kpɔ ayaawa ɛo la pa, dɛ́ kpɔ yakɔl bɔle o ta.

¹⁴ Ásɛ dɛ pa koŋkwaa bwa baa kpɔa dɛɛ ɛ toma saraha kon la ta. Anee kwaa baa kpɔa dɛɛ buh nii, ne bune baa kpɔ toh ola, ne soofire, ne loɡa baa do chal kɛɛ nee a bini dɛ ɛ dɛɛ merɛ, dɛ́ kpɔa chɔŋɛ o ta, ásɛ dɛ kpɔ mpo nae tɔne la bɔle a ta. Ásɛ dɛ kpɔ daa baa kpɔa dɛɛ cheo la suuɡi nɔnloɡa aa lɔ o loŋkoni ta la.

¹⁵ Dɛ he dɛ ba ira kaa bofale, asɛ Arɔn ne o bibaala tɔ laala aa do ɡoroŋ ne kwaa aa do ɡoroŋ baa kpɔa dɛɛ ɛ toma la ta tonaa, mɔɔ Kohat naanar ká kpɔ che kaa. Kɛ ba bɛ a ɡɛ kwaa aa do ɡoroŋ la leɡe, ásɛ dɛ ba sewɛ. Banee dɔ ŋwɛnɛ kɛ bá che n Dea Cheremibɔr laala ne o koŋkwaa bwa.

¹⁶ Arɔn bibaa Eliasaa dɛɛ ba wɛɛ nyiŋi noo baa kpɔ dɛɛ choŋi kandere, ne daawiile a sɔɔh aa soma, ne tɔpere bɛlbwa mea saraha, ne noo baa kpɔa dɛɛ do nɛn sɔfore ta. Onee chɛ kɛ wɛɛ nyiŋi n Tɛnte Dea la ne o laala ne o koŋkwaa bwa ɡe ta.”

¹⁷ Korowii berɔ ŋɔ Mosis ne Arɔn be ŋɔ,

¹⁸ “Hé nyiŋi kɛrɛdɛ, ásɛ Kohat dea tena mun bɛ he le Lewi dea tena la bini.

¹⁹ Waa aa chɛ kɛŋɔ hé ɛ ásɛ ba dɔ ba nyu dɛ bɛ serewe laanee kɛŋɔ, ba bɛ kwaa aa do ɡoroŋ kohona la bɛne. Arɔn ne o bibaalaa chɛ kɛ bá tɔ sie, ásɛ dɛ chaɡle bɛlbwa o toma ne o bone waa che.

²⁰ Kohat naanar ta chɛ kɛŋɔ bá jo, dɛ́ nyiŋi kwaa aa do ɡoroŋ la, á ba ɛ kɛ baa kpɔ sie keŋkeŋnaa nyiŋi dɛ́ ba serewe.”

Lewi dea bii baa ɛ Gɛsɔn dea tena

²¹ Korowii berɔ ŋɔ Mosis be ja ŋɔ,

²² “Kure Gɛsɔn dea tena ɡe, dɛ́ jemɛ ba nyoa.

²³ Kure ba bini baala baa di bene fifraatoro, dɛ́ ka jaɡɛ fifraanue la bwa baa dɛ ba wona ɛ toma n Dea Cheremibɔr bela.

²⁴ Gɛsɔn dea tena toma baa dɛɛ ɛa ne bone baa dɛɛ che laanee nɔ.

²⁵ A chɛ kɛ báa che n Tɛnte Dea waa ɛ n Dea Cheremibɔr la pateesanre, ne kwaa baa kpɔa bɔle o bini, ne mpo nae tɔne baa kpɔa bɔle o baŋ, ne pateesan waa tɔ n Dea Cheremibɔr doonyoa la,

²⁶ ne dembaah pateesanre aa bar n Tɛnte Dea la ne kon baa dɛ ɛ saraha o ta, ne pateesan waa tɔ dembaah doonyoa bela, ne a ŋwɛɛra ne koŋkwaa bwa baa dɛ ɛ ane toma bela. Gɛ bwa aa chɛ kɛ bá kpɔ kwaa nɔ bwa ɛ toma lɔ Gɛsɔn dea tena nɔn ta.

²⁷ Gel Arɔn ne o bibaala baɡle Gɛsɔn dea tena toma bɛlbwa baa ɛ, ɡɛ baa dɛɛ che bone ne ba toma bɛlbwa ta. Mosis, kpɔ ba bone baa dɛ ba cheɡa we-ɛɛla bɛlbwa do ba nɔn ta baa nyiŋi a ta.

²⁸ Toma Gɛsɔn dea tena aa dɛ ba baa ɛ n Dea Cheremibɔr laanee la. Sɔfo Arɔn bibaa Itamaa chɛ kɛ wɛɛ nyiŋi ba nɛɛ ba toma bwa ta.”

Lewi dea bii baa ɛ Merari dea tena

²⁹ Korowii berɔ ŋɔ Mosis be ŋɔ, “Kure Merari dea tena dɛ́ jemɛ ba nyoa.

³⁰ Kure ba bini baala baa di bene fifraatoro, dɛ́ ka tel bene fifraanue baa dɛ́ ba wona ɛ toma n Dea Cheremibɔr bela.

³¹ Ba toma baa ɛ belaa kɛŋɔ, bá che daa baa kpɔa baŋre n Dea Cheremibɔr la, o dachiɡri ne loɡa aa lɔ a mune dɛ a doli bwa,

³² ne dembaah dachiɡri ne a loɡa aa lɔ a mune, ne kwaa baa kpɔa baŋre tɛnte la ne ŋwɛɛra ne koŋkwaa bwa ne komɛlbwa aa chɛ kɛ bá kpɔ ɛ toma. Yerɛ baa bɛlbwa, dɛ́ kpɔ o bone waa dɛ ba cheɡa do o nɔn ta.

³³ Toma Merari dea tena aa dɛ ba báa ɛ n Dea Cheremibɔr laanee la. Sɔfo Arɔn bibaa Itamaa chɛ kɛ wɛ́ɛ nyiŋi ba nɛ báa ɛ toma.”

Lewi dea tena kura

³⁴ Mosis ne Arɔn dɛ Israel tena nomonome kure Kohat dea tena ne ba lolanar.

³⁵ Baa kure ba baala baa di bene fifraatoro ka tel bene fifraanue, baa dɛ ba wona ɛ n Dea Cheremibɔr la toma la,

³⁶ dɛ ba lɔ kaɡboŋa banɛ lafraanuanɛ fifraanue.

³⁷ Gɛɛ Kohat dea tena baa dɛ ba wona ɛ n Dea Cheremibɔr toma la nyoa do. Mosis ne Arɔn kur ba ɡɛ maa do Mosis la.

³⁸ Ba kure Gɛsɔn dea tena ne ba lolanar ɡe.

³⁹ Baa kure ba baala baa di bene fifraatoro ka tel fifraanue dɛ́ won ɛ n Dea Cheremibɔr toma bwa la,

⁴⁰ ba lɔ kaɡboŋa banɛ lafraanumɛl fifraatoro.

⁴¹ Gɛɛ Gɛsɔn dea tena baa dɛ ba wona ɛ n Dea Cheremibɔr toma la waa do. Mosis ne Arɔn kur ba ɡɛ maa do ba la.

⁴² Ba kure Merari dea bii ne ba lolanar.

⁴³ Baa kure baala baa di bene fifraatoro ka tel bene fifraanue dɛ́ won ɛ n Dea Cheremibɔr toma la,

⁴⁴ dɛ ba lɔ kaɡboŋa batoro lafraanɛ.

⁴⁵ Gɛɛ Merari dea tena baa kur ba la nyoa do. Mosis ne Arɔn kur ba ɡɛ maa do Mosis la.

⁴⁶ Gɛɛ aa do Mosis ne Arɔn dɛ Israel nomonome kure Lewi dea tena ne ba lolanar bwa.

⁴⁷ Baala baa di bene fifraatoro dɛ kaa bene fifraanue, dɛ́ won ɛ n Dea Cheremibɔr bela toma, dɛ́ won che o laala dɛɛ kaa bofale la bwa,

⁴⁸ ba lɔ nɛra kaɡboŋa banuatoro lafraanue fifraanuatoro.

⁴⁹ Ba baɡle nomɛlbwa o toma ne bone waa dɛɛ che, ɡɛ tenten maa cheɡɛ Mosis nɛɛ dɛ do ba la. Gɛɛ aa do ba kure ba bwa ɡɛ maa do Mosis la.