Nɛra Kura 36 - mzwDBL

Selofehad bihaahna kapɛrɛ

¹ Josef naanar baa ɛ Manasɛ dea pera naa Makir bibaa Gelead la Mosis ne Israel sitɔɔla ne deene nomonome be dɛ ka ŋɔ,

² “Korowii aa do heyaa ŋɔ hé che bie tae ta, dɛ́ bɔne harɛ la tɛ ya Israel tena ya so o ta la, o berɔ ŋɔ hé kpɔ ya dɔɔ Selofehad harɛ tɛ o bihaahna.

³ Dɛ a kaa ba kɛŋɔ ba yalɛ deene nɔ ane ta naa, ba kapɛrɛ la ɛɛ ɛ deene la kwaa, dɛ ya kapɛrɛ peraa lea la.

⁴ Dɛ benanyoa nomɛl kon lɔ nomɛl be Israel tena yon berɛ tɛo la telaa, ba bɔr la ɛɛ le ya naawa kon taa, dɛ́ ka ja dea baa yalɛ o ta la kon ta.”

⁵ Asɛ Mosis che waa Korowii aa doo a ta la ta dɛ ŋɔ Israel tena la be ŋɔ, “Waa Josef naanar la aa dɛ bol la ɛ kpela.

⁶ Waa Korowii aa bera do Selofehad bihaahna a ta laanee kɛŋɔ, baa yalɛ nomɛlbwa baa dɛ nyin ba mɛɛ dea la ta.

⁷ Israel dea bɛlbwa harɛ waa dɔa la bɛ o dɔŋ dea kon ta ka ja, nomɛlbwa kpɔ o naa harɛ ó ɛ o kon.

⁸ Israel haah bɛlbwa waa dɔ o naa harɛ pera la yalɛ dea o mɛɛ aa le o ta, ɡɛɛ dɛ ɡel bɛlbwa dɔ o mɛɛ harɛ ó ɛ o kon.

⁹ Dea bɛlbwa harɛ bɛ o dɔŋ kon ta ka ja, dea bɛlbwa kpɔ o kon.”

¹⁰ Gɛ Korowii aa do Mosis la, ɡɛɛ Selofehad bihaahna la ɛ.

¹¹ Selofehad bihaahna laanee, Maala ne Tirsa ne Hoɡla ne Milka dɛ Nowa. Ba yalɛ ba mɛɛ naaranar.

¹² Ba yalɛ Josef bibaa Manasɛ dea la ta, asɛ ba harɛ baa dɔa la ka ba mɛɛ lolanar harɛ ta.

¹³ Mmarare ne waa Korowii aa kpɔa che Mosis nɛɛ dɛ tɛ Israel tena laanee. Moab harɛ waa chɔa kaa Jɔɔdan Moo ta, asɛ Jeriko do baŋ bɛl la taa Korowii bola.