Nɛra Kura 35 - mzwDBL

Lewi dea tena bwɛjena

¹ Moab harɛ waa chɔa kaa dɛ kaa Jɔɔdan Moo ta asɛ Jeriko do o baŋ bɛl belaa Korowii bol waa Mosis be ŋɔ,

² “Do Israel tena la dɛ́ ŋɔ bwɛjena baa dɔ la, bá tɛ Lewi dea tena la ane bá so a ta. Bwɛɛre la dahare harɛre ɡe ɛ ba kondɛɛra dibɔra.

³ Ásɛ bwɛɛre la ɛ ba kwa, a dahare harɛre la ɛ́ ba nae ne peera dɛ kondɛɛra aa kaa la bwa dibɔr.

⁴ Bwɛɛre haa kpɔ tɛ Lewi dea tena ba kondɛɛre ɛɛ di a dahare la, á pa mun le bwɛɛ la danjwɛɛ baa maa baro la, dɛ́ ɛ naɡale kaɡboŋ lafraanue.

⁵ Bwɛɛre la wee leebɔra, hé maɡɛ naɡale kaɡboŋa atoro, wee cholibɔr kaɡboŋa atoro, weekaŋle harɛbɔr kaɡboŋa atoro, ásɛ weekaŋle nyunduabɔr ɡe naɡale kaɡboŋa atoro, ásɛ bwɛɛ la do baah ta. Gɛ bɔra nɔɔ ba kondɛɛra dibɔra.

Bwɛjena nɛra aa ka so a ta dɛ́ dɔ ba nyu

⁶ Bwɛjena anumɛl haa kpɔ tɛ Lewi dea tena la ɛ bwɛɛre dɛ nomɛl kpo o dɔŋ aa, o chwa ka so bɛl ta dɛ́ dɔ o nyu. Hé tɛɛ ba bwɛɛre fifraanaarɛ dɛ anɛ ja a ta.

⁷ Bwɛɛre háa tɛ Lewi dea tena la ɛ fifraanaarɛ dɛ anuatoro, ja ba kondɛɛra dibɔra la ta.

⁸ Bwɛɛre Israel deene la aa dɔ harɛ la ta la, hé kpɔ ane tɛ Lewi dea tena la. Banɔ la ba bwɛɛre aa wara la, hé lɛ bwɛɛre kohona le ba be, ásɛ banɔ la ba bwɛɛre aa wola warɛ la, hé lɛ bwɛɛre tamaa ken le ba be.”

⁹ Korowii berɔ ŋɔ Mosis be ŋɔ

¹⁰ ó bol Israel tena la be ŋɔ, “Hé le Jɔɔdan Moo la kaa Keenan harɛ ta naa,

¹¹ hé le bwɛɛre ane cheɡ, ásɛ dɛ nomɛl ta saahnɛ kpo o dɔŋ aa, ó chwa ka so bɛl ta dɛ́ dɔ o nyu.

¹² Gɛ bwɛɛre laanee dɛ́ lɛ nɛn nyu le nɛn waa kpoo la nɛra nɔn ta, ásɛ ba bɛ won dɔ bɔr kpoo bɔ kem dɛ nɛra ta cheme dɛ bol o wa.

¹³ Bwɛɛre nɛra aa chwa ka so a ta dɛɛ dɔ ba nyuune la ɛ anumɛl.

¹⁴ Hé le bwɛɛre atoro Jɔɔdan Moo baŋ bonɔ cheɡ, ásɛ Keenan harɛ ta ɡe atoro.

¹⁵ Bwɛɛre anumɛl la ɛ bwɛɛre Israel tena ne nɛŋhɔɔhra ne nomɛlbwa ba ne waa soɡa, dɛ bɛl ta saahnɛ kpo nɛn aa, ó chwa ka so bela dɛ́ dɔ o nyu.

¹⁶ Dɛ nomɛl kpɔ buni kon lɔ o dɔŋ o sewaa, naate kpo nɛn. Kpoe chɛ kɛŋɔ bá kpo o ɡe.

¹⁷ Dɛ nomɛl kpoŋe bwe waa dɛ́ ba wona kpɔ kpo nɛn, asɛ o kpɔ forɛ o dɔŋ o sewaa, naate kpo nɛn. Kpoe chɛ kɛŋɔ bá kpo o ɡe.

¹⁸ Dɛ nomɛl kpoŋe daa waa dɛ ba wona kpo nɛn, asɛ dɛ kpɔ lɔ o dɔŋ o sewaa, naate kpo nɛn. Kpoe chɛ kɛŋɔ bá kpo o ɡe.

¹⁹ Naate baa kpoo la lole tenten kaa pu nɛn waa kpo o lole laa, a chɛ kɛ ó kpo naate bɔ kem.

²⁰ Dɛ nomɛl hah o dɔŋ dɛ taɡɔ ɡo, kɛɛ dɛ kpɔ komɛl lɔɔ o sewɛ,

²¹ kɛɛ dɛ ume nɔn lɔɔ dɛ kpoo waa, o kpo nɛn, o di bolchɔɡe. Naate baa kpoo la nɛn dɔ ŋwɛnɛ kɛ ó kpo ɡɛ nɛn la bɔ kem, dɛ o nao waa.

²² ‘Dɛ nomɛl ta o dɔŋ haeh kɛɛ o laa saahna kpɔ komɛl lɔɔ kɛɛ dɛ taɡɔ ɡo,

²³ kɛɛ naate ta nyiŋe dɛ ta bwe o ka lɔ nomɛl dɛ kpoo dɛ o laa saahna, o dɔm ɡe laa aa,

²⁴ nɛra baa bol waa la che ɡɛ Mmara nɔ ta, dɛ́ bol ɡɛ nɛn waa wola saahnɛ kpo o dɔŋ, ne o dɔŋ waa dɛ nyinu dɛ kpo la wa.

²⁵ Nɛra baa chema dɛ bol waa la lɛ nɛn waa kpo o dɔŋ la le nɛn waa dɛ nyinu dɛ́ kpo bɔ kem la nɔn ta, dɛ́ berɛ kpɔɔ kaa bwɛɛ waa chwaa dɛɛ la ka so o ta dɛ́ dɔ o nyu la ta. Ó so bela ka tel kɛŋɔ Sɔfonomoa baa fuɡe noo do o nyu ta Korowii sɔn ta la, aa baa sewɛ mɔɔ.

²⁶ Dɛ naate waa kpo nɛn la berɔ le bwɛɛ waa chwaa ka so o ta,

²⁷ asɛ naate waa sewa la nɛn waa dɛ nyin ɡɛ nɛn la dɛ́ kpoo bɔ kem la ka nao dɛ kpoo waa, o ta bolchɔɡe dii.

²⁸ A chɛ kɛŋɔ ó so bwɛɛ waa chwaa kaa la ta, ka tel kɛŋɔ Sɔfonomoa waa lole ɡɛ saŋ la aa sewa mɔɔ ɡɛ nɛn la won kaa bwɛɛ waa le o ta.

²⁹ A ɡɛ Mmara la ɛ nɛŋkpoa waa dɛ chɔ tɛ heya bela haa soɡa, dɛ́ ka tel he naanar baa ka ba bwa.

³⁰ Nomɛlbwa waa kpo nɛn la, dɛ baa kpoo waa, á che o nyoa wobol ta mɔɔ ba won kpoo. A ta chɛ kɛŋɔ bá che danseɛ te beŋkpoŋ nyoa wobol ta dɛ́ kpo nomɛlbwa.

³¹ He bɛ suuɡa lɛ le nomɛlbwa waa kpo nɛn a chɛ kɛŋɔ bá kpoo la be, dɛ́ kpɔ o nyu kɛo.

³² He bɛ suuɡa lɛ dɛ́ ɡel nomɛlbwa waa chwa ka so a ɡɛ bwɛɛre la ta dɛ́ dɔ o nyu la berɛ kaa o bwɛ, dɛ Sɔfonomoa waa lole ɡɛ saŋ la ta sewɛ.

³³ Bobɛlbwa haa lole, he bɛ ɡɛ ɛ dɛ́ chɔɡ harɛ la. Nɛŋkpoa dɛ chɔɡ harɛ haa soɡe o ta la. Haa won kpɔ komɛlbwa kwaa harɛ la, nemenɛ naate waa kpo nɛn la ɡbaɡba chal.

³⁴ He bɛ doŋa kpɔ kah harɛ haa soɡe o ta la, Korowii lɔ he Israel tena baah ta.’ ”