Nɛra Kura 34 - mzwDBL

Keenan harɛ jwɛhre

¹ Korowii ŋɔ Mosis be ŋɔ,

² ó bol Israel tena la be ŋɔ, “Dɛ he tel Keenan harɛ baa dɛ ba bɔna ó ɛ he kon la ta naa, bá do jwɛhre nɔ.

³ Weekaŋle harɛbɔr jwɛh la le Sin pua hɛŋle ɡbo harɛ la ta, dɛ́ kpoŋe kaa Edom harɛ jwɛh ta. Wee leebɔr ɡe le Yar Mpo ta kaa weekaŋle harɛbɔr,

⁴ dɛ́ teŋɛ kaa bela baa kpɔa dɛɛ kaa Akrabim weekaŋle harɛbɔr dɛ́ kaa Sin, dɛ́ le bela kaa Kades Baanea weekaŋle harɛbɔr. Dɛ́ le bela kaa Hasar Adaar dɛ́ kaa Asmɔn.

⁵ Belaa wɛɛ ba ɡola le Asmɔn dɛ́ kaa Ijipt Fɛlembɔjen jwɛh ta, dɛ́ ka jaɡɛ Mɛdetereenea Mpo ta.

⁶ Wee cholibɔr jwɛh la, Mɛdetereenea Mpo nyoa ɛ́ he jwɛh.

⁷ Weekaŋle nyunduabɔr jwɛh ɡe teŋɔ le Mɛdetereenea Mpo la ta kaa Hɔr Bwejen ta,

⁸ dɛ́ le Hɔr Bwejen ta kaa Lebo Hamat. Ásɛ jwɛh la chɔ kaa Sedad.

⁹ Weekaŋle nyundua pera jwɛh la le Sedad kaa Sifron dɛ́ ka jaɡɛ Hasar Enan.

¹⁰ Wee leebɔr jwɛh la, teŋe le Hasar Enan kaa Sɛfam,

¹¹ ásɛ jwɛh la le Sɛfam dɛ́ kaa Ribla waa lɔ Ain wee leebɔr, dɛ́ kpoŋe wili kaa Galilia Moo nyoa wee leebɔr.

¹² Jwɛh la ɛɛ kaa Jɔɔdan Moo la taa, dɛ́ ka jaɡɛ Yar Mpo ta. Gɛɛ he harɛ jwɛhre la ɛɛ ba doe.”

¹³ Mosis ŋɔ Israel tena la be ŋɔ, “Harɛ laanee la, Korowii ŋɔ hé che bie tae ta, dɛ́ bɔne tɛ deene anuanaarɛ ne pera ó ɛ ba kon,

¹⁴ Rubin ne Gad dea tena, dɛ Manasɛ dea pera tena dɔ ba bɔr.

¹⁵ Gɛ deene anɛ nɔ ne Manasɛ dea pera tena la dɔ ba bɔr Jɔɔdan Moo wee leebɔr, Jeriko do baŋ bɛl.”

¹⁶ Korowii ŋɔ Mosis be ŋɔ,

¹⁷ “Baala baa dɛ́ ba harɛ la bɔna tɛ heyaa laanee sɔfo Eliasa ne Nun bibaa Josua.

¹⁸ Le dea bɛlbwa nomoa, ásɛ ba cha dɛ́ bɔne harɛ la.

¹⁹ Ba sɔnaa nɔ. Jefune bibaa Kaleb waa le Juda dea,

²⁰ ne Amihud bibaa Sɛmoɛl waa le Simeon dea,

²¹ ne Keslɔn bibaa Elidad waa le Bɛnjamen dea,

²² ne Joɡli bibaa Buki waa le Dan dea,

²³ ne Efɔd bibaa Haneɛl waa le Manasɛ dea,

²⁴ ne Siftan bibaa Kɛmoɛl waa le Efrem dea,

²⁵ ne Panak bibaa Elisafan waa le Sebulon dea,

²⁶ ne Asaan bibaa Paltiel waa le Isaaka dea,

²⁷ ne Sɛlome bibaa Ahihud waa le Aasa dea,

²⁸ dɛ Amihud bibaa Pɛdahɛl waa le Naftale dea.”

²⁹ Banɔɔ Korowii le ŋɔ bá bɔne Keenan harɛ la tɛ Israel tena la.