Nɛra Kura 32 - mzwDBL

Israel deene aa lɔ Jɔɔdan Moo wee leebɔr

¹ Rubin ne Gad dea tena kondɛɛra warɔ taeh. Ba nao kɛ Jasa ne Gelead harɛre wer ne kwaa dɛɛra.

² Anomanta, ba la Mosis ne sɔfo Eliasa dɛ ba Israel tena nomonome be dɛ ka ŋɔ,

³ “Atarɔt ne Debɔn ne Jasa ne Nimra ne Hɛsbɔn ne Eleale ne Sebam ne Nɛbo dɛ Beɔn harɛre,

⁴ Korowii aa sɔɔh a nɛra kpeɡri nyoa dɛ lɛ tɛ ya Israel tena la wer ne kwaa dɛɛra, he bonɔɔna ɡe, ya dɔ kondɛɛra.

⁵ Ya dɛ soŋe he kpɔ harɛ la tɛ yaa ó ɛ ya kon, dɛ bɛ ɡel ya le Jɔɔdan Moo la baŋ.”

⁶ Anee Mosis ŋɔ Gad ne Rubin dea tena la be ŋɔ, “Hé bala dɛ kaa laa, asɛ he te so bonɔ naa?

⁷ He bɛ he bala Israel tena bwara hwah harɛ Korowii aa kpɔa tɛɛ ba la ta kaala wa.

⁸ Kenii he naawa faa ɛ ɡɛ saŋ yaa lɔ Kades Baanea, asɛ n tom ba ŋɔ bá ka sɔh nyiŋi harɛ la.

⁹ Ba laŋɔ ka tel Ɛskɔl Fɛlembɔjen ta dɛ ka na harɛ la, dɛ ba hwah ba bala Israel tena la bwara, harɛ Korowii aa kpɔa tɛɛ ba la ta laŋa.

¹⁰ Asɛ Korowii baah di awola o ŋwɛɛ ŋɔ,

¹¹ ‘Baala baa le Ijipt harɛ ta ba, dɛ dɔ bene fifraanɛ ne a habɔɔ la aa harɛ maa ŋwɛɛra, dɛ baɡɛ nyoa ŋɔ n kpɔɔ tɛ Abraham ne Aesek dɛ Jekɔb naanar laanee na, ba ta n nɛɛ teŋɛ bambile bwa ne.

¹² Nemenɛ Kenis te Jefune bibaa Kaleb, ne Nun bibaa Josua, banee teŋɛ men Korowii nɛɛ ba bambile bwa ne.’

¹³ Korowii baah di Israel tena la nɛ, asɛ dɛ ɡel ba ɡaaɡe pua hɛŋle ɡbo harɛ la ta bene fifraanaarɛ, ka tel kɛŋɔ a ɡɛ nɛra la ka pa bwa baa ɛ wechɔɡa la aa baa he.

¹⁴ Taraken, he iro kɛŋɔ wechɔɡ-ɛɛra dɛ chiɡ he naawa naa ta, dɛɛ ba ɡela Korowii baah di kohona Israel tena nɛ.

¹⁵ Dɛ he berɛ habɔɔ kpoo waa, wɛɛ ɡel baa ta pua hɛŋle ɡbo harɛ nɔ taa ja, dɛ heyaa ɡela o chɔɡ ba ta la.”

¹⁶ Ate, ba suuh tel Mosis dɛ ŋɔ, “Ya dɛ nyin kɛŋɔ ya do leɡa bonɔ tɛ ya peera, ásɛ dɛ vɔrɔwe bwɛjena tɛ ya haahna ne bii.

¹⁷ Yaa vɔwɛ ntoa tɔ ya Israel tena la kabora siee, dɛ́ la ba ne ka tel bela Korowii aa kpɔa dɛɛ ba yaa tɛɛ. Dɛ ya haahna ne bechale te dɔ bwɛjena danjwɛɛre aa bara harɛ la ta nɛra aa wola won ba yoo ba.

¹⁸ Israel tena la bɛlbwa ɛɛ dɔ bɔr waa ɛ o konee mɔɔ ya laa berɛ kaa ya soŋnibɔra.

¹⁹ Yaa bobɛlbwaa lɛ le ba be Jɔɔdan Moo la baŋ le kpa, ya dɔ ya bɔr Jɔɔdan Moo wee leebɔr bela.”

²⁰ Anee Mosis ŋɔ ba be ŋɔ, “Dɛ hɛɛ vɔwɛ ntoa Korowii sie dɛ́ ka yo,

²¹ dɛ́ bwa vɔwɛ ntoa, dɛ́ le Jɔɔdan Moo la baŋ ɡɛ Korowii aa ŋɔa la ka tel kɛ waa doŋi he dɔma he sie,

²² dɛ Korowii sɔɔh harɛ la nɛra kpeɡri nyoa mɔɔ he laa berɛ aa, dɛ he ɛ waa aa wera tɛ Korowii ne Israel tena, dɛ Korowii sɛoh kɛ harɛ la ɛ he kon.

²³ Dɛ he vɛoh he ta ɡɛ ɛɛ yaa, dɛ he ɛ wechɔɡa dɛ jo Korowii nɛ, aa ɡure he nyu taa.

²⁴ Hé vɔrɔwe bwɛɛre tɛ he haahna ne bii, dɛ́ ɛ leɡa tɛ he peera, ásɛ dɛ teŋɛ ɡɛ haa baɡɛ nyoa ŋɔ hɛɛ ɛo la ta.”

²⁵ Ate, Gad ne Rubin dea tena la ŋɔ Mosis be ŋɔ, “Ya dɔɔ, he bonɔɔna ɛɛ ɛ ɡɛ haa bola laanee.

²⁶ Ya haahna ne bii, ne peera dɛ nae ɛɛ ka Gelead bwɛjena nɔ taa.

²⁷ Kɛ he bonɔɔna, baa bɛlbwa waa vɔwɛ ntoa dɛ la laa la ɛɛ le Jɔɔdan Moo baŋee, ásɛ Korowii tɔ ya sie yá ka yo ɡɛ haa ŋɔa la.”

²⁸ Asɛ Mosis kpɔ ba wobɛlbwa do sɔfo Eliasa ne Nun bibaa Josua ne nomonome baa chɔ Israel deene la nyoo nɔn ta.

²⁹ O ŋɔ ba be ŋɔ, “Dɛ Gad ne Rubin dea tena, baa bɛlbwa vɔwɛ ntoa he ne o le Jɔɔdan Moo baŋ Korowii sie, dɛ ka yo dɛ sɔɔh harɛ la nɛra kpeɡri nyoa aa, hé kpɔ Gelead harɛ tɛɛ ba ó ɛ ba kon.

³⁰ Kɛ ba ta ntoa vɔwɛ he ne ba le Jɔɔdan Moo la baŋ aa, ate a chɛ kɛŋɔ bá dɔ Keenan harɛ la pera ɡɛ haa dɛ ba dɔe la.”

³¹ Asɛ Gad ne Rubin dea tena la ŋɔ, “Nomoa, he bonɔɔna ɛɛ ɛ ɡɛ Korowii aa ŋɔa laanee.

³² Yaa vɔwɛ ntoa tɔ Korowii siee, dɛ́ ɡale Jɔɔdan Moo la kaa Keenan harɛ ta, kɛ kondɔɔh yaa dɔa la te ɛɛ ka Jɔɔdan wee leebɔr baŋ bonɔɔ.”

³³ Asɛ Mosis kpɔ Amɔre Kooro Sihon, ne Basan tena Kooro Ɔɡ harɛre baa dɛ di kora a ta, ne a bwɛjena ne bwɛɛre aa bara bwa tɛ Gad ne Rubin dea tena, dɛ Josef bibaa Manasɛ dea pera tena.

³⁴ Gad dea tena la kwaarɔ vɔrɔwe bwɛjena Debɔn ne Atarɔt dɛ Arowa,

³⁵ ne Atrɔt Sofan ne Jasa dɛ Joɡbeha,

³⁶ ne Bɛt Nimra dɛ Bɛt Haran, dɛ ma danjwɛkpeɡa bara dɛ do leɡa a ta tɛ ba peera ɡe.

³⁷ Rubin dea tena la ɡe kwaarɔ vɔrɔwe Hɛsbɔn ne Eleale dɛ Kiriataim

³⁸ ne Nɛbo dɛ Baal Meɔn, ba berɔ beɡre ɡɛ sɔna nɔ. Ba kwaarɔ vɔrɔwe Sibma ɡe, dɛ berɛ kwaa pa bwɛjena baa kwaara vɔrɔwe la ɡe sɔna.

³⁹ Manasɛ bibaa Makir naanar la Gelead dɛ ka yo Amɔre tena ba fa aa lɔ bela dɛ doŋ ba.

⁴⁰ Anomanta, Mosis kpɔ Gelead tɛ Makir naanar baa ɛ Manasɛ dea tena la asɛ ba so bela.

⁴¹ Manasɛ naa Jɛɛ kaa yo lɛ bela bwɛjeɡre ane dɛɛ yera Havɔt Jɛɛ.

⁴² Asɛ Nɔba yo lɛ Kenat ne bwɛjeɡre aa baro dɛ kpɔ o sɔn Nɔba paa.