Nɛra Kura 31 - mzwDBL

Korowii yo Midian tena bɔ kem

¹ Korowii ŋɔ Mosis be ŋɔ,

² “Tɛr Midian tena deŋne waa baa kpɔa ɛ Israel tena la wa. Ásɛ mɔɔ dɛ́ chɔ he banɔn ta.”

³ Asɛ Mosis ŋɔ Israel tena la be ŋɔ, “Hé vɔwɛ baala la bane ntoa, bá ka pu Midian tena yo, dɛ́ tɛr ba deŋne bɔ kem tɛ Korowii.

⁴ Hé kpɔ baala kaɡboŋ le Israel deene la bɛlbwa ta, dɛ́ la laa la.”

⁵ Anomanta, baala kaɡboŋa fi dɛ banɛɛ vɔwɛ ntoa, dɛ́ ka yo. Baala kaɡboŋii le Israel deene la bɛlbwa ta.

⁶ Mosis ɡelɔ ba kaa laa la, asɛ sɔfo Eliasa bibaa Fenehas kpɔ laala aa do ɡoroŋ la ane, ne bɛle ba hoh dɛɛ baɡle laa la wa.

⁷ Ba kaa yo Midian tena ɡɛ Korowii aa do Mosis la, dɛ kpoo baala bwa.

⁸ Ba kpoo Midian koranar banue ja nɛra baa kpoora la ta. Banee koranar baa dɛ yer ba Evi ne Rekem ne Sor, ne Hur dɛ Reba. Ba kpo Beɔ bibaa Balam ɡe tokobii ne.

⁹ Israel tena la lawɛ Midian haahna ne bechale, dɛ lawɛ ba nae ne peera, dɛ kpɔ ba laala ɡe bwa kaa kɛŋɔ laa ta kwa.

¹⁰ Ba fuh Midian tena bwɛɛre ne bela baa kaa baŋre ba tɛnte deene dɛ so la bwa.

¹¹ Ba pa laala dɛ larawe nɛra ne kondɛɛra bwa laa la ta

¹² ba tɛ Mosis ne sɔfo Eliasa ne Israel tena. Dɛ ba soɡe Moab harɛ waa chɔa kaa Jɔɔdan Moo ta, Jeriko do baŋ bɛl.

¹³ Mosis ne sɔfo Eliasa dɛ nomonome baa chɔ Israel tena nyoa la bwa kaa cheme laa tena la bela baa baa baŋre ba tɛnte deene dɛ so la dahare.

¹⁴ Mosis baah di laa sitɔɔla baa chɔ laa tena kaɡboŋa ne lafare nyoo dɛ le laa ta ba la nɛ.

¹⁵ O bɔɔ ba ŋɔ, “Kɛ he ɡel Midian haahna la te nyu kɛ ba kenɛ?

¹⁶ Banee no Balam waa ta, a che a ta dɛ ɡel ya laa ya te kpɔ Korowii nɛɛ Peɔ Bwejen ta, asɛ weechɔɡa ba ya Korowii nɛra nɛɛ la.

¹⁷ Hé kpoo bibaala la bwa dɛ́ kpo haah bɛlbwa waa chɔ baa ka,

¹⁸ dɛ́ ɡel toli baa wola baala chɔe ka la tɛ he te.

¹⁹ He bini bɛlbwa waa kpo nɛn kɛɛ dɛ leɡe nɛn waa sewa la chɛ kɛŋɔ ó so tɛnte deene la dahare tɔpera anuanɛ. Tɔpetooro wee ne tɔpenuanɛ wee la, hé sɔ he ne nɛra haa laɡ ba laa ta la doŋa bwa ta.

²⁰ Hé laa doŋa kpɔ yale ne kwaa baa kpɔ oltɔn ne booh pona ne daa ɛa bɛlbwa ta.”

²¹ Asɛ sɔfo Eliasa ŋɔ laa tena baa la laa la be ŋɔ, “Mmara Korowii aa kpɔa tɛ Mosis laanee nɔ,

²² Suuɡaswɛm ne suuɡapoŋa ne ayaawa ne buni, dɛ kwaane baa dɔa dɛɛ le bwe ta, kpana ne kwaane baa kpɔa dɛɛ ɛ koŋkori,

²³ ne kwaa nii aa wola won ɛa wobɛlbwa chɛ kɛŋɔ hé kpɔ do nii ta mɔɔ a doŋa le a ta. Hé berɛ kpɔ do nee baa kpɔa sɔ kon doŋa dɛɛ ta la ta. Komɛlbwa ɡe waa wola nii wone la, hé kpɔ do nee la ta.

²⁴ Tɔpenuanɛ wee la, hé chɛɡɛ he laala dɛ́ laa he te kpɔ doŋa bɛlbwa ta ɡɛ haa dɛ ɛa la, ásɛ mɔɔ dɛ́ won jo he sobɔr bela.”

Laa ta kwaa bɔna

²⁵ Korowii berɔ ŋɔ Mosis be ŋɔ,

²⁶ “He ne sɔfo Eliasa ne dea nomonome baa chɔ nɛra la nyoa kure nɛra la bwa baa kaa laɡ ba, ne kondɛɛra baa larawa ba la.

²⁷ Ásɛ dɛ bɔne laa ta kwaa la tɛ banɔ la baa kaa yo la ne nɛra la bwa.

²⁸ Banɔ la baa kaa yo kwaa baa dɔa la, hé lɛa ba be cheɡ tɛ men Korowii. Hale nɛra kɛɛ nae kɛɛ keeɡore kɛɛ peera kɛɛ boohna oo, lafraanue bɛlbwa la hé lɛ bɔrbeŋkpoŋ.

²⁹ Hé lɛa le ba kwaa baa dɔ la ta, dɛ́ kpɔ tɛ sɔfo Eliasa á ɛ men Korowii kwa.

³⁰ Israel tena la ɡe kwaa la, hé lɛ nɛra ne nae ne keeɡore, ne peera ne boohna dɛ kondɛɛre te bɛlbwa ta, fifraanunue bini bɔrbeŋkpoŋa dɛ́ kpɔ tɛ Lewi dea tena baa dɛ ɛ n Tɛnte Dea la toma dɛɛ nyiŋi o ta la.”

³¹ Gɛɛ a do Mosis ne sɔfo Eliasa ɛ ɡɛ Korowii aa do Mosis ŋɔ ó ɛ la.

³² Laa tena laala baa kaa yo dɛ dɔ la lɔ peera kaɡboŋa lafraanumɛl fifraanuanɛ dɛ anue,

³³ nae lɔ kaɡboŋa lafraanuanɛ dɛ anɛ,

³⁴ keeɡore kaɡboŋa fifraanumɛl dɛ beŋkpoŋ,

³⁵ dɛ haahna kaɡboŋa lafraatoro dɛ banɛ baa wola baala chɔe bwa.

³⁶ Laa tena baa kaa yo kwaa baa dɔa laanee teŋa nɔ, peera lɔ kaɡboŋa lafraatoro fifraatoro dɛ anuanɛ lafraanue,

³⁷ asɛ Korowii kwaa lɔ peera lafraanumɛl fifraanuanɛ dɛ anue.

³⁸ Nae lɔ kaɡboŋa fifraatoro dɛ anumɛl, asɛ Korowii kwaa lɔ fifraanuanɛ dɛ anɛ,

³⁹ keeɡore lɔ kaɡboŋa fifraatoro dɛ lafraanue, asɛ Korowii kwaa lɔ fifraanumɛl dɛ beŋkpoŋ,

⁴⁰ nɛra ɡe lɔ kaɡboŋa fi dɛ banumɛl, asɛ Korowii dɔ nɛra fifraatoro dɛ banɛ.

⁴¹ Mosis kpɔ ɡɛ kwaa la ne nɛra la bwa tɛ sɔfo Eliasa ba ɛ Korowii kwa, ɡɛ Korowii aa do ba la.

⁴² Anɔ la Mosis aa kpɔa le laa tena baa kaa yo kwaa la ta dɛ kpɔ tɛ Israel tena baa wola ka yoi laanee nɔ.

⁴³ Ba dɔ peera kaɡboŋa lafraatoro fifraatoro dɛ anuanɛ dɛ lafraanue,

⁴⁴ nae lɔ kaɡboŋa fifraatoro dɛ anumɛl,

⁴⁵ keeɡore lɔ kaɡboŋa fifraatoro dɛ lafraanue

⁴⁶ dɛ nɛra kaɡboŋa fi dɛ banumɛl.

⁴⁷ Israel tena baa wola laa la laŋɛ kwaa baa dɔa laa ta la, Mosis kpɔ nɛmbeŋkpoŋ le nɛra fifraanue bɛlbwa bini, ne kondɛɛra fifraanue bɛlbwa bini, dɛ́ kpɔ tɛ Lewi dea tena baa dɛ nyiŋi Korowii Tɛnte Dea la ta dɛɛ ɛ o toma la.

⁴⁸ Asɛ sitɔɔla baa chɔ laa tena kaɡboŋa ne lafare nyoo la la Mosis be,

⁴⁹ dɛ ka ŋɔ, “He bonɔɔna baa kure laa tena baa lɔ ya nɔn ta, beŋkpoŋ kwaraa ta nyoɡrɛ.

⁵⁰ Anomanta, ya kpɔ jam kwaa dɛɛ ba ba tɛ Korowii. Suuɡaswɛm koŋkwaare ya bini bɛlbwa aa dɔa, ne baŋere ne jɔɡrɔre, ne noniseɡa ne deŋna kwa dɛ baŋa kwaare, dɛ́ kpɔ soŋe ya wechɔɡa Korowii be.”

⁵¹ Mosis ne sɔfo Eliasa lɛ suuɡaswɛm la baa kpɔa ɛ koŋkwaare la.

⁵² Suuɡaswɛm aa le laa sitɔɔla la be Mosis ne sɔfo Eliasa kpɔ ka tɛ Korowii la tɔɡre lɔ suuɡapoŋa kaɡboŋa fi dɛ anumɛl lafraanuanɛ fifraanue.

⁵³ Anɔ la laa tena la bɛlbwa aa kpɔa la te, a ɛ ba kwa.

⁵⁴ Mosis ne sɔfo Eliasa lɛ suuɡaswɛm la le laa sitɔɔla baa chɔ laa tena kaɡboŋa ne lafare nyoo la be, dɛ kpɔ kaa Korowii Dea Cheremibɔr bela, asɛ Israel tena la che o ta dɛɛ lii waa aa chiɡa.