Nɛra Kura 30 - mzwDBL

Nyoa baɡa Mmarare

¹ Mosis ŋɔ nomonome baa chɔ Israel deene nyoo la be ŋɔ waa Korowii aa do ba a ta laanee nɔ.

² “Dɛ nomɛlbwa baɡɛ Korowii nyoa kɛɛ dɛ ŋwɛɛ ntam waane ta naa, o bɛ ɡel a chɔ. Ó ɛ wobɛlbwa waa ŋɔa wɛɛ ɛo la.

³ Dɛ haah baɡɛ Korowii nyoa kɛɛ dɛ ŋwɛɛ ntam waane ta o toli saŋ waa lɔ o mɛɛ dem,

⁴ asɛ o mɛɛ no o nyobaɡa la, kɛɛ ŋwɛɛra la, o ta wobɛlbwa bolaa, a ta chɔ le.

⁵ O mɛɛ noɔ dɛ kaoh waa, a ta chɛ kɛ haah la teŋɛ a ta kpa. Korowii ɛɛ kpɔɔ kɛo dɛkalkɛ o mɛɛ ta sɛɛh.

⁶ Dɛ o yalɔ mɔɔ dɛ baɡɛ nyoa la kɛɛ a le o nyoa warane o baɡɛ dɛ kpɔ vɔrɔwe o te,

⁷ asɛ o jaa no dɛ tɔ nyoa o ta wobɛlbwa haah la be bolaa, amɔ te ntam kɛɛ nyoa waa baɡa dɛ kpɔ vɔrɔwe o te la ta chɔ le.

⁸ Dɛ o jaa noɔ dɛ kaoh ŋɔ o kpɔ nyobaɡa kwaa la la naa, o bɛ ɡel a chɔ. Korowii ɛɛ kpɔɔ kɛo.

⁹ Luhaah kɛɛ haah o ne o jaa aa vɛh dɔŋa, o ŋwɛɛ ntam kɛɛ dɛ baɡɛ nyoa la, a dawɛ o nɛ.

¹⁰ Dɛ haah yalɔ asɛ dɛ ŋwɛɛ ntam kɛɛ dɛ baɡɛ nyoa dɛ le waane ta,

¹¹ asɛ o jaa no o ta o haah kaeh yaa, dɛ ntam kɛɛ nyobaɡa la ta chɔ le.

¹² Dɛ o jaa la noɔ dɛ kaoh ŋɔ ó kpɔ ntam kɛɛ nyobaɡa kwaa la la, kɛ a ta chɛ kɛ ó ɡel a chɔ aa, Korowii ɛɛ kpɔɔ kɛo, dɛkalkɛŋɔ o jaa kaoh.

¹³ O jaaree dɔ kpeɡri kɛŋɔ ó sɛh kɛɛ dɛ vɛh nyobaɡa kɛɛ ntam haah la aa ŋwɛɛra la.

¹⁴ Dɛ o jaa la ta wobɛlbwa bolɛ awola waa noa kɛŋɔ o baɡɛ nyoa la aa, amɔ te dɛ o sɛh haah la ntam ne nyobaɡa waa kpɔa vɔrɔwe o te la. A waa o ta wobɛlbwa bolɛ la.

¹⁵ O jaa la noɔ mɔɔ dɛ kaoh waa, amɔ te haah la wechɔɡa dawɛ o jaa la nɛ.”

¹⁶ A ɡɛ Mmarare laanee Korowii do Mosis ŋɔ a chɔ le tɛ baa ne o haah, dɛ baa ne o bihaah o taa soɡe o mɛɛ dem.