Nɛra Kura 3 - mzwDBL

Arɔn bibaala wa

¹ Kenii Arɔn ne o bibaala dɛ Mosis waa do, ɡɛ saŋ Korowii aa bol waa Mosis be Sinai Bwejen ta la.

² Arɔn dɔ bibaala banaarɛ. Banee Nadab waa ɛ binomoa, ne Abihu ne Eliasa dɛ Itama.

³ Dɛ ba fuɡe no do ba nyuune ta dɛ ɛɛ ba sɔfore.

⁴ Kɛ Nadab ne Abihu kpɔ ba ɡbaɡba ŋwɛnɛ ta dɛ buh nii aa wola chɛɛ kɛŋɔ bá kpɔ fuh ɛ saraha tɛ Korowii, Sinai Bwejen pua hɛŋle ɡbo harɛ ta, asɛ o kpoo ba. Ba ta bii dɔe, anomanta, dɛ Eliasa ne Itama ɡboo ja ba mɛɛ Arɔn nɛɛ dɛɛ ɛ sɔfore toma.

Lewi dea tena lee bá cha sɔfore

⁵ Korowii ŋɔ Mosis be ŋɔ,

⁶ “Kpɔ Lewi dea tena ka tɛ sɔfo Arɔn, ásɛ ba ja o nɛɛ dɛɛ cha sɔfore toma.

⁷ Baa dɛɛ ɛ n Dea Cheremibɔr la tomaa, dɛɛ tɛ o ne Israel tena la bwa.

⁸ Lewi dea tenaa chɛ kɛ bá nyiŋi n Dea Cheremibɔr kwaa bwa ta, dɛ́ berɛ dɛɛ ɛ Israel tena la bwa toma ba fe aa dɛɛ ɛ bela dɛɛ tɛɛ ba.

⁹ Kpɔ Lewi dea tena la tɛ Arɔn ne o bibaala báa cha ba. Israel tena bini, ba ɡboo chɛ kɛ bá kpɔ ba te dɛɛ ɛ o toma.

¹⁰ Le Arɔn ne o bibaala dɛ́ kpɔ sɔfore toma la do ba nɔn ta. Nomɛlbwa waa wola sɔfo ɛɛ dɛɛ ɛ sɔfo toma la chɛ kɛŋɔ bá kpoo.”

¹¹ Korowii berɔ ŋɔ Mosis be ŋɔ,

¹² “Le awola maa kpoo Ijipt tena bibanloɡla bwa laanee n le Israel tena bibanloɡla tɛ n te, nɛra ne kondɛɛra bibanloɡla bwa ɛ n kwa.

¹³ N kpɔ Lewi dea tena le Israel tena bini, dɛ kpɔ chiɡ Israel bibanloɡle naa ta, ba ɛ n kwa. Menee Korowii.”

Lewi dea tena kura

¹⁴ Korowii berɔ bol waa Mosis be Sinai pua hɛŋle ɡbo harɛ la ta dɛ ŋɔ,

¹⁵ “Kure Lewi dea tena ne ba lolanar bwa. Kure baala bwa, le bechale baa dɔ korobie beŋkpoŋ ka tel banomonome ta.”

¹⁶ Asɛ Mosis kur ba ɡɛ Korowii aa doo ŋɔ ó ɛ la.

¹⁷ Lewi bibaalaa nɔ, Gɛsɔn ne Kohat dɛ Merari.

¹⁸ Gɛsɔn dea biirii nɔ, Libni ne Simee.

¹⁹ Kohat ɡe dea biirii nɔ, Amram ne Isiha ne Hɛbrɔn dɛ Usiel.

²⁰ Merari dea biirii nɔ, Maali ne Musi. Kenii Lewi dea tena ne ba lolanar waa do.

²¹ Gɛsɔn dea biirii Libni ne Simee tena.

²² Baa kur ba le bibaala baa di korobie beŋkpoŋ dɛ kaa banomonome ta la, ba lɔ kaɡboŋa banuanɛ lafraanue.

²³ Gɛsɔn naanar la chɛ kɛ bá baŋre ba tɛnte deene Korowii Tɛnte Dea la habɔɔ wee cholibɔr.

²⁴ Gɛsɔn naanar bwa nomoa waa tɔ ba sie laanee Lael bibaa Eliasaf.

²⁵ N Dea Cheremibɔr toma baa kpɔa do ba nɔn ta laanee kɛŋɔ, báa nyiŋi o ne kwaa baa kpɔa bɔle o bini ne baŋ, dɛ o doonyoa pateesan la ta,

²⁶ ne pateesanre aa bar bela dembaah la ne saraha kon la, ne pateesan waa tɔ dembaah la doonyoa, ne o ŋwɛɛra ta. Gɛ bwa aa chɛ kɛ bá ɛ anɔ bwa lɔ ba nɔn ta.

²⁷ Kohat dea biirii Amram ne Isiha ne Hɛbrɔn dɛ Usiel.

²⁸ Ba bini baala baa kur ba ba di korobie beŋkpoŋ dɛ́ kaa banomonome ta lɔ kaɡboŋa banuatoro lafraanumɛl. A ɡɛ Kohat tena nɔɔ chɛ kɛŋɔ báa nyiŋi Korowii Tɛnte Dea la ta.

²⁹ Banee chɛ kɛ bá baŋre ba tɛnte deene Korowii Tɛnte Dea la habɔɔ weekaŋle harɛbɔr pera.

³⁰ Asɛ Usiel bibaa Elisafan ɛ Kohat dea nomoa.

³¹ Ba tomaa kɛŋɔ báa nyiŋi Korowii Ne Nɛwɛnyina Fɔo Daka la ta, ne teebur ne kandea daa ne kwaa baa dɛ ɛ saraha a ta la, ne koŋkwaa sɔfore aa kpɔ dɛɛ ɛ toma Korowii Tɛnte Dea bela, ne pateesan waa tɔ Boɡoroŋ Tenten la ta. Gɛ bwa aa chɛ kɛ bá kpɔ kwaa nɔ bwa ɛ toma lɔ ba nɔn ta.

³² Dɛ sɔfo Arɔn bibaa Eliasaa Lewi dea tena la nomoa. Onee ba le o chɔ nɛra baa dɛ ɛ toma Boɡoroŋ bela nyoa.

³³ Merari dea biirii Maali ne Musi tena.

³⁴ Dɛ ba bini baala baa kur ba dɛ le korobie beŋkpoŋ, dɛ kaa banomonome ta lɔ kaɡboŋa banumɛl lafraanɛ.

³⁵ Abihail bibaa Suriel ɛ Merari dea bii bwa nomoa. Banee chɛ kɛ bá baŋre ba tɛnte deene Korowii Tɛnte Dea la habɔɔ weekaŋle nyunduabɔr pera.

³⁶ Banee ba le ŋɔ báa nyiŋi Korowii Tɛnte Dea la daa, ne o dachiɡri ne loɡa aa lɔ a mune, ne o doli ne o koŋkwaa aa jaa bwa ta. Gɛ bwa aa chɛ kɛ bá kpɔ anɔ bwa ɛ toma lɔ ba nɔn ta,

³⁷ ne kwaa baa kpɔa baŋre bar o dembaah la, ne loɡa aa lɔ a mune ta, ne kwaa baa kpɔa baŋre tɛnte la, dɛ o ŋwɛɛra.

³⁸ Mosis ne Arɔn ne o bibaala chɛ kɛ bá baŋre ba tɛnte deene Korowii Tɛnte Dea la sie wee leebɔr. Banee dɛɛ ba báa ɛ Boɡoroŋ bela toma, dɛ́ɛ tɛ Israel tena bwa. Nomɛlbwa waa ɛ Mosis toma ne sɔfo Arɔn toma la chɛ kɛ bá kpoo.

³⁹ Lewi dea tena Mosis ne Arɔn aa kur ba ɡɛ Korowii aa do ba dɛ le bibaala baa di korobie beŋkpoŋ ta kaa banomonome ta la lɔ baala kaɡboŋa fifraanɛ dɛ banɛ.

⁴⁰ Korowii ŋɔ Mosis be ja ŋɔ, “Kure Israel deene bibanloɡla baa di korobie beŋkpoŋ dɛɛ kaa la pɛ, dɛ́ chwerɛ ba bwa sɔna.

⁴¹ Le Lewi dea tena la tɛ mɛ bá chiɡ Israel biloɡla naa ta. Ba kondɛɛra ɡe ɛ n kwa dɛ chiɡ Israel tena bwa kondɛɛra aa loɡla la naa ta. Menee Korowii.”

⁴² Ate, Mosis kure Israel tena bibanloɡla bwa baa di korobie beŋkpoŋ dɛ ka tel banomonome ta, dɛ chwerɛ ba sɔna ɡɛ Korowii aa doo la.

⁴³ Dɛ ba bwa lɔ kaɡboŋa fifraanɛ dɛ banɛ lafraanɛ fifraanuanɛ dɛ batoro.

⁴⁴ Korowii ŋɔ Mosis be ja ŋɔ,

⁴⁵ “Lewi dea tena ne ba kondɛɛra bwa chɛ kɛ bá ɛ n kwa, dɛ́ chiɡ Israel tena bibanloɡla naa ta. Ba kondɛɛra la ɡe chiɡ Israel tena kondɛɛra biloɡla naa ta. Menee Korowii.

⁴⁶ Israel tena bibanloɡla aa ɡwaa Lewi dea baala lafraanɛ fifraanuanɛ dɛ batoro nɔ,

⁴⁷ bá kpɔ suuɡapoŋa anue charɛ bɛlbwa nyu, ɡɛ baa maɡa bil Korowii Dea a ɛ suuɡa bwejeɡre fifraanɛ la.

⁴⁸ Kpɔ nɛra baa ɡwaala la suuɡa tɛ Arɔn ne o bibaala.”

⁴⁹ Gɛɛ a do Mosis lɛ nɛra baa ɡwaala la suuɡa ɡɛ Korowii aa bola la.

⁵⁰ Suuɡapoŋa la bwa lɔ kaɡboŋ lafraatoro fifraanumɛl dɛ anue, ɡɛ baa maɡa bil Korowii Dea la.

⁵¹ Asɛ Mosis kpɔ suuɡapoŋa la tɛ Arɔn ne o bibaala ɡɛ Korowii aa doo la.