Nɛra Kura 28 - mzwDBL

Tɔpere bɛlbwa sarahare

¹ Korowii ŋɔ Mosis be ŋɔ

² ó bol Israel tena la be ŋɔ, “Hé kpɔ mea aa chɛ kɛ hé kpɔ ba ɛ saraha saŋ aa chɛa ta, dɛ́ fuah a sɔɔh do som Korowii be.

³ Kwaa haa kpɔ ba ɛ saraha dɛ́ fuah dɛɛ tɛo tɔpere bɛlbwa laanee, pebali anɛ bɛlbwa aa di benanyoa waa wola kirihiah bɛlbwa dii.

⁴ Hé kpo pebali la beŋkpoŋ chɔɔbɔr, asɛ onɔ la ɡe jɔmɔra.

⁵ Hé kpɔ men baa nama a kper kɛrɛdɛ kuruwa del, dɛ́ kpɔ ɔleve noo pɛrɛntoa beŋkpoŋ ne fah koo men la ta ba ɛ mea saraha.

⁶ A ɛ saŋ bɛlbwa saraha baa dɛ fuh a bwa dɛɛ tɛ Korowii, a sɔɔh ɛɛ do o som. Sinai Bwejen taa bá pa a mun, á ɛ saraha baa dɛ fuah.

⁷ Hé kpɔ sen pɛrɛntoa beŋkpoŋ ne tama ne loɡla pebale la, dɛ́ ba fuɡe sen la ta saraha kon la ta, ásɛ a ɛ sen saraha.

⁸ Jɔmɔra saraha la ɡe, hé ɛa ɡɛ haa ɛ anɔ la la, dɛ́ kpɔ a ɡe sen ja pebale nɛɛte la ta ɛ sen saraha. A ɡe ɛ mea saraha a sɔɔh aa dɛ do Korowii som.

Ona Tɔpere sarahare

⁹ Ona Tɔpere ta, hé kpɔ pebali anɛ bɛlbwa aa di benanyoa, aa wola kirihiah bɛlbwa dii, dɛ́ kpɔ men baa nama a kper kɛrɛdɛ kuruware anɛ koo ɔleve noo ta, á ɛ mea ne sen saraha.

¹⁰ Anee ɛ saraha baa dɛ fuah Ona Tɔpere, a ja saraha haa dɛɛ fuah saŋ bɛlbwa ne sen saraha ta.

Korobie bɛlbwa tɔpeloɡle saraha

¹¹ Korobie bɛlbwa tɔpeloɡle ta la, hé kpɔ nabali anɛ ne pebal dɛ pebali anuanɛ a bɛlbwa aa di benanyoa, aa wola kirihiah bɛlbwa dii ɛ saraha tɛ Korowii.

¹² Hé kpɔ men baa nama a kper kɛrɛdɛ kuruware atoro, dɛ́ kpɔ koo ɔleve noo ta ne nabal beŋkpoŋ la ta, á ɛ mea saraha. Ásɛ dɛ kpɔ men kuruware anɛ ja pebal la ta.

¹³ Pebali anuanɛ la bɛlbwa ɡe la, hé kpɔ men baa nama a kper kɛrɛdɛ kuruwa del koo ɔleve noo ta. A ɛ saraha baa dɛ fuah aa sɔɔh ɛɛ do som Korowii be.

¹⁴ Nabal la bɛlbwa la, hé kpɔ sen pɛrɛntoa dela atoro, dɛ́ kpɔ sen pɛrɛntoa anɛ ja pebal la bɛlbwa ta, dɛ́ kpɔ sen pɛrɛntoa beŋkpoŋ ne fah ja pebiiri la ɡe ta. Anɔɔ ɛ saraha haa fuah korobie bɛlbwa ta benanyoa bɛlbwa.

¹⁵ Saraha haa dɛɛ ɛa dɛɛ fuah saŋ bɛlbwa, ne a sene habɔɔ la, bombal beŋkpoŋii chɛ kɛŋɔ, hé kpɔ ba ɛ wechɔɡa kpɔe dɛ kɛ saraha tɛ Korowii.

Galekaa Tɔpejen dii

¹⁶ Korobie waa tɔ sie tɔpera fi dɛ anaarɛ la ɛ Galekaa Tɔpejen dɛ tɛ Korowii, a chɛ kɛŋɔ hé diu.

¹⁷ Korobie la tenten tɔpera fi dɛ anue la ɛ tɔpejen haa lɛ sie o ta. Hé di paanoo iisi aa wola toole a ta la tɔpera anuanɛ.

¹⁸ Tɔpejen la tɔpeloɡle la, hé cheme dɛ́ tomɛ Korowii, dɛ bɛ toma bɛlbwa ɛ.

¹⁹ Hé kpɔ nabali anɛ ne pebal ne pebali anuanɛ, a bɛlbwa aa dɔ benanyoa aa wola kirihiah bɛlbwa dii ba ɛ saraha, dɛ́ fuah tɛ Korowii.

²⁰ Nabal bɛlbwa la, hé kpɔ men baa nama a kper kɛrɛdɛ kuruware atoro koo ɔleve noo ta. Pebal la ɡe la, hé kpɔ men baa nama a kper kɛrɛdɛ kuruware anɛ.

²¹ Pebali la bɛlbwa ɡe, hé kpɔ men baa nama a kper kɛrɛdɛ la kuruwa ja.

²² Hé kpɔ bombal beŋkpoŋ ja ɛ wechɔɡa kpɔe dɛ kɛ saraha, dɛ́ soŋe he wechɔɡa Korowii be.

²³ Hé ɛ ɡɛ ja chɔɔbɔr saraha haa dɛ ɛ dɛɛ fuah la ta.

²⁴ Tɔpera anuanɛ la ta la, hɛ́ɛ ɛ mea saraha la tɔpere bɛlbwa, ásɛ a sɔɔh ɛɛ do Korowii som. Hé ɛa dɛɛ ja saraha haa ɛa tɔpere bɛlbwa dɛɛ fuah la, ne sen saraha la ta.

²⁵ Tɔpenuanɛ ta, hé cheme dɛ́ tomɛ Korowii, dɛ bɛ toma bɛlbwa ɛ.

Koo Kondikwaa Koma Tɔpejen dii

²⁶ Awola haa kpɔ mefala dɛɛ ba dɛ́ ba tɛ Korowii la, a ɡɛ Koo Kondikwaa Koma Tɔpejen la dii ta, hé cheme dɛ́ tomɛ Korowii dɛ bɛ toma bɛlbwa ɛ.

²⁷ Hé kpɔ nabali anɛ ne pebal ne pebali anuanɛ a bɛlbwa aa di benanyoa, aa wola kirihiah bɛlbwa dii ba ɛ saraha, dɛ́ fuah tɛ Korowii a sɔɔh ɛɛ do som o be.

²⁸ Nabal bɛlbwa la, hé ɛ mea saraha dɛ́ kpɔ men baa nama a kper kɛrɛdɛ kuruware atoro dɛ́ koo ɔleve noo a ta. Pebal la ɡe, hé kpɔ men kuruware anɛ ja.

²⁹ Pebali anuanɛ la bɛlbwa ɡe, hé kpɔ men la kuruwa beŋkpoŋ ja a ta.

³⁰ Dɛ́ kpɔ bombal beŋkpoŋ ja ɛ saraha soŋe he wechɔɡa.

³¹ Hé ɛ a ɡɛ kwaa nɔ ne a sen sarahare, dɛ́ kpɔ ja saraha haa ɛa dɛɛ fuah saŋ bɛlbwa la ne a mea sarahare bwa ta. Hé nyiŋi kɛrɛdɛ kɛŋɔ nae ne peera ne boohna la bɛlbwa ta kirihiah dii.”