Nɛra Kura 25 - mzwDBL

Israel tena ne Moab tena wa

¹ Israel tena aa baŋre ba tɛnte deene dɛ ta so Akaasia Fɛlembɔjen bini la, ba bini baala pa mun lawɛ Moab haahna dɛɛ chɔ.

² Haahna la yerɛ Israel baala la dɛɛ la ba voɡa mune, dɛ ka kpoo kwaa dɛɛ tɛ ba voɡa, ba ne ba di dɛɛ ɡuŋi voɡa la harɛ.

³ A cheɡɛ a ta Israel tena la ne Moab tena la bwa ɛɛ tomɛ voɡ Baal waa lɔ Peɔ la. Asɛ Korowii bwaawee ir ba nɛ.

⁴ Korowii ŋɔ Mosis be ŋɔ, “Kpoo ɡɛ Israel nomonome la webaŋa n siwi ta tɛ mɛ, ásɛ n baah bɛ ba nɛɛ di kohona kpa.”

⁵ Ate, Mosis ŋɔ Israel tena sitɔɔla be ŋɔ, “A chɛ kɛ hé bini bɛlbwa kpo baa bɛlbwa waa kpɔ o te ka ja dɛɛ tomɛ voɡ Baal waa lɔ Peɔ la.”

⁶ Mosis ne Israel tena la bwa aa cheme Korowii Dea Cheremibɔr la doonyoa dɛɛ wi ba te la, ba bwa siwi ta, Israel tena baala la bɛl lawɛ Midian haah ba jo o tɛnte dea, o ne o chɔ.

⁷ Asɛ sɔfo Arɔn naa Fenehas, waa ɛ Eliasa bibaa na ɡɛ dɛ le nɛra la bini dɛ ka kpɔ o lampea,

⁸ dɛ ka pu baa la tɛnte dea la bini dɛ yaɡɔ vah ka yaɡɛ haah la, ate weechɔɡa aa lɔ Israel tena la nyoa sɔɔh.

⁹ Nɛra baa serewe weechɔɡa la ta lɔ nɛra kaɡboŋa fifraanɛ dɛ banaarɛ.

¹⁰ Korowii ŋɔ Mosis be ŋɔ,

¹¹ “Fenehas sie aa wola waa la ta lɛɛ la, a ɡelɔ n baah sɔɔh Israel tena nɛ. Anomanta, n ta ban hee.

¹² Ŋɔ Fenehas be ŋɔ, n dɛ fɔwɛ deŋnesɔɔhna fɔo n ne o baah ta.

¹³ Ásɛ a chɔ le tɛ o ne o naanar baa ka ba bwa, kɛ bá ɛ sɔfore saŋ bɛlbwa dɛɛ la, dɛkalkɛŋɔ o ta nomɛlbwa toma sɛɛh ka ja men Korowii waa dɛ tom mɛ nɛ, dɛ́ soŋe Israel tena bwa wechɔɡa tɛɛ ba.”

¹⁴ Israel baa Fenehas aa kpo o ne Midian haah la sɔne Simri. Simeon dea nomoa Salu bibaalee.

¹⁵ Midian haah la ɡe sɔne Kosbi. Midian tena dea nomoa Sor bihaahnee.

¹⁶ Korowii ŋɔ Mosis be ŋɔ,

¹⁷ “Midian tena la ɛ he dɔma, hé kpoo ba,

¹⁸ dɛkalkɛŋɔ ba kpɔ heyaa ɛ dɔma, dɛ neɡre heyaa he tomɛ ba voɡ Baal waa lɔ Peɔ. Midian nomoa bihaah Kosbi ɡe dɔ seo a ɡɛ weechɔɡa la ta.”