Nɛra Kura 23 - mzwDBL

Waa Korowii aa tɔ sie bol Balam be

¹ Balam ŋɔ Kooro Balak be ŋɔ, “Ma kwaa baa dɛ ɛ saraha a ta anuanɛ, ásɛ dɛ nyin nabala anuanɛ ne pebala anuanɛ ba tɛ mɛ.”

² Kooro Balak ɛ ɡɛ Balam aa ŋɔa la, ba nɛra banɛ la kpɔ nabal ne pebal ɛ saraha, saraha kon la bɛlbwa ta.

³ Balam ŋɔ Kooro Balak be ŋɔ, “Che saraha kwaa la jwɛɛh ásɛ n le kɛrɛ, Korowii ken ɛɛ bol waa n bee. Wobɛlbwa waa pili a bini baɡ mɛ la, mɛɛ ŋɔ he bee.” Asɛ dɛ kaa deŋɡare bɛl doa.

⁴ Asɛ Korowii ka chemo dɛ bol waa o be, asɛ Balam ŋɔ, “N ma kwaa baa dɛ ɛ saraha a ta anuanɛ, asɛ dɛ kpo nabal ne pebal a bɛlbwa ta.”

⁵ Asɛ Korowii kpɔ waane tɛ Balam ŋɔ ó ka bol Kooro Balak be.

⁶ Ate, o la dɛ ka na kɛŋɔ Kooro Balak ne Moab nomonome la bwa cheɡɛ o saraha kwaa la jwɛh.

⁷ Balam bol waa Korowii aa bola la dɛ ŋɔ, “Kooro Balak kaa kpɔ mɛ le Siiria harɛ ta, Moab harɛ ta wee leebɔr bwejena bɔr. Dɛ ŋɔ n ba tomɛ Israel tena toma tɛo, ba chɔɡ Israel tena tɛ mɛ.

⁸ Ɛrɛɛ mɛɛ ba wona chɔɡ nɛra Korowii aa swee ba andɛɛɡa ɔ? Ɛrɛɛ mɛɛ ba wona chɔɡ nɛra Korowii aa wola ban chɔɡɔ ɔ?

⁹ N cheɡɛ bwejena dor dɛ na ba, n cheɡɛ deŋɡarere ta dɛ veeh ba. N nao kɛ ba ɛ nɛra baa pere ba te, baa ba te kpɔe dɛɛ ja harɛ nɔ ta nɛra bini.

¹⁰ Umee dɛ́ won kure Israel tena ɔ? Dɛ he bɔne ba bini bɔre anaarɛ kwaraa naa, umee dɛ́ won jemɛ ba nyoa ɔ? N dɛ nyin n sewɛ kɛ nɛra ba wa aa toɡra, ɡel n seo do kɛ ban!”

¹¹ Anee Kooro Balak ŋɔ Balam be ŋɔ, “Bɔkwa waa he ɛɛ mɛ ken? N kaa kpɔe ba ŋɔ hé ba tomɛ n dɔma toma, kɛ he ta wobɛlbwa ɛɛ, andɛɛɡaa he berɛ ŋɔ ba dɔ!”

¹² Ate Balam ŋɔ, “A chɛ kɛ ń bol waa Korowii aa ŋɔa n bol ɡbo.”

Waa Korowii aa bol Balam be nɛɛtena

¹³ Kooro Balak ŋɔ Balam be ŋɔ, “Ba ya kaa bofale, bela haa dɛ ba wona na Israel tena la. Ba bini banee hɛɛ ba nae, ba bwa laa. Che bela tomɛ ba toma tɛ mɛ.”

¹⁴ Dɛ kpɔɔ kaa kpɔɡ baah bobɛl baa dɛ yerɛ bela Sofim, Pesɡa Bwejen doa. O ma kwaa baa dɛ ɛ saraha a ta anuanɛ, dɛ kpɔ nabal ne pebal ɛ saraha bɛlbwa ta.

¹⁵ Balam ŋɔ Kooro Balak be ŋɔ, “Che he saraha kwaa nɔ jwɛh ásɛ n ka na, Korowii ken ɛɛ bol waa n bee.”

¹⁶ Ate, Korowii bol waa Balam be ŋɔ, “Berɛ la Kooro Balak be dɛ́ ka ɡel o no.”

¹⁷ Asɛ Balam berɛ la Kooro Balak be dɛ o ne Moab nomonome ta cheɡɛ saraha kwaa la jwɛh. Anee Kooro Balak bɔɔ Balam ŋɔ, “Bɔkwa waa Korowii bol ɔ?”

¹⁸ Balam bol waa Korowii aa bola la dɛ ŋɔ, “N naa Kooro Balak, ir dɛ́ no n be. Sepɔ bibaa, no n waa nɔ.

¹⁹ Korowii ta nɛwɛnyini ɛɛ wɛɛ teŋe nyosone, kɛɛ nɛn dɛ́ charɛ o liire. O dɛ bol waa dɛ́ ɡel a ɛɛ yaa? Wɛɛ baɡɛ nyoa waa a taa teŋaa?

²⁰ O do mɛ ŋɔ n swee andɛɛɡa tɛɛ ba. O swee andɛɛɡa tɛɛ ba maa wola won bera.

²¹ N ta wahala bɛlbwa nae Israel tena nɛ. N ta tebinichɔɡ nae ba bini. Korowii baa dɛ tomɔ ja ba nɛ. Ba kooroo on baa kpɛɛro.

²² Korowii laɡ ba le Ijipt harɛ ta, dɛ yo dɛɛ tɛɛ ba kɛŋɔ kpɔɡ bini nao ken.

²³ Sɔm we-ɛɛla aa won ɛ Israel tena wobɛlbwa, voɡre bɛlbwa ɡe aa ban wo. Taraken baa bol Israel tena waa ŋɔ, ‘He na waa Korowii aa ɛa tɛɛ ba.’

²⁴ Ba do kɛŋɔ nyujente nee ken, waa soɡe dɛɛ biɡri, dɛ o di ol waa kpoo. Waa so biɡri, dɛ o kpɛle kon waa kpoo chal bwa.”

²⁵ Ate, Kooro Balak ŋɔ Balam be ŋɔ, “Dɛ haa ba tomaa tomɛ aa, bɛ andɛɛɡa ɡe swee tɛɛ ba.”

²⁶ Anee Balam chaŋo ŋɔ, “N ta he be ŋɔe ŋɔ waa Korowii aa bola laanee mɛɛ ba ɛɛ yaa?”

Waa Korowii aa bol Balam be toorotena

²⁷ Kooro Balak berɔ ŋɔ Balam be ŋɔ, “Ba ya kaa bofale, a ken ɛɛ too Korowii tea, ásɛ he won che bela tomɛ ba toma tɛ mɛ.”

²⁸ Asɛ Kooro Balak kpɔ Balam kaa Peɔ Bwejen doa, bela haa che dɛ́ na pua hɛŋle ɡbo harɛ la.

²⁹ Asɛ Balam ŋɔ o be ŋɔ, “Ma kwaa baa dɛ ɛ saraha a ta anuanɛ, dɛ́ kpɔ nabala anuanɛ ne pebala anuanɛ ba tɛ mɛ.”

³⁰ Kooro Balak ɛ waa Balam aa ŋɔ o be la, dɛ kpɔ nabal beŋkpoŋ ne pebal beŋkpoŋ ɛ saraha kon la bɛlbwa ta.