Nɛra Kura 22 - mzwDBL

Kooro Balak yerɛ Balam

¹ Israel tena berɔ ir dɛ ka baŋre ba tɛnte deene, dɛ so Moab harɛpɛɛ waa chɔa kaa Jɔɔdan Moo nyoa, asɛ Jeriko do baŋ bɛl.

² Belaa Sepɔ bibaa Balak, na waa bwa Israel tena aa kpɔa ɛ Amɔre tena,

³ asɛ ɔmee lawɛ Moab tena bwa kohona baa ɔmɛ Israel tena.

⁴ Belaa Moab tena ka ŋɔ Midian nomonome be ŋɔ, “Nɛnlaa tenten dɛ́ ba dɛ́ ba chɔɡ ya ne ya komɛlbwa kwaraa kɛŋɔ nao aa dɛ chwe kpɔɡa.” Ate, Sepɔ bibaa Kooro Balak

⁵ tomɛ toroma ba ka kpɔ Beɔ bibaa Balam. Dɛ o lɔ bwɛɛ bɛl baa dɛ yerɔ Pɛtɔ, o bɛne Yufretis Moo nyoa. Kooro Balak ŋɔ, “Nɛra bane warɔ pirim dɛ le Ijipt harɛ ta, dɛ ba su bɔr bwa dɛɛ ba dɛ́ ba lɛ n harɛ.

⁶ Ba kpeɡri ɡwaa mɛ, anomanta, ba tomɛ ba toma tɛ mɛ, n ken ɛɛ wonoo pɔ ba nɛɛ dɛ́ doŋ ba le n harɛ nɔ ta. N jemɔ kɛŋɔ nomɛlbwa haa sweero andɛɛɡa la, dɛ́ dɔ wedɛɛɡa. Banɔ la ɡe haa taah ba dɛ́ na a wa.”

⁷ Ate, Moab nomonome ne Midian nomonome la kpɔ suuɡa baa kpɔ ka tomɛ toma la kaa. Baa la Balam be la, ba bol waa Kooro Balak aa ŋɔa la.

⁸ Asɛ Balam ŋɔ ba be ŋɔ, “Hé chɔ ásɛ n ɛ dɛ́ bol he be waa Korowii aa ŋɔ n be.” Ate, nomonome la so Balam be.

⁹ Jwaana la ne, Korowii bɔɔ Balam ŋɔ, “Nɛn besooree lɔ he be nɔɔ?”

¹⁰ Anee Sepɔ bibaa Balam chaŋe ŋɔ, “Balak waa ɛ Moab harɛ ta kooro laanee tom ba n be ŋɔ,

¹¹ ‘Nɛra bane baa wara pirim dɛ le Ijipt harɛ ta, baa su bɔr bwa ken. Dɛ he ba, dɛ́ ba tomɛ ba toma tɛo, o ken ɛɛ won yoo ba dɛ́ doŋ ba.’ ”

¹² Korowii ŋɔ Balam be ŋɔ, “Bɛ ban pu kaa, bɛ nɛra la ɡe toma tomɛ. Israel tena ɛ nɛra maa swee andɛɛɡa tɛɛ ba.”

¹³ Tɔɔ aa pera chɔɔ la, Balam ŋɔ Kooro Balak nomonome la be ŋɔ, “Hé berɛ kaa he harɛ ta, Korowii ta sɛɛh kɛ n ne he kaa.”

¹⁴ Ate, nomonome la berɛ kaa Kooro Balak be dɛ ka ŋɔ, “Balam ta sɛɛh kɛ ya ne ó ba.”

¹⁵ Asɛ Balak berɛ tomɛ o nomonome baa dɔ sɔna dɛ warɛ ɡwaa banɔ la.

¹⁶ Ba la Balam be dɛ kpɔ kala la ka tɛo ŋɔ, “Bɛ ɡel wobɛlbwa tɔe ŋwɛnɛ n be bala.

¹⁷ Mɛɛ bɔe kemee kɛrɛdɛ, ásɛ wobɛlbwa ɡe haa bol la, mɛɛ ɛo. Ba tomɛ ba toma tɛ mɛ.”

¹⁸ Anee Balam ŋɔ ba be ŋɔ, “Hale Kooro Balak kpɔ o kara mun suuɡapoŋa ne suuɡaswɛm bwa tɛ mɛ naa, maa won ɛ wobɛlbwa Korowii aa do mɛ ŋɔ n bɛ ɛ la. Hale kohona kɛɛ tama bɛlbwa.

¹⁹ He ɡe chɔ bonɔ fini ɡɛ banɔ la aa chɔa la, ásɛ n no waa Korowii aa dɛ ba n be bola.”

²⁰ Awola jwaana la, Korowii ŋɔ Balam be ŋɔ, “Nɛra nɔ aa bala dɛɛ ba dɛ́ ba kpɔe nɔ, kpɔ he te he ne ba kaa, kɛ ka ɛ anɔ la maa ŋɔ he ɛ ɡbo.”

Balam ne o keeɡo

²¹ Tɔɔ aa pera chɔɔ la, Balam iro dɛ pa yale dawɛ o keeɡo ta dɛ teeh so o ta, o ne Moab nomonome la chiɡ ŋwɛnɛ ta dɛ kaa.

²² Waa dɛ kaa la, Korowii baah diu, asɛ o ɡel o nyundua torome ba che ŋwɛnɛ la baah ta dɛ tɔɔ ŋwɛnɛ. Dɛ Balam soɡe o keeɡo la ta, o bonɔɔna banɛ ja o nɛ.

²³ Keeɡo la na Korowii nyundua torome la kɛŋɔ waa pamɛ kere dɛ che ŋwɛnɛ la ta, asɛ o bɛɡɛ jo kpɔɡ bini. Asɛ Balam lɔɔ dɛ ɡel o ba chiɡ ŋwɛnɛ ta.

²⁴ Asɛ Korowii nyundua torome la berɛ ka che daa kooni anɛ ane baah ta, asɛ danjwɛɛ do diɡ ne ɡal, ŋwɛnɛ chɔ a baah ta feelɔɔ ken.

²⁵ Keeɡo la na Korowii nyundua torome la ja, dɛ kpɔ o te ka pɛl danjwɛɛ la, anee Balam nakpala seeɡe danjwɛɛ la. O berɛ lɔ keeɡo la ja.

²⁶ Korowii nyundua torome la berɛ kaa sie, dɛ ka che bofeelɔɔ bobɛl keeɡo la aa wola won bɛɡɛ kpɔ diɡ kɛɛ ɡal.

²⁷ Keeɡo la aa na Korowii nyundua torome la, o chɔ harɛ, asɛ Balam baah di o kpɔ o daŋɡbala lɔɔ.

²⁸ Asɛ Korowii ɡel keeɡo la bol waa ta Balam nɛɛ ŋɔ, “Ɛrɛɛ n ɛɛ he lɔɔ mɛ kera atoro bwa ken?”

²⁹ Anee Balam chaŋe keeɡo la ŋɔ, “Haa ɡela n di sihiih la waa! Dɛ n dɔ kere aa, n fe kpoe buɡ nɔ ta.”

³⁰ Keeɡo la ŋɔ, “He laa dɔɔ mɛ hɛɛ so n nɛ tɔpere bɛlbwa ba le fini nɔ naa? N ɛɛ ken ka bwa naa?” Balam chaŋe ŋɔ, “Akai.”

³¹ Ate, Korowii pili Balam sie, asɛ o na Korowii nyundua torome waa pamɛ kere che ŋwɛnɛ la ta. Asɛ Balam ba harɛ dɛ kpɔ sie pi harɛ.

³² Korowii nyundua torome la bɔɔro ŋɔ, “Ɛrɛɛ he lɔɔ he keeɡo nɔ kera atoro bwa ken? Na, n balɔ dɛ́ ba tɔe ŋwɛnɛ dɛkalkɛŋɔ n ta hen ŋwɛnɛ tɛɛ kɛŋɔ he la Moab harɛ ta.

³³ Keeɡo la na mɛ kera atoro bwa dɛɛ kee mɛ. Dɛ o fe ta kee yaa, n fe kpoe dɛ ɡelo.”

³⁴ Balam ŋɔ Korowii nyundua torome la be ŋɔ, “N ɛ wechɔɡa, n ta jemɛ kɛŋɔ he cheɡɛ ŋwɛnɛ ta dɛ tɔ mɛ ŋwɛnɛ. Dɛ he sie ta lɛɛ yaa, mɛɛ berɔɔ laa berɛ.”

³⁵ Korowii nyundua torome la ŋɔ, “He ne nɛra la kaa, kɛ ka bol anɔ la maa bol he be.” Anee Balam ne Kooro Balak nomonome la kaa.

³⁶ Kooro Balak aa noa kɛŋɔ Balam dɛ ba la, o laŋɔ ka chemo Moab harɛ bwɛjen Ar waa chɔ Aanɔn Moo nyoa, bela ɛ o harɛ jwɛh ta.

³⁷ Kooro Balak ŋɔ Balam be ŋɔ, “N ta nɛra tomɛ ŋɔ ba ba kpɔe kɛ a hiah mɛ naa? Ɛrɛɛ haa wola balɔɔ? Maa won bɔe kem kɛrɛdɛ kɛɛ?”

³⁸ Balam chaŋe ŋɔ, “Taraken n balɔ, kɛ maa won bol wobɛlbwa nemenɛ anɔ la Korowii aa ŋɔa n bol.”

³⁹ Asɛ Kooro Balak ne Balam kaa bwɛɛ bɛl baa dɛ yerɔ Kiriat Hosɔt.

⁴⁰ Kooro Balak kpo nae ne peera, dɛ kpɔ ane tɛ Balam ne nomonome baa ja o nɛɛ la.

⁴¹ Tɔ aa pera chɔɔ la, Kooro Balak kpɔ Balam kaa Bamɔt Baal ba ka che bela na Israel tena la bane.