Nɛra Kura 20 - mzwDBL

Nee aa le bwe ta Mɛreba

¹ Israel tena la bwa tel Sin pua hɛŋle ɡbo harɛ korobiloɡle ta, dɛ bwa baŋre ba tɛnte deene dɛ so Kades. Belaa Miriam sewɛ ba huɡo.

² Dɛ nee toole bela bá nyɔ, asɛ ba bwa ɛɛ naɡre Mosis ne Arɔn wa.

³ Ba ŋɔ Mosis be ŋɔ, “Ya ne yabala la bwa fe pɛo sewɛ Korowii sie bela fe bɔ.

⁴ Bɔkwa waa he ba ya ne pua hɛŋle ɡbo harɛ nɔ ta ya ne ya kondɛɛra bwa ɛɛ ba serewa nɔɔ?

⁵ Bɔkwa waa he le ya ne Ijipt harɛ ta, dɛ kpɔ yaa ba ta bochɔɡe nɔ ta ken? Harɛ yaa wola won parɛ komɛlbwa. Mea kɛɛ fiɡ daa nɔna kɛɛ ɡrepore kɛɛ pɔmeɡranet nɔna toole. Nee kwaraa toole ya nyɔ.”

⁶ Ate, Mosis ne Arɔn le nɛra la bwa be, dɛ la Korowii Dea Cheremibɔr doonyoa bela, dɛ ka kpɔ sie pi harɛ dɛ soŋe Korowii, asɛ Korowii jirima ba ba nɛ.

⁷ Asɛ Korowii ŋɔ Mosis be ŋɔ,

⁸ “Kpɔ daŋɡbala la ásɛ he ne Arɔn ka cheme nɛra la bwa. Bol wa, nee ɛɛ le bwe la taa, ásɛ nɛra la ne ba kondɛɛra bwa nyɔ.”

⁹ Anee Mosis kpɔ daŋɡbala la le Korowii Dea Cheremi Bɔr doonyoa bela, dɛ ka ɛ ɡɛ Korowii aa doo la.

¹⁰ O ne Arɔn yerɛ nɛra la bwa cheme bwe la jwɛh, dɛ ŋɔ ba be ŋɔ, “Lwɛmkpeɡ tena, a chɛ kɛ yá dɔ nee le bwe nɔ ta tɛ heya aa?”

¹¹ Ate, o ɡɔɔ daŋɡbala la lɔ bwe la kera anɛ, asɛ nee palɛ le bwe la ta yɔɔ ken, ba ne ba kondɛɛra bwa nyɔ.

¹² Belaa Korowii ŋɔ Mosis ne Arɔn be ŋɔ, “Haa wola men yaradae, dɛ kpɔ jirima tɛ mɛ kɛ n do ɡoroŋ Israel tena siwi ta nɔ, haa ba sie tɔ dɛ́ kpɔ ba ka jo harɛ maa baɡ ba nyoa la ta.”

¹³ Ba pa bela sɔn Mɛreba, dɛkalkɛ belaa Israel tena naɡre Korowii wa, asɛ o baɡ ba kɛŋɔ o do ɡoroŋ.

Edom tena ŋɔ Israel tena bɛ ba harɛ ta kpɔ

¹⁴ Kades belaa Mosis tomɛ toroma Edom kooro be ŋɔ, “He lolanar Israel tenaa yaa, he jemɛ ya wenaale yaa lɔ a ta wubwa la.

¹⁵ Gɛ ya naawa aa kaa Ijipt harɛ ta, asɛ ya ka bela biɡri, Ijipt tena fiiɡi yaa,

¹⁶ asɛ ya wi no Korowii o no yaa, dɛ ɡel nyundua torome ba kpɔ yaa le Ijipt harɛ ta. Taraken ya lɔ Kades, bwɛɛ waa lɔ he harɛ jwɛh ta.

¹⁷ N poori tɛ yaa ŋwɛnɛ yá kpɔ he harɛ ta ba kaa. Yaa kooni ne daa kooni taa kpɔ. Yaa bule bɛlbwa nee nyɔ, yaa kpɔ ŋwɛnɛjen la taa ba kaa yaa wola bobɛlbwaa bɛɡɛ dɛ́ ka tel kɛŋɔ yaa le he harɛ ta.”

¹⁸ Anee Edom kooro ŋɔ, “Akai! Dɛɛ berɛ n harɛ ta kpɔe, dɛ he hɛlɛ ɡɛ naa, yáa cheme heyaa laa nee.”

¹⁹ Asɛ Israel tena la ŋɔ, “Ŋwɛnɛjen la taa yaa ba kpɔe ba kaa. Dɛ ya bɛlbwa nyɔ he ne, hale ya kondɛɛra kwaraa naa, yaa bɔ a kemee, wobɛlbwa ta jae kpa.”

²⁰ Asɛ Edom tena la berɛ ŋɔ, “Hɛɛ berɛ ya harɛ ta kpɔe.” Ate, dɛ le laa tena baa wara dɛ do kpeɡri ba la ka chem ba.

²¹ Edom tena aa wola sɛɛh kɛŋɔ Israel tena kpɔ ba harɛ ta la, ba barɔ kpɔ baŋ bɛl kaa.

Arɔn seo wa

²² Israel tena la bwa le Kades, dɛ ka tel Hɔr Bwejen ta.

²³ Gɛ Hɔr Bwejen nɔ lɔ Edom tena harɛ jwɛh ta. Belaa Korowii ŋɔ Mosis ne Arɔn be ŋɔ,

²⁴ “Arɔn ɛɛ sewɔɔ ka pu o naawa. Waa harɛ maa baɡɛ Israel tena nyoa la taa tel. He nɛra banɛ nɔ ɛ lwɛmkpeɡ waa maa do heyaa a ta Mɛreba la.

²⁵ Mosis, kpɔ Arɔn ne o bibaa Eliasa he ne ba kaa Hɔr Bwejen nɔ doa.

²⁶ Ka foo Arɔn sɔfo laala la dɛ́ kpɔ do o bibaa Eliasa. Arɔn ɛɛ sewɛ belaa ka pu o naawa.”

²⁷ Ate, Mosis ɛ ɡɛ Korowii aa doo la. Ba teehnɔ kaa bwejen la doa Israel tena la bwa siwi ta.

²⁸ Asɛ Mosis foo Arɔn laala la, dɛ kpɔ do Eliasa, asɛ Arɔn den sewɛ bwejen la doa bela. Asɛ Mosis ne Eliasa tu le bwe la doa.

²⁹ Israel tena la bwa aa naa kɛŋɔ Arɔn sewɔ la, ba ɛ o lwe tɔpera fifraatoro.